ၽူႈတႅၼ်းသၽႃးသႅၼ်ဝီ တွင်ႈထၢမ် ၼႂ်းပၢင်ၵုမ်သၽႃးမိူင်းတႆး ၸွင်ႇတေမီးၽႅၼ်ၵၢၼ် ၸွႆႈပၼ်ၵူၼ်းမိူင်းၸဝ်ႈရူတ်ႉၵႃး ၺႃးၽဝ်လူႉသုမ်းယွၼ်ႉပၢင်တိုၵ်း ၼႂ်းၸိုင်ႈတႆးပွတ်းႁွင်ႇၼၼ်ႉ ဝႃႈၼႆ။
ဝၼ်းတီႈ 18/9/2019 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 16 ၸတ်းႁဵတ်းတီႈလုမ်းသၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ယူႇတီႈၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈ တင်ႈမၢႆ 1 ၸႄႈဝဵင်းသႅၼ်ဝီ တွင်ႈထၢမ်(ကြယ်ပွင့်ပြမေးခွန်း) ၵႂႃႇဝႃႈ -။
“ ရူတ်ႉၵႃးဢၼ်ဢမ်ႇမီးဝႂ်ၶွၼ်ႇၼၼ်ႉတႄႉဝႆႉသေလူးၵွၼ်ႇ ရူတ်ႉၵႃးဢၼ်မီးၶွၼ်ႇၼၼ်ႉသမ်ႉ ၶဝ်လႆႈသႂ်ႇၵႃႈႁပ်ႉႁွင်း (ဢႃႇမၶၢမ်ႇ)၊ ဝႂ်ၶွၼ်ႇ တီႈလူင်ပွင်ၸိုင်ႈယဝ်ႉ၊ မီးမၢႆၾၢင်လႄႈ ဝႂ်ၶွၼ်ႇရူတ်ႉ ဢၼ်ၾၢႆႇၵၢၼ်တေႃႇသူင်ႇဢွၵ်ႇဝႆႉပၼ်ၼၼ်ႉ ယဝ်ႉလႄႈ လွင်ႈလူႉ သုမ်းရူတ်ႉၸိူဝ်းၼၼ်ႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ်ၵေႃႈလီ၊ လူင်ပွင်ၸိုင်ႈမိူင်းတႆးၵေႃႈလီ ထုၵ်ႇ လီၸွႆႈထႅမ်သၢႆႈတႅၼ်း ပၼ်ၶိုၼ်းယူႇ။ ၵွပ်ႈၼႆလႄႈ ၸင်ႇလႆႈတွင်ႈထၢမ်ဝႃႈ ၸွင်ႇတေမီးၵၢၼ်သၢႆႈတႅၼ်းပၼ်/ ဢမ်ႇသၢႆႈ တႅၼ်းၸိူဝ်းၼႆႉ” ဝႃႈၼႆ။
ဢိင်ၼိူဝ်တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီ 3 ၸုမ်း ပဵၼ်ပၢင်တိုၵ်း ၼႂ်းၸိုင်ႈတႆးပွတ်းႁွင်ႇၼၼ်ႉသေ ရူတ်ႉၵႃးၵူၼ်းမိူင်း ၺႃးၽဝ် မီးမွၵ်ႈ 7 လမ်းယဝ်ႉ ၼၢင်းၶိၼ်ႇထႃးယီႇလၢတ်ႈ။
Dr. ဢွင်ႇတၢၼ်းမွင်ႇ ၽွင်းလူင်ၸၢဝ်းၶိူဝ်းမၢၼ်ႈ ၸုမ်းလူင်ပွင်ၸိုင်ႈမိူင်းတႆး တွပ်ႇလၢတ်ႈဝႃႈ “ ၵဵဝ်ႇၵပ်းလူၺ်ႈလွင်ႈရူတ်ႉ ၵႃးၵူၼ်းမိူင်း ဢၼ်လႆႈလူႉသုမ်းၵႂႃႇၼၼ်ႉ သင်ဝႃႈမီးရူတ်ႉၵႃး ဢၼ်မီးၵၢၼ်ႁပ်ႉႁွင်းတႄႉယူႇၸိုင် တေၸၢင်ႈသၢႆႈတႅၼ်း ယူႇ။ လွင်ႈၼႆႉ တိုၵ်ႉတေဢဝ်တၢင်ႇၶိုၼ်ႈတီႈၵေႃၽႄၾၢႆႇၸတ်းပွင်ႁွင်ႈၵၢၼ်ၸွႆႈထႅမ်ၽေးသၽႃႇဝ ၼႂ်းၸိူဝ်ႉၸၢတ်ႈယူႇ” ဝႃႈၼႆ။
ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 16 ၼႆႉ တႄႇၸတ်းႁဵတ်း ၼႂ်းဝၼ်းတီႈ 17/9/2019 မႃး ၼႂ်းၶၢဝ်းတၢင်း 2 ဝၼ်း။ ဝၼ်းတီႈ 17 တင်း ဝၼ်းတီႈ 18 ၼၼ်ႉ မီးၽူႈတႅၼ်းသၽႃးၸႄႈမိူင်းတႆး လႆႈတွင်ႈထၢမ် ၶေႃႈထၢမ်လမ်ႇလွင်ႈ (ကြယ်ပွင့်ပြမေးခွန်း) မႃး မီး 11 ၵေႃႉယဝ်ႉ ဝႃႈၼႆ။
