ၵူၼ်းပၢႆႈၽေးသိုၵ်း တီႈလႃႈသဵဝ်ႈ ႁူဝ်ၵူၼ်းႁိမ်းၸမ် 3,000 ၵေႃႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ။
မိူဝ်ႈၼႆႉ ဝၼ်းတီႈ 26/08/2019 ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉဝိႁၢရ်လူင်မၢၼ်ႈသူႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၶိုၼ်းဢွၼ်ၵၼ်ပွၵ်ႈမိူဝ်းႁိူၼ်းယေးၽႂ်မၼ်းမူတ်းယဝ်ႉ။
ၸၢႆးႁၢၼ်ႇ ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵူၼ်းပၢႆႈၽေးသိုၵ်း တီႈၵျွင်းမၢၼ်ႈသူႈ ဢွၼ်ၵၼ်ပွၵ်ႈမိူဝ်းမူတ်းယဝ်ႉၶႃႈ။ မိူဝ်ႈဝႃးသမ်ႉ ပီႈၼွင်ႉႁဝ်းတၢင်းမိူင်းတဵမ်/ ၵုင်းသႃႇ ဢွၼ် ၵၼ်ပွၵ်ႈ ၶႃႈဢေႃႈ။ မိူဝ်ႈသိုၼ်းသမ်ႉ ပီႈၼွင်ႉႁဝ်း တီႈတႃႈယၢဝ်၊ မၢၵ်ႇၶီႈၼူ ဢွၼ်ၵၼ်ပွၵ်ႈၶႃႈယဝ်ႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉၸွမ်းဝတ်ႉဝႃး မိူၼ်ၼင်ႇ တီႈဝတ်ႉမၢၼ်ႈသူႈ လင်ႁိူၼ်း 80 လင် ႁူဝ်ၵူၼ်း 265 ၵေႃႉ၊ တႃႈယၢဝ် လင်ႁိူၼ်း 258 လင် ႁူဝ်ၵူၼ်း 871 ၵေႃႉ၊ ဝဵင်းၸူင် 226 ၵေႃႉ၊ မိူင်းတဵမ် လင်ႁိူၼ်း 236 လင် ႁူဝ်ၵူၼ်း 808 ၵေႃႉ လႄႈ မၢၵ်ႇၶီႈၼူ လင်ႁိူၼ်း 139 လင် ႁူဝ်ၵူၼ်း 574 ၵေႃႉ တင်းမူတ်းႁူဝ်ၵူၼ်း တေမီးယူႇ 2,700 ပၢႆ။
ၸၢႆးႁၢၼ်ႇ လၢတ်ႈဝႃႈ “ ပွၵ်ႈႁိူၼ်းၶိုၼ်းၵေႃႈ တၢင်းၵူဝ်တၢင်းပွၵ်ႈၵၼ်ၶႃႈယဝ်ႉ။ သင်ဢမ်ႇမိူဝ်းၵေႃႈသမ်ႉမႆႈၸႂ်ႁိူၼ်းယေး တူဝ်ၸဝ်ႈၵဝ်ႇၼၼ်ႉၼႃႇ။ ထႅင်ႈလွင်ႈၼိုင်ႈ ဢၼ်ၵူဝ်တႄႉ လွင်ႈၵူၼ်းမိူင်းႁဝ်း လႆႈႁၼ်မၢၵ်ႇတူၵ်းသႂ်ႇ ၸွမ်ႁိမ်းႁိူၼ်းယေး ၼႂ်းဝၢင်းႁိူၼ်းၵူၼ်းသေ လႆႈတိူဝ်ႉၺႃးၵူၼ်း လူႉတၢႆၵႂႃႇၼၼ်ႉ လွင်ႈၼႆႉၵေႃႈ ၵူၼ်းပၢႆႈၽေးႁဝ်းၶႃႈ ၵူဝ်ၵၼ်ၶႃႈဢေႃႈ ဢမ်ႇႁူႉဝႃႈမၢၵ်ႇတေလုၵ်ႉတၢင်းလႂ်သေမႃးၼၼ်ႉၶႃႈယဝ်ႉ ”ဝႃႈၼႆ။
တႄႇဢဝ် ဝၼ်းတီႈ 15/8/2019 မႃးၼႆႉ ၸုမ်းဢူၺ်းလီပွတ်းႁွင်ႇ 3 ၸုမ်း TNLA၊ AA လႄႈ MNDAA ႁူမ်ႈၵၼ် လူမ်ႇယိုဝ်း ၸၼ်ႉၸွမ်သိုၵ်းမၢၼ်ႈၾၢႆႇပၢႆးၸၢၵ်ႈ DSTA တီႈပၢင်ႇႁူႈလႄႈ ၼႂ်းၸႄႈဝဵင်းၼွင်ၶဵဝ် ထႅင်ႈ 5 တီႈ။
