ၵေႃပွင်ၵၢၼ်ႁူင်းႁဵၼ်းထမ်ႇမ ၸႄႈဝဵင်းသီႇပေႃႉ ၸတ်းႁဵတ်းပၢင်ႁူပ်ႉထူပ်း မေႃသွၼ် ၶွပ်ႈသၢမ်လိူၼ် တႃႇသိုပ်ႇၶိုၼ်ႈ ၼႃႈၸူးၸၼ်ႉ ႁဵၼ်းမႂ်ႇ ဝႃႈၼႆ။
ဝၼ်းတီႈ 25/8/2019 ယူႇတီႈမုၵ်ႉၸုမ်းၵေႃပွင်ၵၢၼ်ႁူင်းႁဵၼ်းထမ်ႇမ ၸႄႈဝဵင်းသီႇပေႃႉ ပတ်းပိုၼ်ႉဢွၼ် ႁူဝ်ၸတ်းႁဵတ်း ပၼ်ႁူပ်ႉထူပ်းၶူးသွၼ်/ မေႃသွၼ် သၢမ်လိူၼ် 1 ပွၵ်ႈ တီႈဝၢၼ်ႈၶၢႆးသိမ်ႇ ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸိုင်ႈတႆးပွတ်း ႁွင်ႇ မီးတူဝ်တႅၼ်း ႁူင်းႁဵၼ်း ၶဝ်ႈႁူမ်ႈ 15 ႁူင်းႁဵၼ်းသေ မီးယိူင်းဢၢၼ်းတႃႇသိုပ်ႇယၢင်ႈၶိုၼ်ႈၸၼ်ႉလိၵ်ႈ ထိုင်ၸၼ်ႉႁူၵ်း လႄႈ ၸၼ်ႉၸဵတ်း ၼႂ်းၶၢဝ်းတၢင်းပၢင်ၽိုၵ်းၽွၼ်ႉမိူဝ်းၼႃႈ။
ၸဝ်ႈၶူးပၺ်ၺႃၸႃႇရ ဝတ်ႉၵွင်းမူးၶမ်း ၵၢင်ဝဵင်းသီႇပေႃႉ မွၵ်ႇလၢတ်ႈၶေႃႈၵႂၢမ်းဝႃႈ “ ႁဝ်းလူဝ်ႇႁဵတ်းတႃႇလိၵ်ႈလၢႆးႁဝ်း ၽႃ သႃ၊ သႃသၼႃ ႁဝ်းႁႂ်ႈယိုၼ်းယၢဝ်းၶိုတ်းၸၼ်ႉလုမ်ႈၾႃႉ၊ ပေႃးၽႂ်လႂ်ၵဵပ်းႁွမ်လႆႈလိၵ်ႈမူႇၵဝ်ႇ 50 မူႇၸိုင် မီးသုၼ်ႇၶိုၼ်ႈ ၸၼ်ႉၸွမ်ပုတ်ႉထ (SSBU) တီႈတူၼ်ႈတီး လၢႆလၢႆတႃႇ 2 ပီ သေ တေလႆႈႁပ်ႉၸုမ်ႈ Diploma ၊ တေသိုပ်ႇၶတ်းၸႂ်ယိုၼ်ႈ မိုဝ်း ၸူးတႆးႁဝ်းၵူႈတီႈတီႈႁႂ်ႈမီးႁူင်းႁဵၼ်းထမ်မၵႂႃႇ တေဢိင်ဢဝ်ထမ်မသေမႅတ်ႇပႅင်းႁၵ်ႉသႃ လိၵ်ႈလၢႆးပိုၼ်းတႆးႁဝ်း ၵႂႃႇဝၼ်းမိူဝ်းၼႃႈ” ဝႃႈၼႆ။
ၸဝ်ႈႁၢၼ်ၸူမ်းၶိူဝ်း လုမ်းဢုပ်ႉပိူင်ႇတပ်ႉၸုမ်းမၢႆ 3 မိူင်းၶိူဝ်း လၢတ်ႈဝႃႈ “ ႁႂ်ႈမေႃတူင်ႉၼိုင်ႁဵတ်းၸွမ်းၵႃႇလ၊ တေႇသ၊ ႁႂ်ႈ မေႃႁဵတ်းၸွမ်းငဝ်းလၢႆး ဢွင်ႈတီႈ ႁႂ်ႈသၢင်ႇထုၵ်ႇ၊ ယႃႇႁႂ်ႈပဵၼ်ၾႆးၽိူင်း၊ ႁႂ်ႈမေႃသွၼ်ပၼ်လုၵ်ႈဢွၼ်ႇႁႂ်ႈထိုင်တီႈထိုင်လႅၼ်၊ ယႃႇႁႂ်ႈဢဝ်ၸိုဝ်ႈမေႃသွၼ်ၼႆလၢႆလၢႆၵူၺ်း” ဝႃႈၼႆ။
ဝၢႆးပၢင်ႁူပ်ႉထူပ်းယဝ်ႉၼၼ်ႉ ၽူႈမီးၼမ်ႉၸႂ်လီ ဢွၼ်ၵၼ်လူႇတၢၼ်းငိုၼ်းၵမ်ႉထႅမ်တႃႇပၢင်ၽိုၵ်းၽွၼ်ႉလႄႈ တႃႇၸႂ်ႉ ၸၢႆႇပုၼ်ႈတႃႇႁူင်းႁဵၼ်းထမ်ႇမ။ ယဝ်ႉၵေႃႈ ၶွတ်ႇၽွတ်ႈၸုမ်းပွင်ၵၢၼ်ၼႂ်းၵေႃပွင်ၵၢၼ်ႁူင်းႁဵၼ်းထမ်ႇမသေ တေသိုပ်ႇၵွင်ႉ သၢၼ်ၸုင်ၸၼ်ဢဝ်ၸိူဝ်းဢၼ်မီးတီႈၵႆၸိူဝ်းၼၼ်ႉ။
ပၢင်ႁူပ်ႉထူပ်းၼႆႉ ၽူႈၶိုၼ်ႈႁွတ်ႈမီး 90 ၵေႃႉ ဢိၵ်ႇပႃးၶူးသွၼ်/မေႃသွၼ်။ ပေႃးထိုင်မႃး ဝၼ်းလိူၼ် (10) မႂ်ႇ(2) ၶမ်ႈ တေ တႄႇမီးပၢင်ၽိုၵ်းၽွၼ်ႉမေႃသွၼ်ႁူင်းႁဵၼ်း ထမ်မတီႈၵျွင်းတႃႈပူၵ်ႇ။ ၵေႃပွင်ၵၢၼ်ႁူင်းႁဵၼ်းထမ်မဝဵင်းသီႇပေႃႉၼႆႉ ၸတ်း ႁဵတ်းပၢင်ႁူပ်ႉထူပ်းမႃး ပွၵ်ႈၵမ်း 9 ၼႆႉသေ ပွၵ်ႈ ၵမ်း 8 ၼၼ်ႉ ၸတ်းႁဵတ်းယဝ်ႉၵႂႃတီႈ ၵျွင်းတွင်ႇၵျီးၽႃယေး ၼႂ်း ဢိူင်ႇ ဝၢၼ်ႈၸိင်း ဝႃႈၼႆ။
မိူဝ်ႈၽွင်းၸုမ်းပွင်ၵၢၼ်ႁူင်းႁဵၼ်းထမ်ႇမ ဢွၼ်ၵၼ်ၸတ်းႁဵတ်းပၢင်ႁူပ်ႉထူပ်းၶူးသွၼ်/မေႃသွၼ်ယူႇၼၼ်ႉ တီႈဝၢၼ်ႈၼႃး မၢၵ်ႇၶေႃ ၸႄႈဝဵင်းသီႇပေႃႉၵေႃႈ ၵေႃႁူမ်ႈသၢင်ႈၵူၼ်းၼုမ်ႇတႆး ၸတ်းႁဵတ်း ပၢင်ပၼ်ပိုၼ်ႉႁူႉ လၢႆးၵႄႈလိတ်ႈၽွင်းထူပ်း လွင်ႈၶိုၵ်ႉၶၵ်ႉ ပိူဝ်ႈတႃႇၵူၼ်းပိုၼ်ႉတီႈၸိူဝ်းယၢမ်ႈထူပ်းၺႃး ပၢင်တိုၵ်း ဝႃႈၼႆ။
သူင်ႇၶၢဝ်ႇ – ယေႈသႅင်ၵေႃႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ