ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း တီႈမီးလုမ်းၸႄႈတွၼ်ႈၼၼ်ႉ ၸဝ်ႈၼႃႈတီႈတီႉလႆႈယႃႈမဝ်းၵမ်တႃႇၵႃႈၶၼ် ငိုၼ်း 120,000 သႅၼ်ပျႃး ဝႃႈၼႆ။
ဝၼ်းတီႈ 16/8/2019 ယၢမ်းၵၢင်ဝၼ်း 11 မူင်းၼၼ်ႉ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်း ရူတ်ႉၵႃး ISUZU ဢၼ်ၸၢႆးဢွင်ႇၼၢႆႇ ဢႃယု 45 ပီ လႄႈ ၼေႃႇၵျႃႇ ဢႃယု 37 ပီ ႁေႃႈမႃးၸွမ်းၵၼ်။ ၵူတ်ႇထတ်းတီႈႁိမ်းဝၢၼ်ႈႁူဝ်တိုဝ်ႉ ၼိူဝ်သဵၼ်ႈတၢင်း လွႆလႅမ် – တူၼ်ႈတီး တီႈလႆႈယႃႈဢႆႊသ် တႃႇၶၼ်ငိုၼ်း 125,250 သႅၼ်ပျႃးပၢႆ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ၾၢႆႇပလိၵ်ႈဢွၵ်ႇဝႆႉတႄႉ“ ဢၼ်တီႉလႆႈၼႂ်းၵႃးၼၼ်ႉ ပဵၼ်ယႃႈဢႆႊသ် ၼမ်ႉၼၵ်း 500 ၵီႊလူဝ်ႊ (မႅၼ်ႈငိုၼ်းယူႇ125,250 သႅၼ်ပျႃး)၊ ငိုၼ်းမၢၼ်ႈ 4 သႅၼ်ပျႃးလႄႈ ၾူၼ်း 2 လုၵ်ႈ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇၸဝ်ႈၼႃႈတီႈပလိၵ်ႈၶဝ် လႆႈၵုမ်းၶင် တူဝ်ၸဝ်ႈၵႃးသွင်ၵေႃႉဝႆႉသေ ပိုတ်ႇ လိူင်ႈၸွႆးတြႃး ဝႆႉတီႈႁူင်းပ လိၵ်ႈၸႄႈဝဵင်းလွႆလႅမ်ဝႆႉ။
ပူၼ်ႉမႃး မိူဝ်ႈဝၼ်းတီႈ 28/7/2019 ယၢမ်းၵၢင်ၼႂ် 10 မူင်းပၢႆ 45 မိၼိတ်ႉၼၼ်ႉ ၸဝ်ႈၼႃႈတီႈပလိၵ်ႈၾၢႆႇၽဵဝ်ႈမူၺ်ႉယႃႈ မဝ်းၵမ် ၵူတ်ႇထတ်းတီႉလႆႈယႃႈမႃႉၼႂ်းၵႃးလမ်းၼိုင်ႈ တီႈတၢင်းၶဝ်ႈဝဵင်းၼွင်ၶဵဝ် ၼိူဝ်သဵၼ်ႈတၢင်း မူႇၸေႊ – ဝဵင်း လိူဝ်ႇ။ ပဵၼ်ရူတ်ႉၵႃး ဢၼ် တၢၼ်ႉသိၼ်ႇဢူး (ႁွင်ႉ) တႃးငႄႇ ဢႃယု 30 ပီ လုၵ်ႉတၢင်းၵူတ်ႉၶၢႆသေ ႁေႃႈမႃး တီႉလႆႈၶၼ်ငိုၼ်းႁိမ်း 2 ႁဵင်သႅၼ်ပျႃးၼင်ႇၵဝ်ႇ။