သိုၵ်းလူင်ပွင်ၸိုင်ႈမၢၼ်ႈၵႂႃႇဝႅတ်ႉလွမ်ႉ ၵူတ်ႇထတ်းတီႉလႆႈ ဢွင်ႈတီႈတူမ်ႈႁုင်ယႃႈမဝ်းၵမ် ႁိမ်းဝၢၼ်ႈသႅဝ်းႁေႃႉ ၼႂ်းၸႄႈ ဝဵင်းၵူတ်ႉၶၢႆ တီႉလႆႈယႃႈလႄႈ ၶိူင်ႈႁုင်ယႃႈ ၵႃႈၶၼ်ငိုၼ်းၼပ်ႉႁူဝ်မိုၼ်ႇလၢၼ်ႉသေတႃႉ ဢမ်ႇတီႉလႆႈၵူၼ်းၵဵဝ်ႇၶွင်ႈသေ ၵေႃႉ။
ဝၼ်းတီႈ 29/7/2019 တပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ တီႉလႆႈႁူင်းတူမ်ႈႁုင်ယႃႈ ၼႂ်းၸႄႈဝဵင်းၵူတ်ႉၶၢႆ တေတူၵ်း မႅၼ်ႈငိုၼ်း မိုၼ်ႇႁူၵ်းလၢၼ်ႉပျႃး။ ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉပလိၵ်ႈ ႁူမ်ႈၵၼ်ၵူတ်ႇထတ်းပိုၼ်ႉတီႈ ၸဵင်ႇၸၼ်းဝၼ်းဢွၵ်ႇ ဝၢၼ်ႈသႅဝ်းႁေႃႉ ယၢၼ်မွၵ်ႈ 2 လၵ်း မိူဝ်ႈဝၼ်းတီႈ 25-28/7/2019 ၼၼ်ႉ ။
သေႃႇၶိၼ်ႇဢွင်ႇ ၽူႈၵွၼ်းပလိၵ်ႈၸႄႈမိူင်းတႆး လၢတ်ႈဝႃႈ “ ႁၼ်သုမ်ႉတူမ်ႈႁုင် ယႃႈမဝ်းၵမ် 96 သုမ်ႉ တီႉလႆႈၶိူင်ႈတူမ်ႈႁုင် ယႃႈမဝ်းၵမ်လႄႈ ၶိူင်ႈၸႂ်ႉတိုဝ်းယႃႈမဝ်းၵမ်တင်းၼမ်။ ၵူၺ်းၵႃႈ တူဝ်ၵူၼ်းတႄႉ ဢမ်ႇတီႉလႆႈ တီႈတီႉလႆႈၶဝ်ႈပႃးတီႈၼိုင်ႈ ဢၼ်သိုၵ်းလႆႈၶၢဝ်ႇဝႃႈ ၼႂ်း 6 တီႈ တီႈဢၼ်လၢမ်း ၶၢတ်ႈဝႃႈပဵၼ်တီႈႁုင်တူမ်ႈယႃႈမဝ်းၵမ်” ဝႃႈၼႆ။
တေႃႈလဵဝ် ဢၼ်တီႉလႆႈ ၶိူင်ႈၸႂ်ႉတိုဝ်းၸွမ်းယႃႈမဝ်းၵမ် ၶိူင်ႈႁုင်တူမ်ႈယႃႈမဝ်းၵမ် တင်းမူတ်း ၼႂ်းပၢၼ်လူင်ပွင်ၸိုင်ႈ NLD ၼႆႉ ပဵၼ်ဢၼ်ၼမ်တီႈသုတ်း ဝႃႈၼႆ။
မၢႆးမၢႆႇ ၽူႈတူင်ႉၼိုင်သုၼ်ႇလႆႈၵူၼ်း ၵူတ်ႉၶၢႆ လၢတ်ႈဝႃႈ “ မိူဝ်ႈၵူႈပွၵ်ႈတႄႉ ၸွမ်းလႅၼ်လိၼ်ၼႆႉ ဢွၼ်ၵၼ်တင်ႈႁူင်း ၸၢၵ်ႈႁုင်ယႃႈ။ တေႃႈလဵဝ်ၼႆႉ ၶဝ်ႈမႃးၸမ်ဝဵင်းတိၵ်းတိၵ်းယဝ်ႉ။ တေႃႈလဵဝ် ဢၼ်ၶဝ်တီႉလႆႈၼၼ်ႉ မၼ်းပဵၼ်တီႈ ယူႇပျီႇတူႉၸိတ်ႉ” ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ ပဵၼ်တွၼ်ႈတႃႇ ဢွင်ႈတီႈ ပျီႇတူႉၸိတ်ႉတင်းၼမ်ပၵ်းသဝ်းတူင်ႉၼိုင်သေ တွၼ်ႈတႃႇတေ ၽဵဝ်ႈမူၺ်ႉယႃႈမဝ်းၵမ်ၼႆႉ တေယၢပ်ႇယူႇမၼ်းၼၢင်းဝႃႈၼႆ။
ၸၢႆးလႃႉ ၵူၼ်းၼုမ်ႇတႆး ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵူႈပွၵ်ႈၼၼ်ႉ တီႉလႆႈဢိတ်းဢိတ်းၵူၺ်း။ ပွၵ်ႈၼႆႉ တႄႉ တီႉလႆႈၼမ်ႉတႄႉတႄႉ။ ၶႃႈႁဝ်းထၢင်ႇတႄႉ လႅပ်ႈတေမီးထႅင်ႈယူႇၵူၺ်း ဢွင်ႈတီႈၼၼ်ႉ သင်ဝႃႈ တီႈၼၼ်ႈ သိုၵ်း ဢမ်ႇၶဝ်ႈၸိုင် ဢမ်ႇမီးၽႂ်ႁတ်းၶဝ်ႈၵႂႃႇ” ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ ပဵၼ်ဢွင်ႈတီႈဢူးတီႇၶုၼ်ႇမျၢတ်ႉ ဢၼ်ပဵၼ်ႁူဝ်ပဝ်ႈသၽႃး မိူင်းႁူမ်ႈတုမ် ယၢမ်းလဵဝ်ၼႆႉ ဢွင်ႇ ပေႉပၢင်လိူၵ်ႈတင်ႈမိူဝ်ႈပီ 2010 တင်း 2015 တင်းသွင်ပၢၼ် တီႈဢၼ်တီႉလႆႈယႃႈၼႆႉၵေႃႈ ပဵၼ်ပိုၼ်ႉတီႈၸုမ်းပျီႇတူႉ ၸိတ်ႉသႅဝ်းႁေႃႉယူႇသဝ်း။
မၢႆးမၢႆႇ သိုပ်ႇလၢတ်ႈဝႃႈ “ ၽူႈတႅၼ်းသၽႃး တီႈၵူတ်ႉၶၢႆၼႆႉ လူင်းပိုၼ်ႉတီႈဢေႇတႄႉ။ ယွၼ်ႉဝႃႈ ဢမ်ႇမီးလွင်ႈၼိမ်သဝ်း လႄႈ ပေႃးလူင်းၼႆ ၵူဝ်ၺႃးယိုဝ်းတၢႆၸိူဝ်းၼႆႉ။ ၵဵဝ်ႇလူၺ်ႈလွင်ႈပၼ်ႁႃ ၼႂ်းၵူတ်ႉၶၢႆၼႆႉ ဢမ်ႇမီးၽႂ် ထိုင်တီႈႁတ်း ဢဝ်ၵႂႃႇ တၢင်ႇတီႈလႂ်” ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ မီးၵူၼ်းသူႇသမ်းယႃႈမဝ်းၵမ်ၼမ်လိူင်ႇ ၸုမ်းႁဵတ်းယႃႈ၊ ၸုမ်းၵႃႉယႃႈၵေႃႈၼမ် ၵူၼ်းၵိၼ်ၵေႃႈ လိူင်ႇတႄႉ ဝႃႈၼႆ။
ဢၼ်တီႉလႆႈယႃႈပဵၼ်လမ်းရူတ်ႉၵႃးတီႈတႃႈၵုင်ႈ၊ ဢၼ်တီႉလႆႈႁူင်းႁုင်ယႃႈတၢင်းဝၢၼ်ႈပုင်ႇ တႃႈၶီႈလဵၵ်း ဢၼ်တီႉလႆႈ ႁူင်းႁုင်ယႃႈ ၼႂ်းၸႄႈဝဵင်းၵူတ်ႉၶၢႆမိူဝ်ႈပီၵၢႆ ပႃးၸဵမ်ဢၼ်တီႉလႆႈၵမ်းၼႆႉ ဢမ်ႇတွၼ်ႉတီႉလႆႈပႃး ၵူၼ်းၵဵဝ်ႇၶွင်ႈ သေၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ