ၸုမ်းပၢႆးမွၼ်းတႆး လၢႆလၢႆၸုမ်း ၼႂ်းၵဵင်းမႆႇ လႄႈၵုင်းထဵပ်ႈ တေႁူပ်ႉၵၼ် ပုၼ်ႈတႃႇပၢႆးမွၼ်းတႆးပေႃး တေ ၶိုၼ်ႈယႂ်ႇၶိုတ်း ၸၼ်ႉလႄႈ မီးလွင်ႈလႅၵ်ႈလၢႆႈၵၼ် ၸိူဝ်းၼႆႉ။

ပေႃးထိုင်မႃး ဝၼ်းတီႈ 3/8/2019 ယၢမ်းႁူဝ်ၶမ်ႈ 6 မူင်း ထိုင် 12 မူင်းၵၢင်ၶိုၼ်း ၸုမ်းပၢႆးမွၼ်းတႆး ၵဵင်းမႆႇ လႄႈ ၵုင်းထဵပ်ႈ ဢိၵ်ႇလူၺ်ႈ ၽူႈႁွင်ႉၽဵင်းၵႂၢမ်းတႆး ထႅင်ႈလၢႆလၢႆၵေႃႉ တေႁူပ်ႉဢုပ်ႇၵၼ်သေ တေမီးပၢင်လဵၼ်ႈတွႆႇတိုင်ႈႁွင်ႉ ၽဵင်းၵႂၢမ်း ၸွမ်းၵၼ် တီႈႁၢၼ်ႉၶဝ်ႈၽၵ်းတႆး ဢမ်းၽၼ်းၵႅဝ်ႈ ဝဵင်းၵဵင်းမႆႇ ၸိုင်ႈထႆး။

ၸၢႆးၼေႃႇသႅင်ၾႃႉ ၸုမ်းတွႆႇတိုင်ႈဝူင်းသိူဝ်း လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈပၢႆးမွၼ်းတႆးႁူပ်ႉၵၼ် မိူဝ်ႈပီၵၢႆ ၼၼ်ႉ ၸုမ်းတွႆႇတိုင်ႈ လႄႈ ၽူႈသူင်မိုတ်ႈၽဵင်းၵႂၢမ်းတႆး ၶဝ်ႈႁူမ်ႈပၼ်ႁႅင်းတင်းၼမ်။ ပီၼႆႉၵေႃႈ ဝူၼ်ႉဝႃႈ လီသိုပ်ႇႁဵတ်း ထႅင်ႈၼႆသေ ႁဝ်းၶႃႈ ၸုမ်းပၢႆးမွၼ်းတႆး ၼႂ်းၵဵင်းမႆႇ ၸင်ႇဢုပ်ႇၵၼ်သေ ႁူမ်ႈတုမ်ၵၼ်ၸတ်းႁဵတ်းပဵၼ်မႃးထႅင်ႈ ပၢင်ႁူပ်ႉ ထူပ်း Tai Music Jam Night ဢၼ်ႁွင်ႉဝႃႈ ၶိုၼ်းၼိုင်ႈတီႈၵဵင်းမႆႇ ပွၵ်ႈၵမ်း 2 မႃး” ဝႃႈၼႆ။

ပီၼႆႉ ၸုမ်းတွႆႇတိုင်ႈဢၼ်တေမႃးၶဝ်ႈႁူမ်ႈလဵၼ်ႈၸွမ်း တင်းမူတ်းမီး 7 ၸုမ်း မိူၼ်ၼင်ႇ ဝူင်းသိူဝ်း၊ STKI သိူဝ်ပၢႆး မွၼ်း၊ Double MI ၽုင်မူတ်ႉ၊ ဢူၺ်းၵေႃႉ၊ ၽူႈႁွင်ႉၵႂၢမ်းၸၢႆးလိူၼ်သႂ်) လႄႈ ၶူးသွၼ်ၵီႊတႃႊထႆး ၵဵင်းမႆႇ ၶူးၸူဝ်ႉ လႄႈ ဢုတမ (ဝူင်း Stone) ၸဵမ်ၸိူဝ်းၼႆႉ တေမႃးၶဝ်ႈႁူမ်ႈလႅၵ်ႈလၢႆႈ ႁူပ်ႉထူပ်းမိုတ်ႈၵိုဝ်းတင်းၸုမ်းပၢႆးမွၼ်းတႆးၵႂႃႇ ဝႃႈၼႆ။

“ ပုၼ်ႈတႃႇၵၢၼ်ပၢႆးမွၼ်းတေၶိုၼ်ႈယႂ်ႇလႄႈ ၶိုတ်းၸၼ်ႉမီးလွင်ႈလႅၵ်ႈလၢႆႈၵၼ်မႃး ၼႂ်းတူင်ႇဝူင်းပၢႆးမွၼ်းတႆး ႁႂ်ႈပေႃးၵႂၢင်ႈ ၶႂၢင်မႃးၼၼ်ႉ ယိူင်းဢၢၼ်းလူင်တီႈသုတ်းတႄႉ မိူဝ်းၼႃႈမႃး ၶႂ်ႈႁႂ်ႈပဵၼ်မိူၼ်ၼင်ႇ Tai Music Festival လူင် ႁႂ်ႈပေႃးၶိုတ်း လႆႈမိူင်းပိူၼ်ႈ ဢမ်ႇၸႂ်ႈဝႃႈ ၸုမ်းတွႆႇတိုင်းတႆးႁဝ်းၼႆႉ ပႂ်ႉလဵၼ်ႈမိူဝ်ႈပဵၼ်ပွႆးပဵၼ် လၢမ်းၵူၺ်း” ၸၢႆးၼေႃႇသႅင်ၾႃႉလၢတ်ႈ ၼႄၼင်ႇၼႆ။

မိူဝ်ႈပူၼ်ႉမႃး ဝၼ်းတီႈ 19/05/2018 ၼၼ်ႉၵေႃႈ ၸုမ်းတွႆႇတိုင်ႈ ပၢႆးမွၼ်းတႆး 8 ၸုမ်း ၼႂ်းၵဵင်းမႆႇ ႁူပ်ႉထူပ်းဢုပ်ႇဢူဝ်းၵၼ် ပဵၼ်ပွၵ်ႈၵမ်းႁႅၵ်ႈ တီႈႁၢၼ်ႉဢမ်းၽၼ်းၵႅဝ်ႈ ၸႄႈဝဵင်းၵဵင်းမႆႇ ၸိုင်ႈထႆး။ ၼင်ႇႁိုဝ် ပေႃးတေပဵၼ်လွင်ႈ မိုတ်ႈၵိုဝ်းၸမ်ၸႂ် ၵၼ်လႄႈ တႃႇတိုတ်ႉတၢႆးၸုင်ၸၼ်ၵၼ် ႁႂ်ႈပၢႆးမွၼ်းတႆး ပေႃးၶိုၼ်ႈယႂ်ႇ ၶိုတ်းၸၼ်ႉၵႂႃႇ ၸိူဝ်းၼႆႉ။

မိူဝ်ႈပီ 2018 ၼၼ်ႉ ၸုမ်းတွႆႇတိုင်ႈပၢႆးမွၼ်းတႆး ဢၼ်ႁူပ်ႉၵၼ်တီႈၵဵင်းမႆႇ 8 ၸုမ်းၼၼ်ႉ မိူၼ်ၼင်ႇ ၸုမ်းလိူတ်ႈတႆး၊ ၸုမ်း ဢူၺ်းၵေႃႉ၊ ၸုမ်းႁႅင်းၸႂ်တႆး၊ တႆးႁၵ်ႉတႆး၊ တိုၵ်ႉႁႅင်း၊ Double MI (မွၵ်ႇမႆႇ)၊ STK (သၢႆတႅၼ်းၶိူဝ်း)လႄႈ ၸုမ်း SIR (သိူဝ်း) ၸိူဝ်းၼႆႉ ဝႃႈၼႆ။