ၵႃးတၢင်ႇဝူဝ်းလမ်းၼိုင်ႈ ၺႃးယိုဝ်းၼႂ်းၸႄႈဝဵင်းၵျွၵ်ႉမႄး ၵူၼ်းႁေႃႈၵႃးလႆႈလူႉတၢႆထင်တီႈ ၵူၼ်းၸွမ်းၵႃး လႆႈမၢတ်ႇၸဵပ်း 2 ၵေႃႉ။
ဝၼ်းတီႈ 27/7/2019 ယၢမ်းၵၢင်ၶိုၼ်းမွၵ်ႈ 10 မူင်းၶိုင်ႈၼၼ်ႉ ၵႃးတၢင်ႇဝူဝ်းဢၼ်လုၵ်ႉတၢင်းမိူင်းမၢၼ်ႈၶိုၼ်ႈမႃးၸွမ်းၵၼ် ႁႃႈလမ်းၼၼ်ႉ ပဵၼ်ၵႃး ၶွမ်ႊပၼီႊ (ပုလဲထူးသစ်ကုမ္ပဏီ စစ်ကိုင်း) ၺႃးၸုမ်းဢမ်ႇႁူႉၾၢႆႇ လၵ်ႉငွႆးယိုဝ်း တီႈဝၢၼ်ႈပၢင် တိုင် ဢၼ်မီးတီႈတၢင်းၽႄတႃႇၵႂႃႇၸူး ၶူင်းၵၢၼ်သၢင်ႈၾၢႆတႃႈလူင်တွၼ်ႈၼိူဝ် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ယိုဝ်းၺႃးၵူၼ်းႁေႃႈၵႃးၵေႃႉၼိုင်ႈ လူႉတၢႆထင်တီႈ ၵူၼ်းၸွမ်းၵႃး ထႅင်ႈ 2 ၵေႃႉၼၼ်ႉ လႆႈမၢတ်ႇၸဵပ်းၸွမ်း။
ဢူးၼေႇဢွင်ႇ ၽူႈၼမ်းၼႂ်းၸုမ်းၸွႆႈထႅမ်ၵူၼ်းထူပ်းၽေး ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈႁွတ်ႈၽႅဝ်ၵႂႃႇဢွင်ႈ တီႈၵႃးတၢင်ႇဝူဝ်းၺႃးယိုဝ်းၼၼ်ႉ လႆႈထူပ်းႁၼ် ၵူၼ်းႁေႃႈၵႃးၵေႃႉၼိုင်ႈလူႉတၢႆဝႆႉ။ ၸဝ်ႈၵႃးဢၼ်ၺႃးယိုဝ်းတၢႆၼၼ်ႉ လႆႈ ဢဝ်ၶၢပ်ႈတူဝ်သူင်ႇၵႂႃႇတီႈႁူင်းယႃၵျွၵ်ႉမႄး။ ၵိုတ်းထႅင်ႈ ၵူၼ်းၸွမ်းၵႃး 2 ၵေႃႉ ဢၼ်မၢတ်ႇၸဵပ်းၼၼ်ႉတႄႉ လႆႈသႂ်ႇမႃး ၸွမ်းၵႃးတၢင်ႇလမ်းသေ သူင်ႇၵႂႃႇႁူင်းယႃၵျွၵ်ႉမႄးမိူၼ်ၵၼ်” ဝႃႈၼႆ။
တေႃႈလဵဝ် ၶၢပ်ႈတူဝ်ၵူၼ်းတၢႆလႄႈ ၵူၼ်းမၢတ်ႇၸဵပ်းၼၼ်ႉတႄႉ လႆႈသူင်ႇၵႂႃႇတီႈႁူင်းယႃၵျွၵ်ႉမႄးဝႆႉမူတ်းယဝ်ႉ ဝႃႈၼႆ။
ၸွမ်းၼင်ႇ ၸဝ်ႈၼႃႈတီႈပလိၵ်ႈမႃးၵူတ်ႇထတ်းယဝ်ႉသေလႆႈႁူႉဝႃႈ “ၵႃးတၢင်ႇဝူဝ်းဢၼ်ၺႃးယိုဝ်းၼၼ်ႉ ပဵၼ်ၵႃးၶွမ်ႊ ပၼီႊ (ပုလဲထူးသစ်ကုမ္ပဏီ စစ်ကိုင်း) သေ ပဵၼ်ၵႃးတၢင်ႇဝူဝ်း ဢၼ် မီးၽိုၼ်လိၵ်ႈပဵၼ်တၢင်းၵၢၼ် ဢၼ်တေတေႃႉ ဝူဝ်း သူင်ႇၵႂႃႇတၢင်းမိူင်းၶႄႇ”ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 1 လိူၼ်မေႊ 2019 ၼၼ်ႉ ၵႃးတၢင်ႇဝူဝ်း 12 လေႃႉၵေႃႈ ၺႃးယိုဝ်း ပဵၼ်ၵႃးၶွမ်ႊပၼီႊ (ကေခိုင်ကျော်) ၵူၼ်းႁေႃႈၵႃးၵေႃႉၼိုင်ႈ ၺႃးယိုဝ်းတၢႆ။
တီႈဢၼ်ရူတ်ႉၵႃးတၢင်ႇဝူဝ်းၺႃးငွႆးယိုဝ်းၼႆႉ ပဵၼ်တီႈၵႃးတၢင်ႇဝူဝ်းမႃးၵိုတ်းလိုဝ်ႈ ၸူဝ်ႈၵႅပ်ႉၸူဝ်ႈၵမ်း ဝႃႈၼႆ။
ၼႂ်းၸိုင်ႈတႆးပွတ်းႁွင်ႇၼႆႉ ၵႆႉမီးလွင်ႈလၵ်ႉငွႆးယိုဝ်းၵႃးတၢင်ႇဝူဝ်းတႃႇသေႇ ၵူၼ်းႁေႃႈၵႃး ၵႆႉၺႃးယိုဝ်းတၢႆ ၵူၺ်းၵႃႈ ၸုမ်းဢၼ်လၵ်ႉငွႆးယိုဝ်းၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ၸဝ်ႈၼႃႈတီႈ ပလိၵ်ႈဢမ်ႇတွၼ်ႉတီႉ ၺွပ်းလႆႈသေ ပွၵ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ