ၵေႃလိၵ်ႈလၢႆးၼမ်ႉလၼ်ႈ တေၸတ်းပၢင်သွၼ်ႁႆႇၵွင် မွင်း လၢႆးၵႃႈဝႅၼ် ၽွင်းၼႂ်းဝႃႇ

ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉလၼ်ႈ တေႁူမ်ႈၵၼ်ၸတ်းႁဵတ်း ပၢင်သွၼ်လၢႆးႁႆႇ ၵွင်၊ မွင်း သိူင်းလႄႈ လၢႆးၶႅၼ်ႉ/ၶွၼ်ႉ/လႅဝ်း တႃႇၶၢဝ်းတၢင်းၼႂ်းဝႃႇ 3 လိူၼ်။

ၶၢဝ်းၼႂ်းဝႃႇၼႆႉ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉလၼ်ႈ တေၸတ်းႁဵတ်းပၢင်သွၼ်ပၼ်ၵူႈၶမ်ႈ တင်ႈတႄႇ 7:00 -10:00 တေၾိုၵ်းသွၼ်ပၼ် လၢႆးႁႆႇၵွင်၊ မွင်း၊ သႅင်ႇ၊ လၢႆးၶႅၼ်ႉ၊ လၢႆးၶွၼ်ႉ၊ လၢႆးလႅဝ်း ၊ ၼူၵ်ႉ၊ တူဝ်း ၸိူဝ်းၼႆႉ။ ၸတ်းတီႈၼႂ်းဝၢင်းၵွင်းမူးၽိူၵ်ႇ (ၼၢမ်ႇမိူင်း) ယူႇၼႂ်းဝူင်ႈၵၢင် ပွၵ်ႉၵတ်းယဵၼ်လႄႈ ပၢင်ႇၸိမ် ဢိူင်ႇၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၊ ၶူးပူင်သွၼ်ပဵၼ် ၸၢႆးဝၼ်း၊ ၸၢႆးဢွင်ႇၵျႃႇ ၊ ၸၢႆးၺုၼ်ႉ၊ ၸႆးၶုၼ်ၵၼ်ႇတမႃႇ ၊ ၼၢင်းၼူၼ်းမူဝ်လႄႈ ၸၢႆးမိူင်း ၸိူဝ်းၼႆႉ။

ၸၢႆးဢွင်ႇၵျႃႇ ႁူဝ်ၼႃႈၸုမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ ယိူင်းဢၢၼ်းဢၼ်ႁဝ်းၶႃႈ ၸတ်းႁဵတ်းၼႆႉ ၶႂ်ႈႁႂ်ႈၸၢႆးတႆးလႄႈ ၽူႈသူၼ်ၸႂ်ၾိင်ႈႁိတ်ႈႁွႆးတႆး လႆႈမီးတိုဝ်ႉတၢင်းႁဵၼ်းဢဝ်၊ ႁႂ်ႈၸၢႆးတႆးမေႃႁႆႇ ၵွင်မွင်းတႆးၵူႈၵေႃႉ ၊ ႁႂ်ႈလၢႆးႁႆႇၵွင်တႆးမီးၼူတ်ႊ Note မၼ်း ၽႂ်ႁႆႇၵေႃႈ ႁႂ်ႈၸၢင်ႈ တူၺ်းၼူတ်ႊမၼ်းသေႁႆႇ ဢမ်ႇၸႂ်ႈႁႆႈၵႃႈပဵၼ်လႄႈ ႁႂ်ႈသဵင်ၵွင်မွင်းတႆး လင်တူဝ်ႈမိူင်းတႆး ” ဝႃႈၼႆ။

ၸုမ်းၵွင်မွင်းသိူင်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉလၼ်ႈၼႆႉ ၶွတ်ႇၽွတ်ႈမႃးမိူဝ်ႈပီ 2016 လိူၼ်ၼူဝ်ႊဝႅမ်ႊၿိူဝ်ႊဝၼ်းတီႈ 17။ တင်ႈဢဝ်ပီ 2017 မႃးၼႆႉ ပေႃးထိုင်မႃးၶၢဝ်းၼႂ်းဝႃႇသၢမ်လိူၼ်ၼႆ ၸတ်းႁဵတ်းပၢင်သွၼ် ၸိူင်ႉၼႆမႃးတႃႇသေႇၼႆယဝ်ႉ။ ပၢင်သွၼ်ၼိုင်ႈပွၵ်ႈမီးၽူႈ သူၼ်ၸႂ်ၶိုၼ်ႈ ႁဵၼ်းမွၵ်ႈ 80 ၵေႃႉ။