တင်ႈတႄႇႁၢင်ပီ 2017 မႃး တေႃႇထိုင်ဝၼ်းမိူဝ်ႈၼႆႉ တပ်ႉသိုၵ်းၸိုင်ႈတႆး သွင်ဢၼ် ဢၼ်ပဵၼ်ၶွင်ႇသီႇဢဝ်ၶိုၼ်းၸိုင်ႈတႆး လႄႈ ပႃႇတီႇ မႂ်ႇသုင်ၸိုင်ႈတႆး ထဵင်မေႃး ၽိတ်းၽႅၵ်ႇ ၵၼ် လေႃႇတိုၵ်း ပိုတ်းယိုဝ်းၵၼ် လၢႆလၢႆပွၵ်ႈ။
ၽႂ်ၽိတ်းၽႂ်ထုၵ်ႇ ၽူႈတွႆႇႁွၵ်ႈ ဢမ်ႇၶႂ်ႈၸီႉၸမ်ႈ၊ ယွၼ်ႉႁၵ်ႉၸိူဝ်ႉၸၢတ်ႈၼင်ႇၵၼ်လႄႈ ၸင်ႇပိုၼ်ႉပွႆႇ ႁိူၼ်းယေး ပေႃႈမႄႈသေ မႃးႁၢပ်ႇၵၢၼ် ၸိူဝ်ႉၸၢတ်ႈၽႂ်မၼ်း လႄႈ ၽူႈတွႆႇႁွၵ်ႈ ယင်းဢဝ် ၵုင်ႇ မုၼ် ၽူႈၸိူဝ်းပိုၼ်ႉပွႆႇ ပုၼ်ႈလီသုၼ်ႇတူဝ်မႃးတႃႇသေႇ။
ၵွပ်ႈၼၼ်လႄႈ ယွၼ်ႉယိုဝ်းၵၼ်ၵမ်းၼႆႉသေ ၵူၼ်းမိူင်းတႆးလႆႈသင်၊ မိူင်းတႆးပဵၼ်ႁိုဝ် ၊ ၶိူဝ်းတႆးပဵၼ် သင် – ယွၼ်ႉယိုဝ်းၵၼ်သေ တပ်ႉသိုၵ်းသွင်တပ်ႉသိုၵ်း လႆႈႁပ်ႉၽွၼ်း ပူၺ်ႈလွင်ႈတုမ်ႉယွၼ်ႈ ၸိူင်ႉႁိုဝ်။ ဢၼ်တႆးတေႃႇတႆးယိုဝ်းၵၼ်ၼႆႉ ဢၼ်လီမၼ်းမီးသင် ?
ဢၼ်ႁဝ်းၵႆႉဝႃႈ – ၼမ်ႉလႆႈတႂ်ၽိူင်းဝႃႇ ၊ လမ်ၼမ်ႉယၵ်းမိုဝ်းၵၼ်ဝႃႇၸိူဝ်းၼႆႉ တွၼ်ႉႁၼ် ပဵၼ်ၼမ်ႉ ပဵၼ်တူဝ် မႃးမိူဝ်ႈလႂ်။
လွင်ႈလုသုမ်းလူင် ဢၼ်ႁၼ်သိုဝ်ႈၼႃႈတၼ်းတႃတႄႉ ႁဵတ်းႁႂ်ႈတႆး တင်းလၢႆ ႁၼ်ထိုင်ဝႃႈ သိုၵ်းတႆး သွင် ၸုမ်း ဢမ်ႇတုင်းႁပ်ႉၶေႃႈတုၵ်းယွၼ်း သင်ၶၸဝ်ႈ။
ယွၼ်ႉသိုၵ်းတႆးဢမ်ႇၽွမ်ႉၵၼ်လႄႈႁိုဝ် ထိုင်တီႈ ၵူၼ်းႁၢႆႉ ပေႃးၶဝ်ႈယိုဝ်း ၸဝ်ႈတူၼ်ၶူး ၵလျႃႇၼ ဝမ်သ ဝတ်ၵျွင်းယွတ်ႈ ဝဵင်းၵျွၵ်ႉမႄး လႆႈလုလွၼ်ႇ ၸၢမ်ႈပူႈၶဝ်ႈပူၺ်ႈသူၼ်မၢၵ်ႇႁၢၵ်ႈၶမ်းၵႂႃႇ။ လွင်ႈၼႆႉ တွၼ်ႈတႃႇၸၢဝ်းတႆး ၸိူဝ်းၵိူဝ်းလီပုတ်ႉထၸဝ်ႈ ပဵၼ်လွင်ႈမွင်ၸႂ်ၶေႃးၶူမ်ၸွမ်းတႄႉ။
ယွၼ်ႉတႆးတေႃႇတႆးယိုဝ်းၵၼ်သေ ဢၼ်လႆႈႁပ်ႉႁူႉ ႁူပ်ႉႁၼ်ထႅင်ႈတႄႉ –
(1) ၸိုဝ်ႈသဵင်ၸိူဝ်ႉ ၶိူဝ်းတႆးလူႉ၊ တၼ်း ႁဵင်းတီႈယူႇ ဢၼ်ဝႃႈ တႆး ပဵၼ်ပီႈဢၢႆႈတၢႆႈႁူဝ် ၵူၼ်းမိူင်းတႆး ဢိူဝ်ႈ ဢၼ်ဝႃႈ ၼၼ်ႉ လူတ်းလူင်း ။ ပိူၼ်ႈထၢင်ႇႁၢင်ႈ ထၢင်ႇလဵၵ်ႉပေႉၵိၼ် – ဢမ်ႇမီးၽႂ် ဢဝ်ၶႂၼ်ဢဝ်ငဝ်း ၸိူဝ်ႉၸၢတ်ႈ။ ၽႂ်ၵေႃႈ တေဢမ်ႇႁတ်းဝႆႉဝၢင်းၸႂ် ယုမ်ႇယမ်ၼပ်ႉထိုဝ် သၢၼ်မိုဝ်း ႁူမ်ႈၽၢၵ်ႈၵၢၼ်ငၢၼ်း တင်း တပ်ႉသိုၵ်းတႆး။
(2) ၵူၼ်းမိူင်းတႆးလႆႈပၢႆႈ ဢမ်ႇၸၢင်ႈလႆႈၽုၵ်ႇလႆႈသွမ်ႈလီ၊ ဢမ်ႇမီးၽႂ်ၵႅတ်ႇၵင်ႈပၼ် ၶူဝ်းႁိူၼ်း ၼိူဝ်ႉလိူတ်ႈ သၢႆၸႂ် ၵူၼ်းမိူင်းတႆး ။
(3) မိူင်းတႆး တႅၵ်ႇၸတ်ႉ ယွၼ်ႉဢမ်ႇမီးလွင်ႈၽွမ်ႉသဵင် ပဵင်းပၢၵ်ႇ
(4) တပ်ႉသိုၵ်းတႆး သုမ်းၵွင်ႈသုမ်းၵူၼ်း သုမ်းၶၢဝ်းယၢမ်း – မၢၵ်ႈမိုဝ်ႈၸိုၼ်းယၢမ်းဢၼ်လူဝ်ႇ ဢဝ်ယိုဝ်းၽူႈၶဵၼ်ၼၼ်ႉ ႁဝ်းတေႃႇႁဝ်းဢဝ်ယိုဝ်းၵၼ်ၶိုၼ်း လႄႈ သုမ်းလူင်သုမ်းလၢင် ။
ၵွပ်ႈၼၼ် တႃႇသုၼ်ႇလႆႈ ၸိူဝ်ႉၸၢတ်ႈတေမီးလွင်ႈၽဵင်ႇပဵင်း၊ ၵူၼ်းမိူင်းတေလႆႈယူႇသႃႇ ႁဵတ်းၵၢၼ် ႁႃၵိၼ်လဵင်ႉတွင်ႉ လႆႈငၢႆႈ လူၺ်ႈဢမ်ႇမီးၽေး၊ ဢမ်ႇမီးၽူႈယႃႉၵူၼ်းၵဝ်းၼၼ်ႉ တေပဵၼ်ၽႂ် ႁပ်ႉ ပုၼ်ႈၽွၼ်းၵႅတ်ႇၵင်ႈ။
ၵႂၢမ်းႁဝ်းမီးဝႆႉဝႃႈ ၸိူဝ်ႉမူင်ႈၵေႃႈမူင်ႈပႅင်းၸိူဝ်ႉမႅင်းၵေႃႈမႅင်းႁၵ်ႉ ၼႆလႄႈ ႁႂ်ႈမေႃၽွမ်ႉၵၼ် ပႂ်ႉပႃးႁၵ်ႉသႃ ၸိူဝ်ႉၸၢတ်ႈၸဝ်ႈၵဝ်ႇ၊ ယႃႇသိုပ်ႇဝႆႉပိုၼ်းႁၢႆႉပၼ်လုၵ်ႈလၢၼ် ႁႂ်ႈယၢပ်ႇၵႂႃႇတၢင်းၼႃႈထႅင်ႈသေၵမ်း။
သဵင်ၶဝ်ႇႁွၵ်ႈ
ၶေႃႈမုလ်း – ၵေႃသိုဝ်ႇၶၢဝ်ႇၽူႈတွႆႇႁွၵ်ႈ မၢႆ 011, November 2018