Thursday, March 28, 2024

RCSS တင်း သိုၵ်းလူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ် တီႈၼေႇပျီႇတေႃႇ

Must read

တူဝ်တႅၼ်း RCSS/SSA တင်း ၸုမ်းငူပ်ႉငီႉဢုပ်ႇဢူဝ်း တပ်ႉမတေႃႇမၢၼ်ႈ ႁူပ်ႉဢုပ်ႇၵၼ် ၵဵဝ်ႇၵပ်းၶၵ်ႉၵၢၼ်လွင်ႈ ငမ်း ယဵၼ်၊ လွင်ႈၵၢၼ်သိုၵ်းလႄႈ လွင်ႈၶွမ်ႊမတီႊႁူမ်ႈသၢင်ႈပႂ်ႉတူၺ်းၵဵဝ်ႇလူၺ်ႈလွင်ႈၵိုတ်းတိုၵ်း (JMC) ၸဵမ်ၸိူဝ်းၼႆႉ။

Photo by – RCSS/ RCSS တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ် တီႈၼေႇပျီႇတေႃႇသေ ထၢႆႇႁၢင်ႈမၢႆတွင်း မိူဝ်ႈဝၼ်းတီႈ 12/7/2019

မိူဝ်ႈၼႆႉ ဝၼ်းတီႈ 12/7/2019 ယၢမ်းၵၢင်ၼႂ် 10 မူင်း ၸွမ်ႁၢၼ်ပွင်ၶိူဝ်း ဢွၼ်ႁူဝ် ၸုမ်းတူဝ်တႅၼ်း ၶွင်ႇသီႇဢဝ်ၶိုၼ်းၸိုင်ႈ တႆး/ တပ်ႉသိုၵ်းၸိုင်ႈတႆး RCSS/SSA ႁူပ်ႉၵၼ်တၢင်း ၸုမ်းငူပ်ႉငီႉဢုပ်ႇဢူဝ်း တပ်ႉမတေႃႇ ဢၼ်ၸွမ်သိုၵ်းယႃႇပျေႉ ဢွၼ်ႁူဝ်ၼၼ်ႉ ႁူပ်ႉၵၼ်တီႈၼေႇပျီႇတေႃႇ။

- Subscription -

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 / ၽူႈၶၢၼ်ပၢၵ်ႇ RCSS/SSA လၢတ်ႈတီႈၵေႃသိုဝ်ႇၶၢဝ်ႇၽူႈတွႆႇႁွၵ်ႈဝႃႈ “ ဢၼ် ႁဝ်းသွင်ၾၢႆႇဢုပ်ႇၵၼ်မိူဝ်ႈၼႆႉတႄႉ 1) ၵဵဝ်ႇၵပ်းၶၵ်ႉၵၢၼ်လွင်ႈငမ်းယဵၼ် ဢၼ်ႁဝ်းၶွင်ႉၶမ်ၵၼ်ၸိူဝ်းၼႆႉ ႁဝ်းၶႃႈ တေၶိုၼ်းၵႄႈၵၼ်သေ တေသိုပ်ႇၵႂႃႇတၢင်းၼႃႈ။ ထႅင်ႈလွင်ႈၼိုင်ႈၵေႃႈ ဢုပ်ႇဢူဝ်းၵၼ် ၵဵဝ်ႇၵပ်း တပ်ႉတေႃႇတပ်ႉ ၵဵဝ်ႇၵပ်းလွင်ႈၵၢၼ်သိုၵ်း ၸိူဝ်းၼႆႉ ႁဝ်းၶႃႈလႆႈဢုပ်ႇၵၼ်ပႃး။ ဢုပ်ႇဢူဝ်းၵၼ် ၵဵဝ်ႇၵပ်းၵၢၼ် JMC ၸဵမ် ၸိူဝ်းၼႆႉ ပိူင်လူင်ဢၼ်ဢုပ်ႇဢူဝ်းၵၼ်တႄႉ တေမီး 3 လွင်ႈယႂ်ႇယႂ်ႇၼႆႉ။ ၵူၺ်းၵႃႈ ႁူဝ်ယွႆႈမၼ်းတႄႉ ႁဝ်းၶႃႈ ပႆႇၸၢင်ႈ လၢတ်ႈ” ဝႃႈၼႆ။

Photo by – NRPC/ RCSS တင်း NRPC ႁူပ်ႉဢုပ်ႇၵၼ် တီႈၼေႇပျီႇတေႃႇ

ဢၼ်ႁူပ်ႉၵၼ်ပွၵ်ႈၼႆႉ လႆႈဢုပ်ႇၵၼ်ၵႂၢင်ႈၶႂၢင်သေ ပဵၼ်တိုဝ်ႉတၢင်းလီတႃႇႁူပ်ႉၵၼ်ထႅင်ႈၶိူဝ်းယႂ်း ဝႃႈၼႆ။

သိုပ်ႇလၢတ်ႈဝႃႈ “ လွင်ႈဢၼ်ႁဝ်းၶႃႈ လႆႈဢုပ်ႇၵၼ်မိူဝ်ႈၼႆႉၼႆႉ ႁဝ်းၶႃႈတင်းသွင်ၾၢႆႇၸွႆႈၵၼ်ႁႃတၢင်း တၢင်းသွင်ၾၢႆႇ ႁႂ်ႈမၼ်း ပေႃးလီတင်းသွင်ၾၢႆႇသေဢမ်ႇၵႃး ႁႂ်ႈမၼ်းသၢင်ႇတေႃႇတင်းသွင်ၾၢႆႇ ၽွၼ်းၵၢၼ်ဢၼ်ဢွၵ်ႇမႃးၼႆႉ တေလႆႈ ဝႃႈ ဢမ်ႇႁၢင်ႈႁၢႆႉၼင်ႇၵဝ်ႇ။ မဵဝ်းၵၢၼ်ဢုပ်ႇဢူဝ်းၵၼ်ၼႆႉ မၢင်ပွၵ်ႈၵေႃႈႁႂ်ႈမၼ်းလႆႈတဵမ်ပၢၵ်ႇၼႆ မၼ်းၵေႃႈတေယၢပ်ႇ။ တၢင်း ၶဝ်ၵေႃႈယွမ်းၽွင်ႈ၊ တၢင်းႁဝ်းယွမ်းၽွင်ႈ ၸိူင်ႉၼႆၵူၺ်း။ ယဝ်ႉၵေႃႈ ဢၼ်မၼ်းလီၵမ်းၼႆႉတႄႉ မၼ်းသိူဝ်ႇ တၢင်းဝႆႉဝႃႈ တႃႇတေၵႂႃႇတၢင်းၼႃႈၼႆၵေႃႈ ႁႂ်ႈမၼ်းပေႃးၸၢင်ႈႁူပ်ႉၵၼ်ၶိူဝ်းၶိူဝ်းယႂ်းယႂ်း မီးပၼ်ႁႃသင်မႃးၵေႃႈ ႁႂ်ႈႁဝ်းပေႃးၸၢင်ႈၸႂ်ႉ လၢႆးႁူပ်ႉထူပ်းၵၼ်ၸိူင်ႉၼႆသေ ၵႄႈၶႆၵႂႃႇ။ ယဝ်ႉၵေႃႈ ထႅင်ႈဢၼ်ၼိုင်ႈမၼ်းလီၼႆ ၼင်ႇႁိုဝ် တင်းတႂ်ႈၼႆႉ တေဢမ်ႇမီး လွင်ႈတုမ်ႉတိူဝ်ႉၵၼ် ႁဝ်းလူဝ်ႇလႆႈထိင်းတၢင်းသွင်ၾၢႆႇ ၸဵမ်ၸိူဝ်းၼႆႉ” ဝႃႈၼႆ။

ဝၼ်းတီႈ 11/7/2019 မိူဝ်ႈဝႃးသမ်ႉ ယူႇတီႈ တူဝ်တႅၼ်း RCSS/SSA ဢၼ်ၸွမ်ႁၢၼ်ပွင်ၶိူဝ်း ဢွၼ်ႁူဝ်ႁူပ်ႉထူပ်းၽူႈတၢင် တူဝ်လူင်ပွင်ၸိုင်ႈမၢၼ်ႈ NRPC တီႈၼေႇပျီႇတေႃႇ ၾၢႆႇၽူႈတၢင်တူဝ် လူင်ပွင်ၸိုင်ႈမၢၼ်ႈသမ်ႉ တွၵ်ႇတိူဝ်ႇ တိၼ်ႇမဵဝ်း ဝိၼ်း ၵႅမ်ႁူဝ်ပဝ်ႈ NRPC ၊ ၸွမ်သိုၵ်း ယႃႇပျေႉ ၊ ၸွမ် သိုၵ်း မိၼ်းၼွင်ႇ ၊ ၸွမ်သိုၵ်းၵဝ်ႇ ၶိၼ်ႇၸေႃႇဢူး ၊ ၸဝ်ႈသိုၵ်းလူင် လႃႉဢူး ၊ ဢူးၸေႃႇထေး ၽူႈၶၢၼ်ပၢၵ်ႇ လုမ်းၸွမ်ၸိုင်ႈ ၊ ဢူးထုၼ်းထုၼ်းဢူး ၽူႈၶဝ်ႈၸုမ်း NRPC ၊ ဢူးလႃႉမွင်ႇသူၺ်ႇ ၽူႈၵိူဝ်းၵုမ်ၵေႃႇမသျိၼ်ႇ လွင်ႈငမ်းယဵၼ်မၢၼ်ႈ ၸိူဝ်းၼႆႉ။

Photo by – NRPC/ RCSS တင်း NRPC ႁူပ်ႉဢုပ်ႇၵၼ် တီႈၼေႇပျီႇတေႃႇ

ၸဝ်ႈသိုၵ်းလူင် ၸၢႆးငိုၼ်း လၢတ်ႈဝႃႈ “ ဢၼ်ႁဝ်းၶႃႈလႆႈဢုပ်ႇၵၼ်ၵႂႃႇမိူဝ်ႈဝႃးတႄႉ ပီ 2019 ဢမ်ႇၼၼ်ၵေႃႈ ၼႂ်းႁူဝ်ပီ 2020 ၼႆႉ ၾၢႆႇလူင်ပွင်ၸိုင်ႈၶဝ်ၵေႃႈသမ်ႉၶႂ်ႈႁဵတ်း ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ထႅင်ႈၵမ်းၼိုင်ႈလႄႈ ၵမ်းၼႆႉ ပေႃးၶဝ်ႁဵတ်းၼႆ ႁဝ်းတေႁဵတ်းႁိုဝ်ႁၢင်ႈႁႅၼ်း ၽွၼ်းၵၢၼ်မၼ်း ႁဝ်းၶႂ်ႈလႆႈသင် ပေႃးၼႆၵေႃႈ ႁဝ်းလူဝ်ႇမႃးငူပ်ႉငီၵၼ်” ဝႃႈၼႆ။

“ ထႅင်ႈလွင်ႈၼိုင်ႈၵေႃႈ မၼ်းတေၵဵဝ်ႇၵပ်းၵၢၼ်ပူၵ်းပွင်ၼႂ်းပိုၼ်ႉတီႈ လွင်ႈၼႆႉၵေႃႈ ႁဝ်းၶႃႈလႆႈဢုပ်ႇၵၼ်။ လိူဝ်ၼၼ်ႉ လႆႈ ဢုပ်ႇပႃးထႅင်ႈ လွင်ႈၵူၼ်းႁဝ်းၶႃႈ ဢမ်ႇဝႃႈ ၵေႃႉသိုၵ်းၵေႃႉႁၢၼ် ဢမ်ႇဝႃႈၵူၼ်းမိူင်း ဢၼ်ထုၵ်ႇတီႉၺွပ်းၶင်ၶွၵ်ႈဝႆႉ ၸိူဝ်း ၼၼ်ႉ ႁႂ်ႈပွႆႇပၼ်ၶိုၼ်း။ ယဝ်ႉၵေႃႈ ဢုပ်ႇဢူဝ်းၵၼ် ၵဵဝ်ႇၵပ်းလူၺ်ႈၵၢၼ်ၽဵဝ်ႈမူၺ်ႉ ယႃႈမဝ်းၵမ် ၸဵမ်ၸိူဝ်းၼႆႉ” ၸဝ်ႈသိုၵ်း လူင် ၸၢႆးငိုၼ်း လၢတ်ႈၼႄၼင်ႇၼႆ။

Photo by – NRPC/ RCSS တင်း NRPC ႁူပ်ႉဢုပ်ႇၵၼ် တီႈၼေႇပျီႇတေႃႇ

ယူႇတီႈတူဝ်တႅၼ်း RCSS/SSA ဢၼ်လႆႈၵႂႃႇႁူပ်ႉထူပ်း ဢုပ်ႇဢူဝ်းၵၼ် တင်းလူင်ပွင်ၸိုင်ႈမၢၼ်ႈလႄႈ တပ်ႉမတေႃႇ မၢၼ်ႈၼႆႉသမ်ႉ ၸွမ်ႁၢၼ်ပွင်ၶိူဝ်း၊ ၸဝ်ႈသိုၵ်းလူင် ၸၢႆးငိုၼ်း ၊ ၸဝ်ႈသိုၵ်းလူင် ဢွင်ႇမျႃႉ ၊ ၸဝ်ႈသိုၵ်းလူင် သႅဝ်းႁၢၼ် ၊ ၸဝ်ႈသိုၵ်း တေႇဝိင်ႇ ၊ ၸဝ်ႈသိုၵ်း ၸၢႆးဢူး ၊ ၸဝ်ႈသိုၵ်း ၸၢႆးႁၢၼ် ၊ ၸဝ်ႈႁၢၼ် ၸိူင်းသႅၼ်မႂ်ႇ ၸဵမ်ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း