ဝၼ်းတီႈ 12/03/2019 ယၢမ်းၵၢင်ၼႂ် 10 မူင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း တပ်ႉသိုၵ်းလူင်ပွင်ၸိုင်မၢၼ်ႈ ႁူပ်ႉဢုပ်ႇၵၼ် တီႈၼေႇပျီႇတေႃႇ။ ၵဵဝ်ႇၵပ်းလွင်ႈၼႆႉ ယူႇတီႈ RCSS တေဢုပ်ႇ ဢူဝ်းပိူင်ယႂ်ႇ ၵဵဝ်ႇၵပ်းလွင်ႈပၼ်ႁႃ ၼႂ်းၵႄႈတပ်ႉသိုၵ်း တင်းသွင်ၾၢႆႇလၢႆလၢႆလိူင်ႈ ၸဵမ်ၸိူဝ်းၼႆႉ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 2 RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်းႁဝ်းၶႃႈ ၶွင်ႇသီႇ ဢဝ်ၶိုၼ်းၸိုင်ႈတႆးတႄႉ ၵွပ်ႈပိူဝ်ႈႁဝ်းၶႃႈ မီးပၼ်ႁႃၵၼ်တင်းတပ်ႉသိုၵ်းမၢၼ်ႈလၢႆလၢႆလိူင်ႈ။ ၵမ်းၼႆႉ ႁဝ်းၶႃႈၵေႃႈဝႃႈ ႁဝ်းၶႃႈလူဝ်ႇႁူပ်ႉထူပ်းငူပ်ႉငီႉၵၼ်လီယူဝ်ႉ။ ၵၢၼ်ၸိူဝ်းၼႆႉၼႆႉ ႁဝ်းတေၸႂ်ႉလၢႆးႁုၵ်ႉ လၢႆးႁၢႆႉ လၢႆးၵွင်ႈ လၢႆးၵၢင်ႇ ၵႄႈ ၵၼ်မၼ်းယၢပ်ႇ ၵွပ်ႈၼၼ်လႄႈ ႁဝ်းမႃးတေႃႇၼႃႈၵၼ်သေလႄႈ ဢုပ်ႇဢူဝ်းၵၼ်ဢမ်ႇလီႁႃႉ တၢင်းသူ ၸဝ်ႈၵေႃႈ ၶွတ်ႇၽွတ်ႈမႃး ၸုမ်းဢုပ်ႇဢူဝ်းယဝ်ႉလူး တင်းၾၢႆႇႁဝ်းၵေႃႈ မီးၸုမ်းဢုပ်ႇဢူဝ်းယူႇလူး ႁဝ်းမႃးၼင်ႈတေႃႇၼႃႈၵၼ် သေလႄႈ ၵႄႈၶႆပၼ်ႁႃၵႂႃႇ လူင်ႉလူင်ႉလႅင်းလႅင်း ၵႂၢင်ႈၵႂၢင်ႈၶႂၢင်ၶႂၢင် ” ဝႃႈၼႆ။

တင်းၾၢႆႇ RCSS/SSA ယူႇတီႈၸွမ်ႁၢၼ် ပွင်ၶိူဝ်း ဢွၼ်ႁူဝ်လုၵ်ႈၸုမ်းသေ ၵႂႃႇႁူပ်ႉထူပ်းတင်း တူဝ်တႅၼ်း တပ်ႉသိုၵ်း လူင်ပွင်ၸိုင်ႈမၢၼ်ႈ။ မိူဝ်ႈဝႃး ဝၼ်းတီႈ 11/03/2019 သမ်ႉ ႁူပ်ႉၵၼ်တင်း NRPC တီႈၼေႇပျီႇတေႃႇမိူၼ်ၵၼ် ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈၼႆႉ ပိုၼ်ၽၢဝ်ႇဝႆႉပဵၼ်တၢင်းၵၢၼ်မိူဝ်ႈဝၼ်းတီႈ 21/12/2018 ၼၼ်ႉဝႃႈ လႆႈၸီႉသင်ႇ ဝႆႉတိူင်း သိုၵ်း 5 တိူင်း (ယပၶ၊ ယလၶ၊ မပၶ၊ ယမၶ လႄႈ တိူင်းသိုၵ်းသၢမ်ၸဵင်ႇ)၊ သိုၵ်းတပ်ႉမတေႃႇ တေၵိုတ်းတိုၵ်း ၾၢႆႇလဵဝ်တႃႇၶၢဝ်း တၢင်း 4 လိူၼ် (21/12/2018 တေႃႇထိုင် 30/04/2019) ဝႃႈၼႆသေတႃႉ မိူဝ်ႈဝၼ်းတီႈ 25/01/2019 ၼၼ့် ပိုၼ်ၽၢဝ်ႇ ၾၢင်ႉထိုင်ၵူႈမူႇၵူႈၸုမ်းၼႄးပူၼ်ႉပႅၼ်ၼႃႈလိၼ်၊ ၶႂၢၵ်ႈႁႅင်းသိုၵ်းပၵ်းတပ်ႉမႂ်ႇၸိူဝ်းၼႆႉ ၽွင်းၼၼ့်သမ့်တူၵ်ႇၸိုဝ်ႈ တွၵ်းသဵင် ၾၢင့်ထိုင် RCSS ဝႆ့လၢႆလၢႆၵမ်း။