ၵႃးတင်း ရူတ်ႉၶိူင်ႈၽႃႇၵၼ် တီႈႁိမ်းၽၵ်းတူၶဝ်ႈဢွၵ်ႇမိူင်း ၽၵ်းတူႁေႃၶမ်းလူင်( ရွှေနန်းတော်) တီႈလႅၼ်လိၼ်တႆး – ၶႄႇ တီႈဝဵင်းမူႇၸေႊၼၼ်ႉ ၽူႈၸၢႆးၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။

ၵႃးတင်းရူတ်ႉၶိူင်ႈၽႃႇၺႃးၵၼ်ၼႆႉ ပဵၼ်ဝၼ်းတီႈ 11/7/2019 ယၢမ်းဝၢႆးဝၼ်း မွၵ်ႈ 1 မူင်းပၢႆ တီႈၼိူဝ်သဵၼ်ႈတၢင်းမိူင်းႁူမ်ႈ တုမ် ႁိမ်းၽၵ်းတူၶဝ်ႈဢွၵ်ႇမိူင်း လႅၼ်လိၼ်တႆး – ၶႄႇ တီႈၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၵႃးတင်း ရူတ်ႉၶိူင်ႈၽႃႇ ၵၼ် ၵူၼ်းၶီႈရူတ်ႉၶိူင်ႈမႃးၼၼ်ႉ လႆႈလူႉတၢႆထၢင်တီႈၵမ်းလဵဝ်။

ၸၢႆးလႅင်း ၵူၼ်းမူႇၸေႊ လၢတ်ႈတီႈၵေႃသိုဝ်ႇၶၢဝ်ႇၽူႈတွႆႇႁွၵ်ႈဝႃႈ “ ၵႃးတင်းရူတ်ႉၶိူင်ႈၽႃႇၵၼ်၊ ဢွင်ႈတီႈဢၼ်ၶဝ်ၽႃႇ ၵၼ်ၼၼ်ႉ ပဵၼ်တီႈၵူၼ်းၵိုၼ်းရူတ်ႉၵႃးၼမ်။ ရူတ်ႉႁိပ်ႇၺႃးႁူဝ်ၵူၼ်းႁေႃႈရူတ်ႉၶိူင်ႈလႄႈ လူႉတၢႆထင်တီႈၼၼ်ႉၵမ်းလဵဝ်” ဝႃႈၼႆ။

ဢွင်ႈတီႈဢၼ်ရူတ်ႉၶိူင်ႈတင်းၵႃး ၽႃႇၵၼ်ၼၼ်ႉ မိူဝ်ႈၵူႈပွၵ်ႈၵေႃႈ ၵႆႉၵႆႉၽႃႇၺႃးၵၼ်ယူႇ။ ထႅင်ႈလွင်ႈၼိုင်ႈၵေႃႈ ရူတ်ႉၶိူင်ႈ တင်းၵႃးၼႆႉၶဝ်ႁေႃႈဝႆးၼႃႇဢမ်ႇမီးပၵ်းပိူင်သင် ၵူၼ်းႁေႃႈရူတ်ႉၶိူင်ႈၵေႃႈ ဢမ်ႇသႂ်ႇ မၢၵ်ႇႁူဝ်ႁႄႉၽေးသင်သေ ဢၼ်ဢမ်ႇ ၶႂ်ႈပဵၼ်ၵေႃႈ မၼ်းပဵၼ်ၵႂႃႇၼၼ်ႉယဝ်ႉ ဝႃႈၼႆ။

ၸၢႆးလႅင်း လၢတ်ႈဝႃႈ “ ပိူင်ယႂ်ႇမၼ်းတႄႉ ၵူၼ်းႁေႃႈရူတ်ႉၶိူင်ႈလႄႈသင်၊ ၵူၼ်းသွၼ်ႉမၼ်းလႄႈသင် လူဝ်ႇလႆႈသႂ်ႇမၢၵ်ႇႁူဝ် ႁႄႉၽေး(မူၵ်ႇၵၼ်ႊၼွၵ်း) ၵၼ်ဢေႃႈ။ ယဝ်ႉၵေႃႈ လူဝ်ႇႁေႃႈလွႆးလွႆး။ တီႈၼၼ်ႈ ၵႃးတၢင်ႇၵုၼ်ႇဝႃႇ၊ ရူတ်ႉၶိူင်ႈသၢမ်လေႃႉ ဝႃႇ၊ ရူတ်ႉၶိူင်ႈဝႃႇၼႆ မၼ်းၼမ် သုၵ်ႉသၵ်ႉၵၼ်လူင်ဝႆႉ ၵူၼ်းႁေႃႈရူတ်ႉၶဝ်ၵူႈၵေႃႉ လူဝ်ႇၾၢင်ႉသတိၵၼ် ႁေႃႈလီလီ ၶႂ်ႈ တိုၵ်းသူၼ်းၼင်ႇၼႆ”။

ၵဵဝ်ႇၵပ်းလွင်ႈၼႆႉ ၵူၼ်းတၢႆလႄႈ ၵူၼ်းႁေႃႈၵႃးတႄႉ ပဵၼ်ၽႂ် ၵေႃႉလႂ် ဢၼ်ဝႃႈၼၼ်ႉ ပႆႇလႆႈႁူႉၵေႃႉမၼ်း ဝႃႈၼႆ။