ၵႃးတင်း ရူတ်ႉၶိူင်ႈ ၽႃႇတမ်ၵၼ် ႁၢဝ်ႈႁႅင်း တီႈၶူဝ်ဝၢၼ်ႈမွၼ်း ၼမ်ႉလၼ်ႈ မီးၵူၼ်းလူႉတၢႆထင်တီႈ 2 ၵေႃႉ မၢတ်ႇၸဵပ်း လိူဝ်ႁႅင်း 1 ၵေႃႉ ဝႃႈၼႆ။
ဝၼ်းတီႈ 03/05/2019 ယၢမ်းဝၢႆးဝၼ်း 3 မူင်းပၢႆၼၼ်ႉ ၵႃးသႅၼ်း HiJet တင်း ရူတ်ႉၶိူင်ႈလမ်းၼိုင်ႈ ၽႃႇတမ်ၵၼ် တီႈၶူဝ် ဝၢၼ်ႈမွၼ်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းၶီႇရူတ်ႉၶိူင်ႈ မႃးၸွမ်းၵၼ် 3 ၵေႃႉၼၼ်ႉ လူႉတၢႆ 2 ၵေႃႉ မၢတ်ႇၸဵပ်း ႁၢဝ်ႈႁႅင်း 1 ၵေႃႉ ဝႃႈၼႆ။
ၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ လႅပ်ႈၶဝ်တေႁေႃႈဝႆးၼင်ႇၵၼ်။ တီႈၼိူဝ်ၶူဝ်ၼၼ်ႉ တၢင်းသမ်ႉၵႅပ်ႈ ဝႄႈၵၼ်ဢမ်ႇလွတ်ႈၵေႃႈပဵၼ်လႆႈ။ ယဝ်ႉၵေႃႈ တီႈၼၼ်ႈသမ်ႉ တၢင်းသမ်ႉ ငွၵ်းဝႆႉဢိတ်းဢိတ်း။ လႆႈႁူႉတႄႉ လူႉတၢႆ 2 ၵေႃႉ၊ မၢတ်ႇၸဵပ်း 1 ၵေႃႉ” ဝႃႈၼႆ။
တီႈသိုဝ်ႇၶၢဝ်ႇ တႆးလွတ်ႈလႅဝ်း ဢွၵ်ႇဝႆႉဝႃႈတႄႉ“ ၶႃသွင်ၵေႃႉၽူဝ်မေးၼႆႉ တေၶႂ်ႈသိုဝ်ႉ ၸိူဝ်ႉၶဝ်ႈ ၸိူဝ်ႉထူဝ်ႇလိၼ်ၼႆသေ ၵႂႃႇ ပိုင်ႈဢိင် ပီႈၼွင်ႉၶဝ် ၸိုဝ်ႈၼၢင်းလႃႉ မေႇ ဢႃႇယု 37 ပီ ၵူၼ်းဝၢၼ်ႈမွၼ်း ၶီႇလူတ်ႉၶိူင်ႈၸွမ်း သွင်ၶႃၽူဝ်မေးၸွႆႈၸီႉ ၼႄ ပၼ် သဵၼ်ႈတႃႈသၢႆတၢင်း လႄႈမိူဝ်ႈ ၸိူဝ်းၶဝ် ထိုင်တီႈၶူဝ် ဝၢၼ်ႈမွၼ်းၼၼ်ႉ လႆႈပဵၼ်ၽေး ၵိုင်ႉၵၢင်ႉၵႃးၽႃႇၺႃး သေ ၸၢႆးလဵၵ်ႉ ၼၢင်းၸေႃးမိၼ်ႉတႄႉ သွင် ၽူဝ်မေး တႄႉ လႆႈတၢႆထင်တီႈၵမ်းလဵဝ်။ ၵေႃႉပဵၼ် ၼၢင်းလႃႉမေႇသမ်ႉ ၶႃ ႁၵ်း တိူဝ်ႉဝၢတ်ႇၸဵပ်းပႃး ၸွမ်းတူဝ် ႁၢဝ်ႈႁႅင်းဝႆႉ။ ၵူၼ်း ႁေႃႈၵႃး ၽႃႇၶဝ် 3 ၵေႃႉၼၼ်ႉတႄႉ ပၢႆႈၶဝ်ႈထိူၼ်ႇသေ ၵူၼ်းဝၢၼ်ႈ မွၼ်း ဢွၼ်ၵၼ်လမ်းသွၵ်ႈတဝ်ႁႃတူဝ် ၵူၼ်းမီးတၢင်း ၽိတ်းၼၼ်ႉယူႇ” ဝႃႈၼႆ။
ၸၢႆးလဵၵ်ႉ တင်း ၼၢင်းၸေႃးမိၼ်ႉၼႆႉ တႄႇၼႃႈႁိူၼ်းႁူမ်ႈၵၼ်မႃး မိူဝ်ႈပီ 2017။ ၸၢႆးလဵၵ်ႉၼႆႉ ပဵၼ်လုၵ်ႈၸၢႆး လုင်းထုၼ်း ၶၼ်ႉ ၵူၼ်းဝၢၼ်ႈပၢင်လူင် ပွၵ်ႉ ( 1) ၸႄႈဝဵင်းၼမ်ႉတူႈ။ ၼၢင်းၸေႃးမိၼ်ႉသမ်ႉ လုၵ်ႈယိင်း လုင်းပၢၼ်းဢွင်ႇ ၵူၼ်းဝၢၼ်ႈ ပွၵ်ႉ (8) ဝဵင်းၵျွၵ်ႉမႄး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ