ၵူၼ်းမိူင်းတူၼ်ႈတီႈ 1000 ပၢႆတေပႆတၢင်းၼေၵၢင်ၸႂ် ၵမ်ႉထႅမ်တႃႇမူၼ်ႉမႄး ပိူင်ငဝ်ႈပိုင်းမိူင်း 2008 ဝႃႈၼႆ။
ပၢင်ၼေၵၢင်ၸႂ်ၼႆႉတေၸတ်းႁဵတ်းၼႂ်းဝၼ်းတီႈ 17 /07/2019 ။
ဢူးဝိၼ်းၼၢႆႇၸူဝ်း ၽူႈဢွၼ်ႁူဝ်တေၸတ်းပၢင်ၼေၵၢင်ၸႂ်လၢတ်ႈတီႈ ၸုမ်းၶၢဝ်ႇ ၵမ်ႇပေႃးၸ တၢႆး ဝႃႈ- ယိုၼ်ႈလိၵ်ႈယွၼ်းဢၼုယၢတ်ႈ မိူဝ်ႈဝၼ်းတီႈ 11/7/2019 ယဝ်ႉ။ တေၸႂ်ႉႁႅင်းၵူၼ်း မွၵ်ႈ 1000 ။ယွၼ်ႉဝႃႈ ပိူင်ငဝ်ႈပိုင်းမိူင်း 2008 ၼႆႉ ဢမ်ႇၵိုင်ႇငၢမ်ႇ ဢမ်ႇပဵၼ်တႃႇၵူၼ်းမိူင်း။ ၵူၺ်းၵႃႈ သမ်ႉၵဵဝ်ႇၶွင်ႈတင်းၵူၼ်းမိူင်းပတ်းပိုၼ်ႉလႄႈၵူၼ်းမိူင်းလႆႈႁူမ်ႈၵၼ်သေ တေၼေၵၢင်ၸႂ် ၶႃႈဢေႃႈ။ -ဝႃႈၼႆ။
ၵူၼ်းဢၼ်တေၶဝ်ႈပႃးၼႂ်းပၢင်ၼေၵၢင်ၸႂ်ၼၼ်ႉ တေၵုမ်ၵၼ်တီႈ တၢင်းၼႃႈဝတ်ႉၵျွင်း မိၼ်းၵျွင်း ၊ သဵၼ်ႈတၢင်းလူင်ပူဝ်ႇၶျုၵ်ႈဢွင်ႇသၢၼ်း ဝဵင်းတူၼ်ႈတီး။ တေယိပ်းပၢႆႉဢၼ်တႅမ်ႈဝႆႉဝႃႈ တႃႇမူၼ်ႉမႄးပိူင်ငဝ်ႈပိုင်းမိူင်း 2008၊ ၵၢၼ်မူၼ်ႉမႄးပိူင်ငဝ်ႈပိုင်းမိူင်း ၼႂ်းသၽႃးႁူမ်ႈတုမ် ႁႂ်ႈဢွင်ႇမၢၼ်ႈသေၵမ်း ၸိူဝ်းၼႆႉသေ တေပႆတၢင်းတေႃႇထိုင် သူၼ်မွၵ်ႇ ၸွမ်ႁၢၼ်ဢွင်ႇသၢၼ်း။ တေမီးပၢင်တၢၼ်ႈၶႆႈလွင်ႈ ပိူင်ငဝ်ႈပိုင်းမိူင်း 2008 ဝႃႈၼႆ ။
မိူဝ်ႈပူၼ်ႉမႃးဝၼ်းတီႈ 2/3/2019 ဝၼ်းၸဝ်ႈႁႆႈ ၸဝ်ႈၼႃး ၼၼ်ႉၵေႃႈ ၵူၼ်းမိူင်းလႄႈ မူႇၸုမ်းတူင်ႇဝူင်းၵူၼ်း ဢွၼ်ၵၼ်ပႆတၢင်းၼေၵၢင်ၸႂ်ၵမ်ႉထႅမ်တႃႇမူၼ်ႉမႄးပိူင်ငဝ်ႈပိုင်းမိူင်း 2008 ၼင်ႇၵဝ်ႇ။
ပိုင်ႈဢိင်ၶၢဝ်ႇ – ၵမ်ႇပေႃးၸတၢႆး