လိူၼ်ၼႆႉ ၻီႊသႅမ်ႊၿိူဝ်ႊဝၼ်းတီႈ 11 တေႃႇထိုင် 15 တီႈဝဵင်းလူင်တူၼ်ႈတီးၼၼ်ႉ ၸိူဝ်းပဵၼ်လုၵ်ႈၸုမ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ၵၼ်ၵႂႃႇမိုင်ႉၵၢၼ် ပိူဝ်ႈတႃႇႁၢင်ႈႁႅၼ်းဝိူၵ်ႊသျွပ်ႊလူင်ႈၼႃႈ ND ဢၼ်ဝႃႈ National Dialogue ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၶွင်ၸၢဝ်းၶိူဝ်းတႆး။ တီႈၼႂ်းၼၼ်ႉ လႆႈႁၼ်လုၵ်ႈၸုမ်း CSSU ၸိူဝ်းပဵၼ် ၶွင်ႇသီႇဢဝ်ၶိုၼ်းၸိုင်ႈတႆး RCSS ၊ ၵေႃႁူမ်ႈသၢင်ႈၸိုင်ႈတႆး SSJAC ၊ ပႃႇတီႇသိူဝ်ၽိူၵ်ႇ SNDP ဢိၵ်ႇလူၺ်ႈပႃးတင်း ပႃႇတီႇတႆးလႅင် လၢဝ် 5 လုၵ်ႈ၊ ပႃႇတီႇၵွင်ၸႆးလႄႈတင်း CSO ၶဝ်၊ ႁူမ်ႈသၢၼ်မိုဝ်းၵၼ်သေယဝ်ႉ ႁၢင်ႈႁႅၼ်းဢုပ်ႇဢူဝ်းႁူဝ်ၶေႃႈလူင် 5 ဢၼ် ဢၼ်ပဵၼ်ၵၢၼ်မိူင်း၊ ၵၢၼ်မၢၵ်ႈမီး၊ ၵၢၼ်လွင်ႈၵူၼ်း၊ ၵၢၼ်သိင်ႇဝႅတ်ႉလွမ်ႉၾိင်ႈတိုၼ်းပဵၼ်လႄႈ တီႈလိၼ်ၽုၵ်ႇသွမ်ႈ ဢိၵ်ႇလူၺ်ႈပႃးတင်းၵၢၼ်ႁူမ်ႇလူမ်ႈ မီး 5 ႁူဝ်ၶေႃႈ။

သင်ၸိူဝ်ႉပဵၼ်မႃးပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ဢမ်ႇၼၼ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်ထႅင်ႈၵမ်းထူၼ်ႈ 3 ၼႆၸိုင် ယူႇတီႈၵူၼ်းမိူင်းတႆးလႄႈၸၢဝ်းၶိူဝ်းတႆးတင်းသဵင်ႈ သမ်ႉႁၼ်ထိုင်ၸိူင်ႉၼင်ႇႁိုဝ်။ ၶေႃႈၵၢင်ၸႂ်ဢၼ်ႁဝ်းၶႃႈမိူၼ်ၵၼ်တင်းမူတ်းၼၼ်ႉ ပဵၼ်ၸိူင်ႉႁိုဝ်မီးၸိူင်ႉႁိုဝ် ၼင်ႇႁိုဝ်တေဢွၵ်ႇမႃးၽွၼ်းၵၢၼ်ဢၼ်ၼၼ်ႉ ဢွၼ်ၵၼ်မႃးၶတ်းၸႂ်ယူႇၼႆ ႁဝ်းၶႃႈၵေႃႈပွင်ႇၸႂ်။ ဢၼ်ၼႆႉႁဵတ်းၸွမ်းဢီႈသင်ၶႃႈလႃႇ၊ လၢတ်ႈတီႈသိုဝ်ႈတႄႉႁဵတ်းၸွမ်း RCSS လႆႈလူင်းလၢႆးမိုဝ်းၵိုတ်းတိုၵ်းၸွမ်း NCA ၸိူင်ႉၼၼ်မႃးလႄႈ ၸင်ႇသိုပ်ႇသၢႆမၼ်းသေပဵၼ်ၵၢၼ်မႃးၼႆ ႁဝ်းၶႃႈၵေႃႈပွင်ႇၸႂ်ၵၼ်ယူႇ။

တီႈၼႆႈပေႃးႁဝ်းမႃးလဵပ်ႈႁဵၼ်းတူၺ်း တႄႇဢဝ်ၸဵမ်မိူဝ်ႈပီ 2011 လိူၼ်ဢေႃႊၵတ်ႊသ် 18 ဝၼ်း မိူဝ်ႈပၢၼ်လူင်ပွင်ၸိုင်ႈဢူးတဵင်းၸဵင်ႇ လႆႈႁွင်ႉႁႃၸုမ်းၸၢဝ်းၶိူဝ်းယိပ်းၵွင်ႈၵၢင်ႇၶဝ် ပိူဝ်ႈတႃႇတေမႃးဢုပ်ႇၵုမ် ၵၢၼ်မိူင်းၵၼ်၊ ပိူဝ်ႈတႃႇတေတူၵ်းလူင်းလွင်ႈငမ်းယဵၼ်ၵၼ်ၼႆလႄႈ တႄႇမႃးၶၢဝ်းတၢင်း 5-6 ပီယဝ်ႉ။ ၵမ်းၼႆႉၽိူဝ်ႇထိုင်မႃး 2015 လိူၼ်ဢွၵ်ႊထူဝ်ႊၿိူဝ်ႊ 15 ဝၼ်း မီးၸုမ်းၸၢဝ်းၶိူဝ်းမႅၵ်ႇၵွင်ႈၶဝ်တႃႇ 8 ၸုမ်းလူင်းလၢႆးမိုဝ်းၵိုတ်းတိုၵ်း။ မိူဝ်ႈလဵဝ် ဢၼ်ပႆႇလူင်းလၢႆးမိုဝ်းၵိုတ်းတိုၵ်း မီးထႅင်ႈယူႇ 13 ၸုမ်း။ ၵူၺ်းၵႃႈ ၼင်ႇႁိုဝ် 13 ၸုမ်းၼၼ်ႉ ၶဝ်ႈႁူမ်ႈပႃးမႃးၸွမ်းၼႂ်းၵၢၼ် NCA လွင်ႈၵိုတ်းတိုၵ်းတူဝ်ႈမိူင်းၼၼ်ႉ ယူႇတီႈလူင်ပွင်ၸိုင်ႈၶတ်းၸႂ်ၵူၺ်းဢမ်ႇၵႃး လႆႈႁၼ်ပႃးတင်းလူင်ပွင်ၸိုင်ႈႁိမ်းႁွမ်းၶႅပ်ႇၶၢင်ႈႁဝ်း ဢၼ်ပဵၼ်လူင်ပွင်ၸိုင်ႈ ၸိုင်ႈမိူင်းၶႄႇၼၼ်ႉၵေႃႈ ပၼ်ႁႅင်းဢီး။

ဢိင်ၼိူဝ်မိူင်းၶႄႇပၼ်ႁႅင်းဢီးသေယဝ်ႉ ၼႂ်းဝၼ်းမိူဝ်ႈၼႆႉ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ဢၼ်ပၵ်းငဝ်ႈငုၼ်းၶဝ် ၸွမ်းလႅၼ်လိၼ်ၸၢပ်ႈမိူင်းၶႄႇလႄႈမိူင်းတႆး၊ ၸွမ်းလႅၼ်လိၼ်မိူင်းၶႄႇဢိၵ်ႇလူၺ်ႈမိူင်းၶၢင် ၸိူဝ်းၼၼ်ႉတင်းမူတ်းတင်းသဵင်ႈၼႆႉ ဢိင်ၼိူဝ်ငဝ်းလၢႆးၵူႈလွင်ႈသေ လႆႈဝႃႈဢွၼ်ၵၼ်ဝူၼ်ႉသွၼ်ႇ ပိူဝ်ႈတႃႇၵိုတ်းတိုၵ်းတူဝ်ႈမိူင်း ပိူဝ်ႈတႃႇလူင်းလၢႆးမိုဝ်း NCA ယဝ်ႉၼႆ ႁဝ်းၶႃႈလႆႈႁၼ်ပိူင်ပဵၼ်မၼ်း လႅၵ်ႈလၢႆႈၶၢႆႉၸူးမႃးၸိူင်ႉၼင်ႇၼၼ်။

ၵူၺ်းၵႃႈ ပေႃးမႃးတူၺ်းၼႂ်းၸုမ်းၸၢဝ်းၶိူဝ်းႁဝ်းၼႆ RCSS လူင်းလၢႆးမိုဝ်းယဝ်ႉသေတႃႉၵေႃႈ SSPP ပႆႇလႆႈလူင်းလၢႆးမိုဝ်း။ ပေႃးဝႃႈၸိူင်ႉၼင်ႇၼၼ် ၼႂ်းၵၢၼ်လူင်းလၢႆးမိုဝ်းၵိုတ်းတိုၵ်းၼၼ်ႉ ၸိူဝ်းဢၼ်လူင်းလၢႆးမိုဝ်းယဝ်ႉလႄႈ ၸိူဝ်းဢၼ်ပႆႇလူင်းလၢႆးမိုဝ်းၼၼ်ႉ သင်ၸိူဝ်ႉဝႃႈၶဝ်မႃးၶဝ်ႈၶိုင်ၵၼ် ၸွင်ႇတေပဵၼ်ၵၢၼ်လႆႈ။

ယူႇတီႈလူင်ပွင်ၸိုင်ႈသမ်ႉ လႆႈတမ်းဝၢင်းၽႅၼ်ႇတီႈလၢႆးတၢင်းၵၢၼ်မိူင်း (Road-map) မၼ်းဝႆႉ 7 ၶေႃႈၼၼ်ႉသေ ႁဵတ်းသၢင်ႈၵႂႃႇယူႇယဝ်ႉ။ ၽႅၼ်ႇတီႈလၢႆးတၢင်းၵၢၼ်မိူင်း ဢၼ်ၶဝ်ႁဵတ်းဝႆႉၼၼ်ႉတႄႉ ၸွမ်းၼင်ႇၾၢႆႇၸုမ်းၸၢဝ်းၶိူဝ်း 8 ၸုမ်းလႄႈတင်းလူင်ပွင်ၸိုင်ႈ ၾၢႆႇတပ်ႉသိုၵ်းမၢၼ်ႈ လႆႈလူင်းလၢႆးမိုဝ်းၵၼ်ဝႆႉတႄႉ ၶၵ်ႉၵၢၼ်မိူင်းၸိုင်- (1)လူင်းလၢႆးမိုဝ်းၵိုတ်းတိုၵ်း။ (2)ႁၢင်ႈႁႅၼ်းယူင်ႉၶၢပ်ႈဢုပ်ႇၵုမ်ၵၢၼ်မိူင်း။ (3)ၸတ်းႁဵတ်းပၢင်ၵုမ်ၸၼ်ႉၸိူဝ်ႉၸၢတ်ႈၽႂ်မၼ်း။ ယဝ်ႉၵေႃႈဢုပ်ႇၵုမ်ၵၼ်ၸွမ်းလွင်ႈၵၢၼ်ႁူမ်ႇလူမ်ႈ ႁႂ်ႈပေႃးၶဝ်ႈၶိုင်ၵၼ်ၶိုၼ်း။ (4)ၸတ်းႁဵတ်းပၢင်ၵုမ်ၵၢၼ်မိူင်း ပၢင်ၵုမ်လွင်ႈငမ်းယဵၼ်မိူင်းႁူမ်ႈတုမ်။ (5)လူင်းလၢႆးမိုဝ်းလိၵ်ႈၵိၼ်ၵႅၼ်ႇမိူင်းႁူမ်ႈတုမ်။ (6)ၸင်ႇဢဝ်ၶေႃႈလႆႈၸႂ် ဢၼ်ႁဝ်းတူၵ်းလူင်းၵၼ် သွင်ပႃႈသၢမ်ၾၢႆႇၼၼ်ႉ ၶိုၼ်းတၢင်ႇထိုင်တီႈၽွင်းတႅၼ်းသၽႃး။ (7)ၶိုၼ်းသိုပ်ႇဢုပ်ႇထႅင်ႈၸွမ်းၼင်ႇၼႂ်း Accord ဢၼ်ႁွင်ႉဝႃႈၶေႃႈတူၵ်းလူင်းၸၼ်ႉမိူင်းႁူမ်ႈတုမ်ၼၼ်ႉသေယဝ်ႉ ၶိုၼ်းသိုပ်ႇႁဵတ်းလွင်ႈၵၢၼ် သႂ်ႇၶူၼ်းၵၼ်ၶိုၼ်းၵၢၼ်ၾၢႆႇႁူမ်ႇလူမ်ႈ ဢၼ်ၶဝ်ႁွင်ႉဝႃႈ DDR ၼၼ်ႉ တေမီး 7 ၶၵ်ႉတွၼ်ႈ။

ၼႂ်း 7 ၶၵ်ႉတွၼ်ႈၼၼ်ႉ ပေႃးမႃးလဵပ်ႈႁဵၼ်းတူၺ်း ယူင်ႉၵၢၼ်ဢၼ်ၶဝ်ၸဝ်ႈႁဵတ်းၵၢၼ်ယူႇမိူဝ်ႈလဵဝ်ၼႆႉ မၼ်းပဵၼ် 8 ၸုမ်းႁဵတ်းဝႆႉၵူၺ်းလႄႈ သင်ၸိူဝ်ႉဝႃႈ 13 ၸုမ်းၼၼ်ႉ မႃးႁူမ်ႈလူင်းလၢႆးမိုဝ်းၸွမ်း တင်းမူတ်းတေပဵၼ်ၵႂႃႇ 21 ၸုမ်း။ ပေႃးၼၼ် ယူင်ႉၵၢၼ်ဢၼ်တေဢုပ်ႇၵၢၼ်မိူင်း Framework ဢၼ်ႁဵတ်းဝႆႉၵဝ်ႇၵဝ်ႇၼၼ်ႉ ၸွင်ႇတေၶိုၼ်းမူၼ်ႉမႄး။ ပေႃးဝႃႈဢမ်ႇမူၼ်ႉမႄးၸိုင် ၼင်ႇႁိုဝ် 13 ၸုမ်းၼၼ်ႉတေယွမ်းႁပ်ႉလႆႈ တေႁဵတ်းႁိုဝ်ယွၼ်ႇယၢၼ်းၸိူင်ႉၼင်ႇႁိုဝ်၊ တေႁဵတ်းႁိုဝ်ႁႃလၢႆးဢုပ်ႇၵုမ်မၼ်း တမ်းဝၢင်းၽႅၼ်ၸိူင်ႉႁိုဝ်ၼႆ ၼႂ်း NCA ဢမ်ႇႁၼ်တႅမ်ႈဝႆႉတႅၵ်ႇလႅင်းလႄႈ ဢၼ်ၼႆႉၵေႃႈပဵၼ်တီႈဢၼ်လီၶႆႈၸႂ်ၸွမ်းယူႇ။ တီႈၼႂ်းယူင်ႉၵၢၼ် ဢုပ်ႇၵုမ်ၵၢၼ်မိူင်း Framework ဢၼ်ၶဝ်တႅမ်ႈဝႆႉၼၼ်ႉ ပေႃးမႃးလဵပ်ႈႁဵၼ်းတူၺ်းၼႆ မၼ်းတေမီးဝႆႉၸုမ်းလူင် 5 ၸုမ်း- လူင်ပွင်ၸိုင်ႈ၊ တပ်ႉသိုၵ်း၊ သၽႃး၊ ပႃႇတီႇပၢႆးမိူင်း၊ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ။ ၼွၵ်ႈလႅၵ်ႈၼၼ်ႉ တေမီးထႅင်ႈႁူဝ်ၼႃႈၸၢဝ်းၶိူဝ်း ဢမ်ႇၼၼ်ၵေႃႈၽူႈတႅၼ်းၸၢဝ်းၶိူဝ်း ဢိၵ်ႇလူၺ်ႈပႃးတင်းၸိူဝ်းဢၼ်ထုၵ်ႇလႆႈ မွၵ်ႇႁွင်ႉမႃးၼႆၼၼ်ႉ မီး 7 ၸုမ်း။

ၵူၺ်းၵႃႈ ၼႂ်းၼင်ႇၼၼ် တႃႇ 5 ဢၼ်တၢင်းၼိူဝ်ၼၼ်ႉၵူၺ်း ပဵၼ်ဢၼ်လမ်ႇလွင်ႈသုတ်း၊ 5 ၸုမ်းၼႆႉ မိူဝ်ႈမႃးဢုပ်ႇၵုမ်ၵၼ်ၼၼ်ႉၸိုင် 1.ၵဵဝ်ႇလူၺ်ႈၾႅတ်ႊၻရႄႊ ၵဵဝ်ႇလူၺ်ႈမိူင်းႁူမ်ႈတုမ်။ 2.ၵဵဝ်ႇလူၺ်ႈၵၢၼ်ႁူမ်ႇလူမ်ႈ ၸိုင်ႈမိူင်း။ 3.ၵဵဝ်ႇလူၺ်ႈ တႃႇတေမူၼ်ႉမႄးၶဝ်ႈၶိုင်ၶိုၼ်းၵၢၼ်ႁူမ်ႇလူမ်ႈ ဢၼ်ဝႃႈ DDR သေယဝ်ႉ ပႃးထႅင်ႈတင်းၼႃႈၵၢၼ်လမ်ႇလွင်ႈၶိုၵ်ႉၶၵ်ႉၸိူဝ်းၼၼ်ႉၼႆၸိုင် တေလႆႈဢဝ်ၶေႃႈသဵင် ၼိုင်ႈၸုမ်းလႂ် 75% ၶိုၼ်ႈၼိူဝ်ၵမ်ႉထႅမ်။ လိူဝ်ၼၼ်ႉသမ်ႉ ပေႃးဝႃႈၵူၼ်းၶိုၼ်ႈပၢင်ၵုမ်တင်းသဵင်ႈၵေႃႈ တေလႆႈၵမ်ႉထႅမ်ၸွမ်း 75% ၶိုၼ်ႈၼိူဝ်ၸင်ႇတေႁပ်ႉႁွင်းမၵ်းမၼ်ႈလႆႈ မီးဝႆႉၶေႃႈတူၵ်းလူင်းၸိူင်ႉၼၼ်။

ပေႃးဢဝ် Framework ဢၼ်ၼႆႉဝႃႈၸိုင် မၼ်းဢမ်ႇၸႂ်ႈပိူင်ဢၼ် မီး 15% ၊ 20% ၊ 99% တေဢမ်ႇမီး၊ မၼ်းၵူၺ်းတေမီး 100% လႄႈ 0% ၊ ၵွပ်ႈပိူဝ်ႈဝႃႈမၼ်းယူႇၸွမ်းၶေႃႈၸီႉသင်ႇၸွမ်ပွင်သိုၵ်းၵမ်းသိုဝ်ႈ၊ ႁဵတ်းလႄႈဢမ်ႇႁဵတ်း တေမီး 2 ဢၼ်ၵူၺ်း၊ တီႈၼႆႈမိူၼ်တင်းဝႃႈ တပ်ႉမတေႃႇၼႆႉမီးဝႆႉဢႃႇၼႃႇဝီႊတူဝ်ႊ (ဢႃႇၼႃႇသၢၼ်ၶတ်း) ။ မိူၼ်ၼၼ်ၼင်ႇၵဝ်ႇ လူင်ပွင်ၸိုင်ႈၵေႃႈ ၸၢင်ႈပဵၼ်ၸိူင်ႉၼၼ်လႆႈ။
ပေႃးဝႃႈယူႇတူၺ်းၾၢႆႇၸၢဝ်းၶိူဝ်းၼႆ ၸၢဝ်းၶိူဝ်းယိပ်းၵွင်ႈၵၢင်ႇၵေႃႈ သင်ၸိူဝ်ႉဝႃႈတင်း 21 ၸုမ်းၺီႇမႃးပႃးၽွမ်ႉ ႁူမ်ႈၵၼ်ၼႆၸိုင် ၶၵ်ႉၵၢၼ်ဢၼ်လႂ်ဢမ်ႇဝႃႈ ႁဝ်းတိုၼ်းဢမ်ႇၽွမ်ႉ ဢမ်ႇၼၼ်ၵေႃႈႁဝ်းတိုၼ်းၽွမ်ႉဢိူဝ်ႈၼႆ ပေႃးဢွၵ်ႇလႆႈၶေႃႈလဵဝ်သဵင်လဵဝ်ၵၼ်ၸိူဝ်းၼႆႉ တီႈဢၼ်လၢႆးတၢင်း NCA ဢၼ်ပႆယၢင်ႈယူႇၼႆႉ တေၶတ်းၶၢၼ်ႉလႆႈတေႃႇလူင်ပွင်ၸိုင်ႈလႄႈ တပ်ႉသိုၵ်းယူႇ ႁဝ်းႁၼ်ထိုင်ၸိူင်ႉၼၼ်။

ၵူၺ်းၵႃႈတႃႇတေပဵၼ်မႃး ၸုမ်းၸၢဝ်းၶိူဝ်းတင်းသဵင်ႈၺီႇမႃးပႃးၽွမ်ႉၵၼ် ဢၼ်ဝႃႈၼၼ်ႉ ဢွၼ်တၢင်းသုတ်းတႄႉ ၼႂ်းၸုမ်းၸၢဝ်းၶိူဝ်းဢၼ်လဵဝ်ၵၼ်ၵူၺ်းၵေႃႈ သမ်ႉတေလႆႈႁႂ်ႈမၼ်းပဵၼ်မႃးၶေႃႈလဵဝ်သဵင်လဵဝ်ၵၼ် ဢွၼ်တၢင်းၵွၼ်ႇ။ မိူၼ်ၸိူင်ႉၼင်ႇပိူဝ်ႈတႃႇၸၢဝ်းၶိူဝ်းတႆးၼႆၵွၼ်ႇ ယူႇတီႈ RCSS မီးသုၼ်ႇတႃႇတေၸတ်းႁဵတ်း ပၢင်ၵုမ် ၸၼ်ႉၸိူဝ်ႉၸၢတ်ႈၸိုင်ႈမိူင်း ဝႃႈၼႆသေတႃႉၵေႃႈ တႃႇမၼ်းတေႁုပ်ႈႁႃႁႂ်ႈပေႃးလႆႈမႃးၶေႃႈၽွမ်ႉၸႂ် ၸၢဝ်းၶိူဝ်းတႆးတင်းမူတ်းတင်းသဵင်ႈဢၼ်ဝႃႈၼၼ်ႉ ၸွင်ႇတေပဵၼ်လႆႈ။

တီႈၼႂ်းၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဢၼ် RCSS ၵေႃႈၶဝ်ႈပႃးဝႆႉၼၼ်ႉ တေမီးတပ်ႉ၊ ပႃႇတီႇ၊ CSO ၊ လိူဝ်ၼၼ်ႉတေမီးတူဝ်တႅၼ်းၸၢဝ်းၶိူဝ်း ၽူႈထုၵ်ႇၶဝ်ႈႁူမ်ႈပႃး၊ မီးယူႇ 5 တွၼ်ႈ 5 ၵၼ်၊ ၼႂ်း 5 တွၼ်ႈ 5 ၵၼ် ၸုမ်းၸၢဝ်းၶိူဝ်းတႆးဢၼ်လဵဝ်ၵၼ်ၼၼ်ႉ ႁႂ်ႈပေႃးၶိုင်သၢင်ႈႁၢင်ႈပွင် ၶဝ်ႈဢွၵ်ႇမူၼ်ႉမႄးၸူးၵၼ်သေ ဢွၵ်ႇမႃးလႆႈၶေႃႈလဵဝ်သဵင်လဵဝ်ၵၼ် ဢၼ်ဝႃႈၼၼ်ႉ ၵိုင်ႉၵၢင်ႉငၢႆႈငၢႆႈတႄႉတေဢမ်ႇပဵၼ်လႆႈ၊ မၼ်းပဵၼ်ၸိူင်ႉၼႆ။

ၸင်ႇဝႃႈၵူႈၸုမ်းၸၢဝ်းၶိူဝ်းမႅၵ်ႇၵွင်ႈၶဝ်ၵေႃႈ တေလႆႈၶိုၼ်းသုတ်ႉႁႃၶဝ်ႈၸူး ပႃႇတီႇပၢႆးမိူင်းၽႂ်မၼ်း၊ ပႃးတင်း CSO ၽႂ်မၼ်းယူႇ။ ၼင်ႇႁိုဝ်ၸုမ်းမႅၵ်ႇၵွင်ႈၸၢဝ်းၶိူဝ်း 21 ၸုမ်း တေပဵၼ်မႃးၶေႃႈလဵဝ်သဵင်လဵဝ်ၵၼ် ဢၼ်ဝႃႈၼၼ်ႉ တေယၢပ်ႇယူႇတႄႉတႄႉ။ ၵူၺ်းၵႃႈ ၸူဝ်ႈပႆႇႁႃလဵဝ်ႈၶေႃႈလဵဝ်သဵင်လဵဝ်ၵၼ် ၼႂ်းၸုမ်းၸၢဝ်းၶိူဝ်း 21 ၸုမ်းၼႆၸိုင် တႃႇတေၶတ်းၶၢၼ်ႉၵူႈၶဵင်ႇလႆႈၾၢႆႇလူင်ပွင်ၸိုင်ႈလႄႈ ၾၢႆႇတပ်ႉမတေႃႇသိုၵ်းမၢၼ်ႈဢၼ်ဝႃႈၼၼ်ႉ တိုၼ်းတေဢမ်ႇငၢႆႈလႃးလႃး ဢၼ်ဝႃႈၼၼ်ႉတႄႉ ႁဝ်းၶႃႈထတ်းႁၼ်ၸိူင်ႉၼင်ႇၼႆသေ ယွၼ်းၾၢၵ်ႇထိုင်ပေႃႈမႄႈၵူၼ်းမိူင်း ႁႂ်ႈၸဵဝ်းႁႃလွင်ႈၽွမ်ႉႁူမ်ႈပဵင်းသဵင်ပဵင်းပၢၵ်ႇၵၼ်ၵူႈၵေႃႉၵူႈၵူၼ်း ၵူႈဝၢၼ်ႈၵူႈမိူင်းၽႂ်မၼ်းသေၵမ်းၼႆ ႁဝ်းၶႃႈမုင်ႈမွင်းၼင်ႇၼႆသေ ၶွတ်ႇယွတ်ႈပၢႆၵႂၢမ်းတီႈၼႆႈၶႃႈ။