ၼႂ်းလုၵ်ႈလိူၼ်သႅပ်ႊထႅမ်ႊၿိူဝ်ႊ ပီ 2018 ၼႆႉ ၵဵဝ်ႇၵပ်းၵၢၼ်ၽွမ်ႉႁူမ်ႈသေ ဢၼ်လႆႈႁၼ်လၢၵ်ႇလၢႆး မီးယူႇလၢႆဢၼ်- (1) ၽူႈၶဵၼ်လူင် ၽူႈၼမ်းမိူင်းၶူဝ်ႊရီႊယိူဝ်းႁွင်ႇ တင်းမိူင်းၶူဝ်ႊရီႊယိူဝ်းၸၢၼ်း ႁူပ်ႉၵၼ်ၵမ်းထူၼ်ႈသၢမ် ၊ (2) ၽူႈၼမ်းၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇ လူင်းလၢႆးမိုဝ်းၵိုတ်းတိုၵ်း ႁူပ်ႉဢုပ်ႇၵၼ်တီႈ ဝဵင်းၵဵင်းမႂ်ႇၼၼ်ႉ တူၵ်ႇလၢတ်ႈဝႃႈ ၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇ တၵ်းလႆႈႁႃၶေႃႈဢၼ်မိူၼ်ၵၼ် သေႁႃလၢႆးၽွမ်ႉၵၼ်သၢင်ႈလွင်ႈငမ်းယဵၼ်။

ၶေႃႈတီႈ (1) – မိူဝ်ႈဝၼ်းတီႈ 17 – 19/9/2018 ၼႆႉ မိသ်ႉသတိူဝ်ႊ မုၼ်ႊၵျႄးဢိၼ်ႊ ၽူႈၼမ်းမိူင်းၶူဝ်ႊရီႊယိူဝ်ႊၸၢၼ်း တင်းၵူၼ်းၸွမ်း မွၵ်ႈ 200 ၵေႃႉ ဢွၵ်ႇၶၢဝ်းတၢင်းၵႂႃႇ မိူင်းၶူဝ်ႊရီႊယိူဝ်ႊႁွင်ႇသေ ၵႂႃႇႁူပ်ႉထူပ်း ၽူႈၼမ်းမိသ်ႉသတိူဝ်ႊၶိမ်ႊၵျူင်ႊဢိုၼ်ႊ ။ ၶဝ်သွင်ၸဝ်ႈႁူပ်ႉၵၼ်ၼႆႉ ၼိုင်ႈ-တႃႇယႃႉပႅတ်ႈၶိူင်ႈၵွင်ႈ လူင်ၽီတၢႆႁုင် မၢၵ်ႇၼိဝ်ႊၶလီႊယိူဝ်ႊ ၊ သွင်- ယိူင်းဢၢၼ်းတႃႇပူၵ်းပွင် ၵူၼ်းမိူင်းလႆႈယူႇသႃႇၵတ်းယဵၼ်၊ လႆႈၵႃႉ လႆႈၶၢႆတေႃႇၵၼ်သေ ႁူမ်ႈပူၵ်းပွင်ဝၢၼ်ႈမိူင်းၶိုၼ်ႈယႂ်ႇမႂ်ႇသုင် – ဝႃႈၼႆ။

ၶေႃႈတီႈ (2) – မိူဝ်ႈႁူဝ်လိူၼ်သႅပ်ႊထိမ်ႊၿိူဝ်ႊ ပူၼ်ႉမႃးၼႆႉ ၸုမ်းယိပ်းၵွင်ႈၵၢင်ႇ သိပ်းၸုမ်း ႁူပ်ႉဢုပ်ႇၵၼ်တီႈၵဵင်းမႂ်ႇ။

တီႈပၢင်ၵုမ်ၼၼ်ႉ ၸဝ်ႈသိုၵ်းလူင်ၸၢႆးငိုၼ်း လၢတ်ႈဝႃႈ – “ပေႃးမႃးတူၺ်းငဝ်းလၢႆးမၼ်းတေႃႈလဵဝ် တူၺ်းၾၢႆႇႁဝ်းၶႃႈ EAOs ၼႆႉ ပေႃးဢဝ်တၢင်းၵၢၼ်ဝႃႈမၼ်းတေမီး 20 ၸုမ်း။ ဢၼ်တိုၵ်ႉမၵ်းမၼ်ႈ ယူႇၼႆႉ ၼႂ်းၵႄႈ 20 ၸုမ်းၼႆႉ ႁဝ်းၶႃႈတိုၵ်ႉမီး 10 ၸုမ်း ၶဝ်ႈမႃးၼႂ်းၵႄႈတူင်ႇဝူင်း NCA သေ လႆႈမႃးဢုပ်ႇ ။ ႁဝ်းၶႃႈတိုၼ်းမီးယိူင်းဢၢၼ်းဝႆႉဝႃႈ တႃႇတေၵႂႃႇတၢင်းၼႃႈ မၼ်း တေလႆႈပႃးတင်းမူတ်း၊ ပေႃးႁဝ်းၶႃႈၵႂႃႇတၢင်းၼႃႈသေ ၸိူဝ်းၶဝ်သမ်ႉဢမ်ႇပႃးမႃးတၢင်းလင်ၸိုင် မၼ်းတေယၢပ်ႇ။ ဢမ်ႇပႃးသဵင်ၶဝ် ဢမ်ႇပႃးၵၢင်ၸႂ်ၶဝ် ၼႆ မၼ်းဢမ်ႇပဵၼ်လႆႈ- ဝႃႈၼႆ။

ၵွပ်ႈၼၼ်လႄႈ ၼႂ်းပၢင်ၵုမ်ၸုမ်းယိပ်းၵွင်ႈၵၢင်ႇၵိုတ်းတိုၵ်း ၼႂ်းဝၼ်းတီႈ 8-11/9/2018 တႅပ်းတတ်းပႃးဝႃႈ တေၶဝ်ႈႁႃ ၵူႈမူႇၵူႈၸုမ်း ပိူဝ်ႈတႃႇပဵၼ်ပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းၵိုတ်းတိုၵ်းဢမ်ႇၵိုတ်းတိုၵ်းတင်းသဵင်ႈ – ပိူဝ်ႈတႃႇႁႃလွၵ်းၸုၵ်းဢၼ်မိူၼ်ၵၼ် – ဝႃႈၼႆ။

ထိုင်မႃးဝၼ်းတီႈ 17 – 19/9/2018 ၸင်ႇသူင်ႇတူဝ်တႅၼ်း ၸုမ်းလူင်းလၢႆးမိုဝ်းၵိုတ်းတိုၵ်းNCA.S-EAO ၵႂႃႇ လၢႆႇၸႃႇ ငဝ်ႈငုၼ်းသိုၵ်းလွတ်ႈလႅဝ်းၶၢင် KIA ၊ သႅၼ်းၽူႈၼမ်း ၸုမ်းယၢင်းလႅင် KNPP ဢၼ်ပဵၼ်လုၵ်ႈၸုမ်း UNFC ၼၼ်ႉၵေႃႈၵႂႃႇႁူပ်ႉၸွမ်း။ ပၢင်ႁူပ်ႉထူပ်းၵၼ်သၢမ်ၾၢႆႇၼၼ်ႉ ႁႃတၢင်းတႃႇႁူပ်ႉၵၼ်ထႅင်ႈ၊ ပိူဝ်ႇတႃႇ သၢၼ်မိုဝ်းၵၼ်ႁႂ်ႈလႆႈၼၼ်ႉ တေပၢၵ်ႈဝႆႉဢၼ်ဢမ်ႇမိူၼ်ၵၼ်၊ တေႁႃၶေႃႈသဵင် လွၵ်းၸုၵ်းၸိူဝ်းမိူၼ်ၵၼ် ပိူဝ်ႈတႃႇသၢၼ်မိုဝ်းမုင်ႈၸူးသဵၼ်ႈတၢင်းငမ်းယဵၼ် – ဝႃႈၼႆၼင်ႇၵဝ်ႇ။

လိူဝ်ၼၼ်ႉ ယင်းဝၢင်းၽႅၼ်ပႃး တႃႇႁဵတ်းပၢင်ၵုမ်လူင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ၵူႈမူႇၵူႈၸုမ်းလႆႈၶဝ်ႈပႃး ၼႆလူးၵွၼ်ႇ။

ၼၢႆႊႁူင်သႃ ၽူႈၼမ်းၸုမ်းယိပ်းၵွင်ႈၵၢင်ႇၸၢဝ်းမွၼ်း ၵေႃႈလၢတ်ႈဝႃႈ – ပၼ်ႁႃဢၼ်ပဵၼ်ယူႇတင်းသဵင်ႈ မီးသဵၼ်ႈတၢင်းဢၼ်လဵဝ် “တိုၼ်းတေလႆႈဢဝ်လၢႆးငမ်းယဵၼ်ႁူပ်ႉထူပ်းဢုပ်ႇဢူဝ်းၵၼ်” – ဝႃႈၼႆ။

ၵွပ်ႈၼၼ်လႄႈ တေႃႈၼင်ႇၸိူဝ်းဢမ်ႇၸႂ်ႈၶိူဝ်းၸဝ်ႈၵဝ်ႇ ၸဝ်ႈၵဝ်ႇယင်းၵႂႃႇႁဵတ်းၵေႃႉလႆႈ၊ ၽူႈၶဵၼ်ၸိူဝ်ႉၸၢတ်ႈၸဝ်ႈၵဝ်ႇ ၸဝ်ႈၵဝ်ႇယင်းၵႂႃႇတေႃႇၼႃႈႁူပ်ႉဢုပ်ႇ လူင်းလၢႆးမိုဝ်းၵိုတ်းတိုၵ်းၵၼ်လႆႈ ဢၼ်ပဵၼ်ၶိူဝ်းလဵဝ်ၵၼ် ၸိူဝ်ႉၸၢတ်ႈလဵဝ်ၵၼ် ႁဵတ်းသင်သမ်ႉ ဢမ်ႇဢုပ်ႇၵၼ်ႁႃတၢင်းဢွၵ်ႇ တႃႇၸိူဝ်ႉၸၢတ်ႈလႆႈ။

သင်ၸိူဝ်ႉၵူႈမူႇၵူႈၸုမ်း ၸိူဝ်းဢဝ်ၸိုဝ်ႈဝႃႈ ႁဵတ်းၵၢၼ်တႃႇၸိူဝ်ႉၸၢတ်ႈၼၼ်ႉ – ဝႆႉၸႂ်ဝႃႈ -ဢၼ်လမ်ႇလွင်ႈလိူဝ် ၵူၼ်းၼႂ်းၸိူဝ်ႉၸၢတ်ႈလႆႈလူႉတၢႆ ၊ ဢၼ်လမ်ႇလွင်ႈလိူဝ် ၵူၼ်းၼႂ်းၸိူဝ်ႉၸၢတ်ႈလႆႈတုၵ်ႉလႆႈယၢၵ်ႈ၊ ဢၼ်လမ်ႇလွင်ႈလိူဝ်ဢဵၼ်ႁႅင်းၼႂ်းၸိူဝ်ႉၸၢတ်ႈ လႆႈလူႉလႆႈသုမ်းဢမ်ႇမီးသင်ၼႆၸိုင် – ႁူႉတေႁူမ်ႈၵၼ် ၵႄႈလိတ်ႈလႆႈ ပၼ်ႁႃ ဢၼ်ၵိူတ်ႇၶိုၼ်ႈၸိူဝ်းၼႆႉၵူႈလွင်ႈယူႇ ။

ႁႂ်ႈသၢၼ်မိုဝ်းၵၼ် ပူၵ်းပွင်ၸိူဝ်ႉၸၢတ်ႈ ဝၢၼ်ႈမိူင်းၶိုၼ်ႈယႂ်ႇမႂ်ႇသုင်သေၵမ်း။

သဵင်ၶဝ်ႇႁွၵ်ႈ

ၶေႃႈမုလ်း – ၽူႈတွႆႇႁွၵ်ႈ မၢႆ 010, October 2018