ပလိၵ်ႈထႆး သူင်ႇတူဝ်ႁႅင်းၵၢၼ် မွပ်ႈပၼ်တၢင်းၸဝ်ႈၼႃႈတီႈ တၢင်းတႃႈၶီႈလဵၵ်း လႅၼ်လိၼ်တႆး – ထႆး တီႈၶူဝ်မိုတ်ႈၵိုဝ်း မၢႆ 2 တင်းမူတ်း 46 ၵေႃႉ ၵမ်ႈၼမ် ယူႇမိူင်းတႆးပွတ်းၸၢၼ်း။
ဝၼ်းတီႈ 28/06/2019 ယၢမ်းၵၢင်ၼႂ် 10:45 မူင်းၼၼ်ႉ ယူႇတီႈပလိၵ်ႈၾၢႆႇၵူတ်ႇထတ်းၵူၼ်းၶဝ်ႈမိူင်း(လဝၵ) ၾင်ႇထႆးသေ လႆႈသူင်ႇမွပ်ႈယိုၼ်ႈႁႅင်းၵၢၼ်ၵူၼ်းမိူင်းႁူမ်ႈတုမ်မၢၼ်ႈ ပၼ်တၢင်းၸဝ်ႈၼႃႈတီႈမၢၼ်ႈၾင်ႇတႃႇၶီႈလဵၵ်း တီႈၶူဝ်မိုတ်ႈၵိုဝ်း မၢႆ 2 ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ ႁႅင်းၵၢၼ်ဢၼ်ၺႃးတီႉသူင်ႇပွၵ်ႈမႃးၼႆႉ ၵမ်ႈၼမ် ဢမ်ႇမီးဝတ်းဝႂ် ။ ပဵၼ်ဢၼ်လၵ်ႉၶဝ်ႈမိူင်းထႆး တႃႇႁဵတ်းၵၢၼ် ဝႃႈၼႆ။
ႁႅင်းၵၢၼ်ယၢၼ်မိူင်း 46 ၵေႃႉ ဢၼ်လႆႈသူင်ႇပွၵ်ႈတၢင်းၾင်ႇတႃႈၶီႈလဵၵ်းၼႆႉ ပဵၼ်ၽူႈၸၢႆး 17 ၵေႃႉ၊ ၽူႈယိင်း 26 ၵေႃႉ လႄႈ လုၵ်ႈဢွၼ်ႇ 3 ၵေႃႉ။ ၼႂ်း 46 ၵေႃႉ ၼၼ်ႉ တႃႇ 32 ၵေႃႉ ယူႇတၢင်းမိူင်းတႆးပွတ်းၸၢၼ်း ဝႃႈၼႆ။
တႄႇဢဝ်ႁူဝ်ပီ 2019 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 1 မႃး ထိုင် ဝၼ်းတီႈ 28 လိူၼ်ၵျုၼ်ႊ 2019 ၼႆႉ ႁႅင်းၵၢၼ်မိူင်းႁူမ်ႈ တုမ် ဢၼ်လႆႈသူင်ႇပွၵ်ႈမႃးတၢင်းလႅၼ်လိၼ်တႆး – ထႆး တၢင်းၾင်ႇတႃႈၶီႈလဵၵ်းၼႆႉ တင်းမူတ်း မီးၵႂႃႇယဝ်ႉ 1,096 ၵေႃႉ။ ၽူႈၸၢႆး 699 ၵေႃႉ၊ ၽူယိင်း 361 ၵေႃႉလႄႈ လုၵ်ႈဢွၼ်ႇ 36 ၵေႃႉ ဝႃႈၼႆ။
ၶေႃႈမုလ်း – Tachileik News Agency
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ