ႁႅင်းၵၢၼ်ယၢၼ်မိူင်း ဢၼ်လၵ်ႉၶဝ်ႈမိူင်းထႆး ႁဵတ်းၵၢၼ်ဝႆႉၼၼ်ႉ ၺႃးပလိၵ်ႈထႆး တီႉၺွပ်းၵုမ်း ၶင်တူဝ်သေ လႆႈသူင်ႇ ပွၵ်ႈတၢင်းလႅၼ်လိၼ် တႆး – ထႆး တီႈတႃႈၶီႈလဵၵ်းၼႆႉ မီးၵႂႃႇ 1,046 ၵေႃႉယဝ်ႉ ဝႃႈၼႆ။
ဝၼ်းတီႈ 24/6/2019 ယၢမ်းၵၢင်ၶမ်ႈ ယူႇတီႈပလိၵ်ႈထႆး လႆႈသူင်ႇမွပ်ႈတူဝ် ႁႅင်းၵၢၼ် လၵ်ႉၶဝ်ႈမိူင်းထႆးၼၼ်ႉ ပၼ်ၸဝ်ႈ ၼႃႈတီႈ တၢင်းၾင်ႇတႃႈၶီႈလဵၵ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တင်းမူတ်း 96 ၵေႃႉ ဝႃႈၼႆ။
ႁႅင်းၵၢၼ်ယၢၼ်မိူင်း 96 ၵေႃႉ ပဵၼ် ၽူႈၸၢႆး 55 ၵေႃႉ၊ ၽူႈယိင်း 40 ၵေႃႉလႄႈ လုၵ်ႈဢွၼ်ႇ 1 ၵေႃႉ။ တေႃႈလဵဝ် ႁႅင်းၵၢၼ် ယၢၼ်မိူင်းၸိူဝ်းၼႆႉ မိူဝ်းယူႇသဝ်းဝႆႉတီႈဝတ်ႉမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းၶဝ် တေၵူတ်ႇထတ်းသေ သူင်ႇပွၵ်ႈႁိူၼ်းယေးၽႂ်မၼ်းၶိုၼ်း။ ႁႅင်း ၵၢၼ်ယၢၼ် မိူင်း ဢၼ်ၺႃးပလိၵ်ႈထႆး တီႉၺွပ်းသူင်ႇတူဝ်ပွၵ်ႈမႃးၼၼ်ႉ ယွၼ်ႉဝတ်းဝႂ်ဢမ်ႇတဵမ်ထူၼ်ႈၵၼ်၊ ဝႂ်ႁဵတ်းၵၢၼ် မူတ်းဢႃ ယု၊ ဢမ်ႇမီးဝတ်းဝႂ်ၵၼ်၊ ဢွၵ်ႇၼွၵ်ႈပိုၼ်ႉတီႈ ဢၼ်မၵ်းတတ်းဝႆႉ ၸဵမ်ၸိူဝ်းၼႆႉ။
တႄႇဢဝ် လိူၼ်ၵျႅၼ်ႊၼိဝ်ႊရီႊ 2019 မႃး တေႃႇထိုင် ၼႂ်းလိူၼ်ၵျုၼ်ႊၼႆႉ ႁႅင်းၵၢၼ်ယၢၼ်မိူင်း ဢၼ်ထုၵ်ႇ သူင်ႇတူဝ်ပွၵ်ႈ တၢင်းတႃႈၶီႈလဵၵ်းပဵၼ် ၽူႈၸၢႆး 679 ၵေႃႉ၊ ၽူႈယိင်း 344 ၵေႃႉလႄႈ လုၵ်ႈဢွၼ်ႇ 33 ၵေႃႉ ႁူမ်ႈၵၼ် တင်းမူတ်း 1,046 ၵေႃႉ။
ၶေႃႈမုလ်း – kanbawzatainews
