ၶွမ်ႊပၼီႊမႂ်ႇ တႄႇၶုတ်းထၢၼ်ႇႁိၼ်တီႈမႂ်ႇထႅင်ႈ ၼႂ်းၸႄႈဝဵင်းမိူင်းၵိုင်

သင်ၶၸဝ်ႈ ၸႄႈဝဵင်းမိူင်းၵိုင် ႁူမ်ႈၵၼ်ၵႂႃႇလဵပ်ႈႁဵၼ်းတူၺ်း ဢွင်ႈတီႈမေႃႇထၢၼ်ႇႁိၼ် ၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃး ၼၼ်ႉ ထူပ်းႁၼ်ၶွမ်ႊမၼီႊ ၶွင်ဢူးဢၢႆႈသျူဝ်ႇ(ဢူးဢၢႆႈၶဵဝ်) တႄႇၶုတ်းတီႈမႂ်ႇထႅင်ႈ 2 လုၵ်း ဝႃႈၼႆ။

ဝၼ်းတီႈ 14/06/2019 သင်ၶၸဝ်ႈမိူင်းၵိုင် လႆႈၵႂႃႇလဵပ်ႈႁဵၼ်းတူၺ်း တီႈဢိူင်ႇဝၢၼ်ႈယၢတ်ႇ ၶၢမ်းၼႃး ၸႄႈ ဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ လႆႈႁၼ်ၶွမ်ႊပၼီႊၶွင် လုင်းဢၢႆႈသျူဝ်ႇ တႄႇၶုတ်းထၢၼ်ႇႁိၼ် တီႈမႂ်ႇထႅင်ႈ 2 လုၵ်း ယၢၼ်ၵႆမေႃႇထၢၼ်ႇႁိၼ် ဢၼ်ၵဝ်ႇ မွၵ်ႈ 200-300 မဵတ်ႉ(မီႇတိူဝ်ႇ) မီးၾၢႆႇတၢင်းၸဵင်ႇၸၢၼ်းဝၼ်းဢွၵ်ႇ ဝႃႈၼႆ။

ၸဝ်ႈၶူး သေႃးတေႇယ မိူင်းၵိုင် လုၵ်ႈႁဵၼ်းၸၼ်ႉၸွမ်မႁႃၸုလႃးလူင်းၵွၼ်း Ph.D မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ“ ႁဝ်းသင်ၶၸဝ်ႈ လႆႈၵႂႃႇတူၺ်းမႃးထႅင်ႈၵမ်းၼိုင်ႈ လုင်းဢၢႆႈသျူဝ်ႇၶဝ် တေႃႈလဵဝ်ၶဝ်ၶုတ်းထႅင်ႈတီႈမႂ်ႇ။ မီးၾၢႆႇၸဵင်ႇၸၢၼ်း ဝၼ်းဢွၵ်ႇ ဢၼ်ၶွမ်ႊပၼီႊပျေႉဢွင်ႇႁဵင်းၶဝ်ၶုတ်းဝႆႉၼၼ်ႉ တေယၢၼ်ၵႆၵၼ် မွၵ်ႈ 200-300 မဵတ်ႉ။ ၵူၺ်းၵႃႈ ဢၼ် ၶဝ် ၵႂႃႇၶုတ်းတီႈမႂ်ႇၼၼ်ႉ တေၵႂႃႇၶုတ်းမႅၼ်ႈတီႈႁူဝ်ၼမ်ႉၶီတၢင် လီလီယဝ်ႉၵမ်းၼႆႉ။ တေႃႈလဵဝ် ပဵၼ်ၽွင်းၶဝ်ဢဝ်လိၼ် တၢင်းၼိူဝ်မၼ်းဢွၵ်ႇ။ 2 လုၵ်းလူင်ယႂ်ႇယႂ်ႇ ၶဝ်တိုၵ်ႉၶုတ်းလူင်းၵႂႃႇ မွၵ်ႈပဵင်းၵွၵ်းႁူဝ်ၼႆႉယဝ်ႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၵူၼ်းမိူင်းလႄႈသင်ၶလႆႈၵႂႃႇတွင်ႈထၢမ် တီႈၶွမ်ႊပၼီႊလႄႈ ၶွမ်ႊပၼီႊမႅၵ်ႇၶႃ တပ်ႉသိုၵ်းၸိုင်ႈ တႆးသေ လၢတ်ႈဝႃႈလႆႈဢၼုၺၢတ်ႈတီႈတပ်ႉသိုၵ်း RCSS ဝႃႈၼႆ။

“ႁဝ်းၸဝ်ႈၶဝ်ၵႂႃႇထၢမ်တူၺ်းၶွမ်ႊပၼီႊၶဝ်ၼႆႉ။ ၶဝ်ၵေႃႈၼႄးသႂ်ႇ တပ်ႉသိုၵ်းၸိုင်ႈတႆး RCSS ႁဝ်း ၸႂ်ႉႁဵတ်းဝႃႈၼႆ တိၵ်း တိၵ်း။ ၶဝ်ဢမ်ႇလၢတ်ႈၶိူဝ်း လိူင်ႈလႆႈဝႂ်တီႈလူင်ပွင်ၸိုင်ႈၼၼ်ႉသေဢိတ်းယဝ်ႉ။ ၵဵဝ်ႇၵပ်းလွင်ႈၼႆႉ ၸုမ်းသင်ၶၸဝ်ႈ ႁဝ်း ၶဝ် ႁၢင်ႈႁႅၼ်းဝႆႉ တေၵႂႃႇႁူပ်ႉထူပ်းတီႈလုမ်းၵပ်းသိုပ်ႇ RCSS တီႈတူၼ်ႈတီး။ ယဝ်ႉၵေႃႈ ပေႃးမီးတိုဝ်ႉတၢင်းတေၶိုၼ်ႈၵႂႃႇ ထူပ်းပႃး ၸဝ်ႈႁူဝ်ပဝ်ႈလူင်” ၸဝ်ႈၶူး သေႃးတေႇယ လၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းတွင်ႈထၢမ်ၵႂႃႇ တီႈလုမ်းၵပ်းသၢၼ် RCSS/SSA တီႈလုမ်းတူၼ်ႈ တီး။ ယူႇတီႈၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ/ ၸဝ်ႈၼႃႈတီႈ လုမ်းၵပ်းသၢၼ် RCSS တီႈတူၼ်ႈတီး တွပ်ႇလၢတ်ႈဝႃႈ “ႁဝ်းပႆႇလႆႈႁပ်ႉႁူႉ ၸွမ်းၶေႃႈမုလ်းလႄႈ ႁဝ်းပႆႇၸၢင်ႈတွပ်ႇ” ဝႃႈၼႆ။

လိူဝ်ၼၼ်ႉ ၵပ်းသိုပ်ႇတွင်ႈထၢမ်ၵႂႃႇတီႈ ၸဝ်ႈသိုၵ်း ၸၢႆးသႅင်မိူင်း ၽူႈၶၢၼ်ပၢၵ်ႇ RCSS ၵေႃႈ တွပ်ႇလၢတ်ႈဝႃႈ “လွင်ႈၼႆႉ ၶႃႈၶဝ် ပႆႇလႆႈႁပ်ႉႁူႉၸွမ်း” ဝႃႈၼႆ။

ၽူႈတွႆႇႁွၵ်ႈ လႆႈၵပ်းသိုပ်ႇတွင်ႈထၢမ်ၵႂႃႇတီႈၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 2 RCSS/SSA ၵေႃႈ တွပ်ႇလၢတ်ႈ ဝႃႈ “ လွင်ႈၼႆႉ ႁဝ်းဢမ်ႇလႆႈႁူႉၶေႃႈမုလ်းမၼ်းလီ၊ ယူႇတီႈ RCSS ႁဝ်းၶႃႈတႄႉ ၸွမ်းၼင်ႇၵၢင်ၸႂ်ၵူၼ်းမိူင်းၵူၺ်း။ သင် ၵူၼ်းမိူင်းဢမ်ႇၽွမ်ႉၵေႃႈ ႁဝ်းၶႃႈၵေႃႈဢမ်ႇၽွမ်ႉ၊ ၸွမ်းၼင်ႇပိူင်ႁဝ်းၶႃႈဝႃႈတႄႉ” ဝႃႈၼႆ။

လုင်းၸၢႆး ဢႃယု 50 ပီ ၵူၼ်းမိူင်းၵိုင်တႄႉ လၢတ်ႈဝႃႈ “ ၶွမ်ႊပၼီႊဢဝ်ၸိုဝ်ႈတပ်ႉသိုၵ်းၸိုင်ႈတႆးသေႁဵတ်းၼႆႉ မိူၼ်တင်း ယႃႉသရေႇၼႃႈတႃတပ်ႉသိုၵ်းတႆးႁဝ်း။ သင်ဝႃႈ တပ်ႉသိုၵ်း RCSS ဢမ်ႇလႆႈပၼ်ဢၼုၺၢတ်ႈႁဵတ်းတႄႉတႄႉၸိုင် ၶႂ်ႈႁႂ်ႈ ၾၢႆႇတပ်ႉသိုၵ်းႁဝ်း ၵူတ်ႇထတ်း ဢဝ်လိူင်ႈၶွမ်ႊပၼီႊၼႆႉယႂ်ႇယႂ်ႇၼမ်ၼမ်သေၵမ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 11/6/2019 ၼၼ်ႉ ယူႇတီႈသင်ၶၸဝ်ႈလႄႈ ၵူၼ်းမိူင်းၵိုင် ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ႁႄႉႁၢမ်ႈသၢၼ်ၶတ်း ၵူၼ်းၶုတ်းထၢၼ်ႇႁိၼ် တီႈၼႂ်းဢိူင်ႇဝၢၼ်ႈယၢတ်ႇ ၶၢမ်းၼႃး။ ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႃႈ –

“မူႇလႂ်ၸုမ်းလႂ် ၽႂ်သေဢမ်ႇဝႃႈ ပေႃးမႃးယႃႉ သၽႃႇဝၼမ်ႉလိၼ်ႁိၼ်ၽႃ တိူၵ်ႇႁႆႈသူၼ်ၼႃးလႄႈ မႃးၶုတ်းထၢၼ်ႇႁိၼ် တီႈမိူင်းၵိုင်ၼႆႉၸိုင် သင်ၶၸဝ်ႈလႄႈ ၵူၼ်းမိူင်း တိုၼ်းတေသၢၼ်ၶတ်းႁႄႉႁၢမ်ႈၵႂႃႇၶိူဝ်းၶိူဝ်းယႂ်းယႂ်း”။

“သင်ဝႃႈ ဢမ်ႇႁၼ်ထိုင်ၵၢင်ၸႂ် သင်ၶၸဝ်ႈလႄႈ ၵူၼ်းမိူင်းသေ သိုပ်ႇၶုတ်းထၢၼ်ႇႁိၼ်ၵႂႃႇပေႃးၼႆ သင်ၶၸဝ်ႈလႄႈ ၵူၼ်း မိူင်း တိုၼ်းတေဢမ်ႇယွမ်းႁပ်ႉလႆႈ တိုၼ်းတေယူႇၼႂ်းၶႂၢင်ႇပၵ်းပိူင်သေ သိုပ်ႇႁႄႉႁၢမ်ႈသၢၼ်ၶတ်းၵႂႃႇ” ၸဵမ်ၸိူဝ်းၼႆႉ။

မိူဝ်ႈဝၼ်းတီႈ 11/4/2017 ၼၼ်ႉ သင်ၶၸဝ်ႈတင်းၵူၼ်းမိူင်း ၼပ်ႉႁူဝ်ႁဵင် ႁူမ်ႈၵၼ် လုၵ်ႉႁိုၼ်ႇၼႄၵၢင်ၸႂ် သၢၼ်ၶတ်း လွင်ႈၶုတ်းထၢၼ်ႇႁိၼ် ၼႂ်းၸႄႈဝဵင်းမိူင်းၵိုင် ဢၼ်ၶွမ်ႊပၼီႊပျေႉဢွင်ႇႁဵင်းလႄႈ ႁဵင်းမဵတ်ႉတႃႇ လႆႈၶႂၢင်ႉၶုတ်း တီႈလူင်ပွင် ၸိုင်ႈၼေႇပျီႇတေႃႇ တႃႇတၢင်းၵႂၢင်ႈမွၵ်ႈ 1,000 ဢေႊၶိူဝ်ႊၼၼ်ႉ။ ယွၼ်ႉဝႃႈ တုမ်ႉတိူဝ်ႉသိင်ႇဝႅတ်ႉလွမ်ႉၵူၺ်းဢမ်ႇၵႃး တုမ်ႉတိူဝ်ႉပႃးပၢႆးယူႇလီၵူၼ်းမိူင်း ဝႃႈၼႆ။