လူင်ပွင်ၸိုင်ႈမိူင်းတႆး ၸတ်းႁဵတ်းပၢင်သပ်းၸႅင်ႈၶၢဝ်ႇ တႃႇၼႃႈၵၢၼ်တႃငၢၼ်း ပီတီႈ 3 လူင်ပွင်ၸိုင်ႈ။ ပၢင်သပ်းၸႅင်ႈ ၶၢဝ်ႇႁဵတ်းတီႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း မီးၽူႈသိုဝ်ႇၶၢဝ်ႇၶဝ်ႈႁူမ်ႈတင်းၼမ်။
ဝၼ်းတီႈ 14/06/2019 လူင်ပွင်ၸိုင်ႈမိူင်းတႆး ၸတ်းႁဵတ်းပၢင်သပ်းၸႅင်ႈၶၢဝ်ႇ တီႈႁူင်းႁေႃ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉဝႃႈ “ ၼႂ်းၸုမ်းလူင်ပွင်ၸိုင်ႈမိူင်းတႆးၼႆႉ မီးၽွင်းလူင်ၵေႃႉ ၼိုင်ႈ ၺႃးၸႅင်ႈၵႂၢမ်းပိုတ်ႇလိူင်ႈ/ ၸွႆႈတြႃး လွင်ႈဝႃႈ ၵိၼ်သူး/ ၵိၼ်လၢပ်ႈ ၵဵဝ်ႇၵပ်းလွင်ႈၼႆႉ ယူႇတီႈလူင်ပွင်ၸိုင်ႈမိူင်းတႆး မီးလွင်ႈႁၢင်ႈႁႅၼ်းၸိူင်ႉႁိုဝ်ၽွင်ႈ” ဝႃႈၼႆ။
ၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင်ၸႄႈမိူင်းတႆး တွပ်ႇလၢတ်ႈဝႃႈ “ လွင်ႈဢၼ်ဝႃႈ ၺႃးၸွႆးတြႃးၼၼ်ႉ ၸႂ်ႈယဝ်ႉ။ ၵူၺ်းၵႃႈ ဢၼ်ဝႃႈ လွင်ႈၵိၼ်သူး/ ၵိၼ်လၢပ်ႈၼၼ်ႉ မၼ်းဢမ်ႇၸႂ်ႈ။ လွင်ႈၼႆႉ ၶႃႈႁဝ်းတင်း ၶွမ်ႊမတီႊ ၽဵဝ်ႈမူၺ်ႉၵိၼ် သူး/ ၵိၼ်လၢပ်ႈ လႆႈၵူတ်ႇထတ်းတူၺ်းလီလီယဝ်ႉ။ ယူႇတီႈႁဝ်းၶႃႈတႄႉ ၸွမ်းၼင်ႇ ပိူင်ႁဵတ်းဢၼ်မီးဝႆႉၼၼ်ႉသေ ႁဝ်း ၶႃႈ လႆႈၶွတ်ႇၽွတ်ႈၸုမ်းၵူတ်ႇထတ်းသေ လႆႈၵူတ်ႇထတ်းယဝ်ႉတူဝ်ႈလီငၢမ်းယဝ်ႉ။ ဢမ်ႇႁိုင်ဢမ်ႇၼၢၼ်းၼႆႉ ႁဝ်းၶႃႈ တေပိုၼ်ၽၢဝ်ႇပဵၼ်တၢင်းၵၢၼ်ယူႇ လွင်ႈၼႆႉ။ လွင်ႈဢၼ်ဝႃႈ ႁဵတ်းၽိတ်း လၢတ်ႈၽိတ်းတႄႉ တေမီးယူႇ ၵဵဝ်ႇလူၺ်ႈလွင်ႈ ဝႃႈ ၵိၼ်သူး/ ၵိၼ်လၢပ်ႈၼၼ်ႉတႄႉဢမ်ႇၸႂ်ႈ။”ဝႃႈၼႆ။
မိူဝ်ႈဝၼ်းတီႈ 29 လိူၼ်မၢတ်ႉၶျ် 2019 ၼၼ်ႉ ဢူးၺီႇၺီႇထုၼ်း ၽူႈၼမ်းၼႂ်း Save the Inlay Lake လႆႈတၢင်ႇလိၵ်ႈ ႁႂ်ႈ ဢဝ်လိူင်ႈ ၸၢႆးသႅင်တိပ်ႉလူင် ၽွင်းလူင်ၾၢႆႇၾႆးၾႃႉလႄႈ ၶိူင်ႈၸၢၵ်ႈ (ၽွင်းလူင်ၾၢႆႇၵၢၼ်ငိုၼ်း ၵေႃႉၵဝ်ႇ) ၵႃႈၶဝ်ႈဢႅဝ်ႇ ယဵမ်ႈ ၼႂ်းၼွင်ႁၢႆးယႃႈ ဢမ်ႇႁဵတ်းၸွမ်းမၢႆမီႈတမ်းဝၢင်းဝႆႉ ဝႃႈၼႆ။
တီႈပၢင်သပ်းၸႅင်ႈၶၢဝ်ႇလူင်ပွင်ၸိုင်ႈမိူင်းတႆးၼၼ်ႉ ၸုမ်းၶၢဝ်ႇမႃးၶဝ်ႈႁူမ်ႈမွၵ်ႈ 20 ၸုမ်း။ ၾၢႆႇလူင်ပွင်ၸိုင်ႈ ပၼ်ဢၼု ၺၢတ်ႈၼၵ်ႉၶၢဝ်ႇ 1 ၵေႃႉ တေလႆႈတင်ႈၵႂၢမ်းထၢမ် 3 ၶေႃႈၵူၺ်း။
