မႄႈထဝ်ႈ ပႃႈမူဝ်းပေး ဢႃယု 70 ပီပၢႆ ဢၼ်ၸွမ်းႁႃလုၵ်ႈလၢင်း ဢၼ်ၵႂႃႇႁဵတ်းၵၢၼ်ၼႂ်းမိူင်းထႆးသေ ၺႃးသူင်ႇတူဝ်ပွၵ်ႈ ၶိုၼ်းလႅၼ်လိၼ်တႆး-ထႆး တီႈလၢၼ်ႇ PB1 ၼၼ်ႉ တေႃႈလဵဝ် လႆႈႁပ်ႉတၢင်းၸွႆႈထႅမ် တေလႆႈၵႂႃႇယူႇသဝ်းတီႈႁူင်းႁပ်ႉ တူၺ်းထိုင်လူလွမ်ၵူၼ်းထဝ်ႈ တီႈတႃႈၶီႈလဵၵ်းယဝ်ႉ ဝႃႈၼႆ။
ဝၼ်းတီႈ 16/6/2019 ယူႇတီႈၽူႈမီးပုၼ်ႈၽွၼ်း ၵူၼ်းၼႂ်းတပ်ႉသိုၵ်ႉဝႃႉ လႆႈမႃးႁပ်ႉဢဝ် မႄႈထဝ်ႈမူဝ်းပေးဢႃယု 70 ပီပၢႆ တီႈလၢၼ်ႇဝႃႉPB1 ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈ တွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၼၼ်ႉသေ တေသူင်ႇမိူဝ်းယူႇသဝ်းတီႈႁူင်းလူ လွမ်ၵူၼ်းထဝ်ႈ တီႈဝဵင်းတႃႈၶီႈလဵၵ်းဝႃႈၼႆ။
ၸၢႆးၵေႃႇ ၽူႈမီးပုၼ်ႈၽွၼ်း တီႈလၢၼ်ႇသိုၵ်းဝႃႉ လၢတ်ႈတီႈၽူႈတွႆႇႁွၵ်ႈဝႃႈ “ ဢေႃႈၶႃႈ မႄႈထဝ်ႈ ပႃႈမူဝ်းပေး လႆႈႁပ်ႉၸွႆႈ ထႅမ် တီႈၽူႈယႂ်ႇၵူၼ်းလူင်ႁဝ်းယဝ်ႉၶႃႈ။ တေမိူဝ်းသူင်ႇပၼ်ထိုင် တီႈႁူင်းတူၺ်းထိုင်လူလွမ်လုမ်းလႃးၵူၼ်းထဝ်ႈတႃႈၶီႈ လဵၵ်းၼႆၶႃႈဢေႃႈ။ လႅပ်ႈဝၼ်း သွင်ဝၼ်းၼႆႉ တေၽႅဝ်ၵႂႃႇတႃႈၶီႈလဵၵ်းယဝ်ႉၶႃႈ” ဝႃႈၼႆ။
မႄႈထဝ်ႈပႃႈမူဝ်းပေး ဢႃယု 70 ပီၼႆႉ ပဵၼ်ၵူၼ်းၸႃတိ ဝဵင်းလႃႈသဵဝ်ႈ ပွၵ်ႉ 6 ၸိုင်ႈတႆးပွတ်းႁွင်ႇ ၸွမ်းႁႃလုၵ်ႈလၢင်းၼႂ်း မိူင်းထႆး။ မိူဝ်ႈဝၼ်းတီႈ 10/6/2019 ၼၼ်ႉ လႆႈထုၵ်ႇပလိၵ်ႈထႆး သူင်ႇတူဝ်ပွၵ်ႈတၢင်းလႅၼ်လိၼ်တႆး – ထႆး တီႈၼွင်ဢုၵ်း သေ မီးၵူၼ်းႁၼ်မႄႈထဝ်ႈသေ လႆႈသူင်ႇၶၢမ်ႈလႅၼ်လိၼ်မႃးယူႇသဝ်းဝႆႉတီႈလၢၼ်ႇဝႃႉ PB1 ႁိုင်မွၵ်ႈ 6 ဝၼ်း။
မႄႈထဝ်ႈ ပႃႈမူဝ်းပေးၼႆႉ ဢုပ်ႇလၢတ်ႈၵႂၢမ်းတႆးၼိူဝ်၊ တႆးထုင်ႉမၢဝ်း။ ၸဝ်ႈၵႃးတေဢဝ်မိူဝ်းသူင်ႇလႃႈသဵဝ်ႈၼႆၵေႃႈ ဢမ်ႇ ၽွမ်ႉ ဢုပ်ႇၵုမ်သိုဝ်ႇသၢၼ်ၵၼ်ဢမ်ႇပေႃးၶႂ်ႈပွင်ႇၸႂ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ