မႄႈထဝ်ႈ လႃႈသဵဝ်ႈ ၵေႃႉၼိုင်ႈ ၸွမ်းႁႃလုၵ်ႈလၢင်း ယၢမ်းလဵဝ်မီးတီႈလႅၼ်လိၼ်တႆး – ထႆး

မႄႈထဝ်ႈ ၵေႃႉၼိုင်ႈ ဢႃယု 70 ပီပၢႆ ၸွမ်းႁႃလုၵ်ႈလၢင်း ယၢမ်းလဵဝ်မီးဝႆႉတီႈလႅၼ်လိၼ် တႆး – ထႆး ယူႇဝႆႉ 3-4 ဝၼ်းယဝ်ႉ ပႆႇၸၢင်ႈၵႂႃႇတၢင်းလႂ်။

ဝၼ်းတီႈ 10/6/2019 မႃးၼႆႉ မႄႈထဝ်ႈ ၵေႃႉၼိုင်ႈ ၸိုဝ်ႈႁွင်ႉ ပႃႈမူဝ်းပေး ဢႃယု 70 ပီ ပဵၼ်ၵူၼ်းၸႃတိ ဝဵင်းလႃႈသဵဝ်ႈ ပွၵ်ႉ 6 ၸိုင်ႈတႆးပွတ်းႁွင်ႇ ၸွမ်းႁႃလုၵ်ႈလၢင်း ယၢမ်းလဵဝ်ယူႇဝႆႉတီႈလႅၼ်လိၼ် တႆး – ထႆး တီႈလၢၼ်ႉဝႃႉ PB1 ၵိင်ႇၽႄဝဵင်း ပုင်ႇ ပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။

ၸၢႆးၵေႃႇ ၽူႈမီးပုၼ်ႈၽွၼ်း ၸဝ်ႈၼႃႈတီႈလၢၼ်ႇသိုၵ်းဝႃႉ လၢတ်ႈတီႈၽူႈတွႆႇႁွၵ်ႈဝႃႈ “ မႄႈထဝ်ႈၼႆႉ မႃးမီးဝႆႉတီႈလၢၼ်ႇ ႁဝ်းၶႃႈ PB1 ၼႆႉ မီး 4 ဝၼ်းပႃးမိူဝ်ႈၼႆႉယဝ်ႉ။ ဢမ်ႇၶၢမ်ႇၵႂႃႇတၢင်းလႂ်။ မႄႈထဝ်ႈမူဝ်းပေးဝႃႈ လုၵ်ႈၸၢႆးမီးမိူင်းထႆးၼႆဝႃႇ။ လုၵ်ႈၸၢႆးၵေႃႈမၼ်းဢမ်ႇတွင်းဢမ်ႇလၢတ်ႈ။ လႆႈငိၼ်းဝႃႈ မီးၵူၼ်းတၢင်းၼွင်ဢုၵ်း ၾင်ႇထႆးၼၼ်ႉ လႆႈႁၼ်မႄႈပႃႈၼႆႉ သေ လႆႈႁပ်ႉသူင်ႇမႃး တင်းလၢၼ်ႇႁဝ်းၶႃႈ ၼႆႉ။ လႆႈငိၼ်းဝႃႈ ၾၢႆႇပလိၵ်ႈတေႃးမေႃးၶဝ်သူင်ႇပွၵ်ႈမႃးၼႆဝႃႇ။ လုၵ်ႉတီႈၵဵင်း မႆႇသေမႃး ၼႆၶႃႈ။ လႅပ်ႈတေၶိုၼ်ႈႁူင်းယႃဝႆႉ ႁိုဝ်ၵေႃႈဢမ်ႇႁူႉ ပႃးယႃႈယႃမႃးတင်းၼမ်ၶႃႈဢေႃႈ၊ ဝတ်းဝႂ်ပၢတ်ႊသပွတ်ႊ တၢင်းမိူင်းထႆး ဢမ်ႇႁၼ်ပႃးမႃးသင်” ဝႃႈၼႆ။

မႄႈထဝ်ႈၼႆႉ ဢုပ်ႇလၢတ်ႈၵႂၢမ်းတႆးၼိူဝ်၊ တႆးထုင်ႉမၢဝ်း။ ၸဝ်ႈၵႃးတေဢဝ်မိူဝ်းသူင်ႇလႃႈသဵဝ်ႈၼႆၵေႃႈ ဢမ်ႇၽွမ်ႉ။ ဢုပ်ႇၵုမ်သိုဝ်ႇသၢၼ်ၵၼ်ဢမ်ႇပေႃးၶႂ်ႈပွင်ႇၸႂ် ဝႃႈၼႆ။

ၸၢႆးၵေႃႇ သိုပ်ႇလၢတ်ႈဝႃႈ “ ၾၢၵ်ႇမွၵ်ႇထိုင် ပီႈၼွင်ႉၸိူဝ်ႉၶိူဝ်းလုၵ်ႈလၢင်း မႄႈထဝ်ႈၼႆႉၽွင်ႈၶႃႈ သင်ဝႃႈ ၽႂ်ႁူႉၸၵ်းမႄႈ ထဝ်ႈၼႆႉ ၶႅၼ်းတေႃႈပွင်ႇၶၢဝ်ႇပၼ်ၵၼ်ၶႅၼ်းတေႃႈမႃးႁပ်ႉဢဝ်ပွၵ်ႈမိူဝ်းသေၵမ်းၶႃႈ” ဝႃႈၼႆ။

မႄႈထဝ်ႈမူဝ်းပေးၼႆႉ ဢႃယုလႆႈ 70 ပီပၢႆ ပဵၼ်ၵူၼ်းၸႃတိ ဝဵင်းလႃႈသဵဝ်ႈ ပွၵ်ႉ 6 သင်ဝႃႈ ၽူႈလႂ် ၵေႃႉလႂ် ပဵၼ်ၸိူဝ်ႉၶိူဝ်းပီႈ ၼွင်ႉ လႄႈပဵၼ်ၵူၼ်းႁူႉၸၵ်းမႄႈထဝ်ႈၼႆႉၸိုင် ၶႅၼ်းတေႃႈၵပ်းသိုပ်ႇမၢႆၾူၼ်း ၸၢႆးၵေႃႇ ၽူႈမီးပုၼ်ႈၽွၼ်းၸဝ်ႈၼႃႈ တီႈ သိုၵ်းဝႃႉ တီႈလၢၼ်ႇ PB1 မၢႆၾူၼ်း 063-674-964-7 (ၾူၼ်းထႆး) ဝႃႈၼႆ။