ၵွင်ယုၵ်းယၵ်းလူင် မိူင်းဢိၼ်ႊတီႊယႃး တေသုင်လိူဝ် ႁူင်းၶုမ်ၵုတ်းလူင်တတ်ႉၶျ်မႁႃႊ ယဝ်ႉ

ၵွင်ယုၵ်းယၵ်းလူင် ၵႃႊသီႊပူရ်ႊ မိူင်းဢိၼ်ႊတီႊယႃး ၼၼ်ႉ သုင်ၶိုၼ်ႈမႃးၵူဝၼ်း ။ ပေႃးဝႃႈလူတ်ႉ ယုၵ်းယၵ်း လူင်မႃးထွၵ်ႇယုၵ်းယၵ်းယူႇၵူႈမိုဝ်ႉၵူႈဝၼ်းၸိုင် ပီ 2020 ၼႆႉတေသုင်လိူဝ် ႁူင်းၶုမ်ၵုတ်းလူင် တတ်ႉၶျ်မႁႃႊ  ယဝ်ႉ-ဝႃႈၼႆ။

ၵွင်ယုၵ်းယၵ်းလူင် ၵႃႊသီႊပူရ်ႊ ၼႆႉ မီးၾၢႆႇႁွင်ႇဝဵင်းလူင် ၼိဝ်ႊတေႊလီႊ   ၸေႈတွၼ်ႈ ၼိဝ်ႊတေႊလီႊ ၼႂ်းဢိၼ်ႊတီႊယႃး တွၼ်ႈၼိူဝ်။ တၢင်းၵႂၢင်ႈၵွင်ယုၵ်းယၵ်းၼႆႉမီးမွၵ်ႈ ပၢင်ႇပိတ်ႉမၢၵ်ႇၼင် 40 ပၢင်ႇတိတ်းၸပ်းၵၼ်ဝႆႉ။ တၢင်းသုင်မီးမွၵ်ႈ 213  ပေႇ(ထတ်း)။

ႁိူၼ်းသီၶၢဝ် တတ်ႉၶျ်မႁႃႊ ဢၼ်ပဵၼ် ၶုမ်ၵုတ်းလူင် မႁႃႊဢႅမ်ႊၽိူဝ်ႊရိူဝ်ႊ သႃႊၵျႃႇႁၼ်ႊ လႄႈမေးၼၢင်းမၼ်း မုမ်းတတ်ႉသ်ႉ မႁႃႊၼၼ်ႉသမ်ႉ တၢင်းသုင်မီး 239 ပေႇ(ထတ်း) မီးၾၢႆႇၸၢၼ်းဝဵင်းလူင် ၼိဝ်ႊတေႊလီႊ။  ပဵၼ်မဵတ်ႇမၢႆၾၢင်ႁၢင်ႈၸိုဝ်ႈသဵင်ယႂ်ႇ ဢၼ်ၸၼ်ၸႂ် ၽူႈတွင်ႈတဵဝ်းဢႅဝ်ႇယဵမ်ၶဝ် မႃးယဵမ်ႈမႃးလဵပ်ႈႁဵၼ်း။

ၵွင်ယုၵ်းယၵ်းၼၼ်ႉမိူဝ်ႈၵွၼ်ႇပဵၼ်တီႈလိၼ်ယၢၼ်း။ ၵူၼ်းမိူင်းတႄႇပႅတ်ႈယုၵ်းယၵ်းမႃးမိူဝ်ႈပီ 1984။ မိူဝ်ႈပီ 2002 ၼၼ်ႉ ယုၵ်းယၵ်းတဵမ်ပဵင်းၼႃႈလိၼ်။  ၵူၺ်းၵႃႈလူတ်ႉၵႃးယုၵ်းယၵ်း ၼပ်ႉႁူဝ်သိပ်းလမ်းၼႆႉ မႃးထွၵ်ႇယုၵ်းယၵ်း ၵူႈဝၼ်းလႄႈ ၵွင်ယုၵ်းယၵ်းလူင်ၼႆႉသုင်ၶိုၼ်ႈ ၼိုင်ႈပီမွၵ်ႈ 33 ပေႇ(ထတ်း) တေႃႇထိုင်ပီၼႆႉ တၢင်းသုင်မီးယူႇ 213 ပေႇယဝ်ႉ။ သင်ၸိူဝ်ႉယင်းမီးလူတ်ႉမႃးထွၵ်ႇမႃးပႅတ်ႈယုၵ်းယၵ်းယူႇတိၵ်းတိၵ်းၸိုင် ၼႂ်းပီ 2020 ၼႆႉ ၵွင်ယုၵ်းယၵ်းၼႆႉ ၸၢင်ႈသုင်လိူဝ် ၶုမ်ၵုတ်းလူင် တတ်ႉၶျ်မႁႃႊယဝ်ႉ  ၶၢဝ်ႇ The Sun ဢွၵ်ႇဝႆႉၼင်ႇၼႆ။

ၵူၼ်းသတ်းဢၼ်ပိုင်ႈဢိင်ၵွင်ယုၵ်းယၵ်းလူင်ၼႆႉသေ သိုပ်ႇသၢႆၸႂ် ႁႃၵိၼ်လဵင်ႉတွင်ႉၵေႃႈ မီးတင်းၼမ်တင်းလၢႆ။ လိူဝ်ၼၼ်ႉယင်းပဵၼ်တီႈ ၼူၵ်ႉၼူ မူမႃ မႃးၽႄႈၸိူဝ်ႉၽႄႈၽၼ်း ႁႃၵိၼ်လဵင်ႉတွင်ႉ။

ယွၼ်ႉပိူဝ်ႈၵွင်ယုၵ်းယၵ်းၼႆႉ သုင်ၶိုၼ်ႈၵူႈမိုဝ်ႉၵူႈဝၼ်းလႄႈ ၵူဝ်ၶိူင်ႈမိၼ် ႁႄႊလီႊၶွပ်ႊတႃႊ လူင်းၽႃႇၺႃး ၊ ထုၵ်ႇလီမီး သဝ်တုင်း ဢမ်ႇၼၼ် လၵ်းၾႆးပၼ်ၾၢင်ႉတီႈ ၸိၵ်းလွႆယုၵ်းယၵ်းယူႇၼႆ မိူဝ်ႈပီ 2018 ၵေႃႈ လုမ်းတြႃးမိူင်းဢိၼ်ႊတီႊယႃႊ ယင်းလႆႈပၼ်တၢင်းၶႆႈၸႂ်ယူႇ ဝႃႈၼႆ။

ၾၢႆႇၼိုင်ႈၵေႃႈ ၵွင်ယုၵ်းယၵ်းလူင်ၼၼ်ႉ ၾႆးၵႆႉၵႆႉမႆႈ။ ပေႃၾႆးမႆႈ ဢၢႆၵႂၼ်းမဵၼ်တူဝ်ႈဝၢၼ်ႈတူဝ်ႈမိူင်းသေ တုမ်ႉတိူဝ်ႉပၢႆးယူႇလီၵူၼ်းမိူင်း။ တုမ်ႉတိူဝ်ႉသိင်ႇဝႅတ်ႉလွမ်ႉလႄႈႁၢင်ႈၾၢင်ဝၢၼ်ႈမိူင်း ၶၢဝ်ႇ The Sun မိူင်း Britain ဢွၵ်ႇဝႆႉၼင်ႇၼႆ။