ရူတ်ႉတူႈ(ၵႃးမၢၼ်ႇလူင်ႇ) ဢၼ်လႅၼ်ႈမူႇၸေႊ – ဝဵင်းလိူဝ်ႇၼၼ်ႉ ပိၼ်ႈတူၵ်းတၢင်း တီႈႁိမ်းဝၢၼ်ႈတူင်ႈၶၢၼ် ၸႄႈဝဵင်း မူႇၸေႊ ၵူၼ်းၸွမ်းၵႃး တၢႆ 2 ၵေႃႉ၊ ၵူၼ်းဢွၵ်ႇတၢင်း မၢတ်ႇ 14 ၵေႃႉ။
ဝၼ်းတီႈ 14/6/2019 ယၢမ်းၵၢင်ၼႂ် မွၵ်ႈ 7 မူင်းၶိုင်ႈၼၼ်ႉ ရူတ်ႉတူႈ ဢၼ်မီးၸိုဝ်ႈဝႃႈ ၵူၼ်းမူႇၸေႊ(မူစယ်သူ) ဢၼ် ႁပ်ႉတေႃႉသူင်ႇၵူၼ်း ဝဵင်းလိူဝ်ႇ – မူႇၸေႊၼၼ်ႉ လႆႈပဵၼ်ၽေးဢုပၢတ်ႈသေ ပိၼ်ႈတူၵ်းတၢင်း တီႈႁိမ်းဝၢၼ်ႈတူင်ႈၶၢၼ် ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၼႂ်းၼၼ်ႉ ၵူၼ်းၸွမ်းၵႃး (စပယ်ယာ) 2 ၵေႃႉလႆႈလူႉတၢႆ။ ၵူၼ်းၶီႇမႃးၸွမ်း (ခရီးသည်) 14 ၵေႃႉ လႆႈမၢတ်ႇၸဵပ်း ဝႃႈၼႆ။
ဢူးတွင်းထုၼ်း ၸုမ်းၸွႆႈထႅမ် ၵရုၼႃႇ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၵႃးမၢၼ်ႇလူင်ႇ ဢၼ်ပိၼ်ႈၵႂႃႇၼၼ်ႉ ယွၼ်ႉႁေႃႈဝႆးသေ ဢမ်ႇၵုမ်းလႆႈလႄႈ လႆႈပိၼ်ႈၵႂႃႇ။ ၵူၼ်းၸွမ်းၵႃး လူႉတၢႆၸွမ်း 2 ၵေႃႉ၊ ၵူၼ်းၶီႇမႃးၸွမ်း လႆႈ မၢတ်ႇၸဵပ်း 14 ၵေႃႉ။ ၵူၺ်းၵႃႈ ၵူၼ်းမၢတ်ႇၸဵပ်း 14 ၵေႃႉၼၼ်ႉတႄႉ ဢမ်ႇထိုင်တီႈလႆႈမႆႈၸႂ် တေႃႈလဵဝ်တႄႉ လႆႈသူင်ႇယူတ်းယႃဝႆႉ တီႈႁူင်းယႃမူႇၸေႊဝႆႉယဝ်ႉ” ဝႃႈၼႆ။
“ဢွင်ႈတီႈဢၼ်ရူတ်ႉၵႃး ပိၼ်ႈတူၵ်းတၢင်းၼၼ်ႉ မိူဝ်ႈၵူႈပွၵ်ႈၵေႃႈၵႆႉယၢမ်းပဵၼ်ယူႇတႃႇသေႇ။ ယွၼ်ႉၼၼ်လႄႈ ၵူၼ်း ႁေႃႈၵႃးၵူႈၵေႃႉႁႂ်ႈဢွၼ်ၵၼ်လူတ်းယွမ်းလွင်ႈႁေႃႈဝႆးသေ ၶႅၼ်းတေႃႈ ဢွၼ်ၵၼ်ႁေႃႈလွႆးလွႆးတႃႉ” ဢူးတွင်းထုၼ်း လၢတ်ႈၼႄၼင်ႇ ၼႆ။
ၵဵဝ်ႇၵပ်းလူၺ်ႈလွင်ႈရူတ်ႉ ပိၼ်ႈတူၵ်းတၢင်းၼႆႉသေ ယူႇတီႈၽူႈမီးပုၼ်ႈၽွၼ်းပလိၵ်ႈ လႆႈႁွင်ႉဢဝ်ၵူၼ်း ႁေႃႈၵႃး ၵႂႃႇၵူတ်ႇ ထတ်း ထဵတ်ႈထၢမ်ဝႆႉယူႇ တီႈႁူင်းပလိၵ်ႈၸႄႈဝဵင်းမူႇၸေႊ ဝႃႈၼႆ။
