ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် တီႉလႆႈယႃႈမဝ်းၵမ် တႃႇၵႃႈၶၼ်ငိုၼ်း 4,140 သႅၼ်ပျႃး ၼႂ်းၸႄႈဝဵင်းမၢၼ်ႈပဵင်း ၸိုင်ႈတႆး ပွတ်းႁွင်ႇ။
ဝၼ်းတီႈ 12/06/2019 ယၢမ်းၵၢင်ၼႂ် 9 မူင်းၶိုင်ႈၼၼ်ႉ ပလိၵ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ်မၢၼ်ႈပဵင်း ၵူတ်ႇထတ်းရူတ်ႉၶိူင်ႈ လမ်းၼိုင်ႈ ၼႂ်းၸႄႈဝဵင်းမၢၼ်ႈပဵင်း ၸႄႈတွၼ်ႈမိူင်းမိတ်ႈ ၸိုင်ႈတႆးပွတ်းႁွင်ႇ။ ၵူတ်ႇထတ်းတီႉလႆႈ ယႃႈၾိၼ်ႇၽိူၵ်ႇ ဢၼ် သႂ်ႇၼႂ်းၵွၵ်းၵွၼ်ႈသီ(သပ်ႉပျႃႇ) 100 ၵွၼ်ႈၼမ်ႉၼၵ်း 1.1 ၵီႊလူဝ်ႊ (မႅၼ်ႈငိုၼ်း 220 သႅၼ်ပျႃး)။ ယႃႈမႃႉ WY သမ်ႉ 196,000 မဵတ်ႉ (မႅၼ်ႈ ၶၼ်ငိုၼ်း 3929 သႅၼ်ပျႃး) ဝႃႈၼႆ။
ၵဵဝ်ႇၵပ်းလွင်ႈၼႆႉ ပလိၵ်ႈပိုၼ်ၽၢဝ်ႇဝႃႈ တီႉလႆႈ ယႃႈမဝ်းၵမ်လႄႈ ရူတ်ႉၶိူင်ႈၵူၺ်း တူဝ်ၵူၼ်းတႄႉ ဢမ်ႇႁၼ်။ ယႃႈမဝ်း ၵမ်ၸိူဝ်းၼၼ်ႉ သႂ်ႇဝႆႉၼႂ်းထူင်ၸၢၼ်ႈ 2 ထူင်။ တေႃႈလဵဝ် ယူႇတီႈၾၢႆႇပလိၵ်ႈ လႆႈပိုတ်ႇလိူင်ႈ ဝႆႉတီႈႁူင်းပလိၵ်ႈၸႄႈ ဝဵင်းမၢၼ်ႈပဵင်းဝႆႉယဝ်ႉ ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 12/6/2019 ၼၼ်ႉၵေႃႈ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၶဝ်ႈၵူတ်ႇထတ်းႁိူၼ်းၵူၼ်းဝၢၼ်ႈ လင်ၼိုင်ႈ တီႈၼႂ်းပွၵ်ႉၵွင်းမၢၼ်ႈၼႃး/ တႃႇယႃႇၵူင်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ တီႉလႆႈၽူႈယိင်း ဢႃယု 28 ပီ ႁူမ်ႈလူၺ်ႈပႃးယႃႈမႃႉ 3,800 မဵတ်ႉ။ မိူဝ်ႈဝၼ်းတီႈ 11 ယၢမ်းၵၢင်ဝၼ်း 11 မူင်း သမ်ႉပလိၵ်ႈတီႉၺွပ်းလႆႈ ယႃႈမဝ်းၵမ် တီႈၽူႈၸၢႆးၵေႃႉၼိုင်ႈ ဢၼ်ၶီႇရူတ်ႉၶိူင်ႈမႃးတၢင်းဝၢၼ်ႈႁူဝ်ၶူဝ် ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇတီႉလႆႈပႃးယႃႈမႃႉ 39,890 မဵတ်ႉ၊ ၾူၼ်း 2 လုၵ်ႈ၊ ငိုၼ်းမၢၼ်ႈ 4 မိုၼ်ႇ ပျႃး ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈပၼ်တူတ်ႈတၢမ်ႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ