ႁႅင်းၵၢၼ်တႆး ၵေႃႉၼိုင်ႈ ပဵၼ်ၽူႈယိင်း ႁဵတ်းၵၢၼ်ႁိူၼ်း (မႄႈဝၢၼ်ႈ )တီႈၵဵင်းမႆႇ မိူင်းထႆး ဢဝ်ၸိူၵ်ႈၸုင်မႃ ၽႅၼ်ၶေႃးၸဝ်ႈ ၵဝ်ႇတၢႆ။

ဝၼ်းတီႈ 14/06/2019 ၼၢင်းၼုတ်း ဢႃယု 47 ပီ ပဵၼ်ၸၢဝ်းတႆး ႁဵတ်းၵၢၼ် မႄႈဝၢၼ်ႈ ဢဝ်ၸိူၵ်ႈၸုင်မႃ ၽႅၼ်ၶေႃးၶႃႈတူဝ်တၢႆ တီႈႁိူၼ်းၸဝ်ႈၵၢၼ် ဢၼ်မီးၼႂ်း ဢိူင်ႇသၼ်ပူးလိူၺ်ႊ ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႆႇ ၸိုင်ႈထႆးၼႆ သိုဝ်ၶၢဝ်ႇၵဵင်းမႆႇ ပိုၼ်ၽၢဝ်ႇ။

မႄႈလဵင်ႉ မၼ်းၼၢင်း လၢတ်ႈဝႃႈ “ ၼၢင်းၼုတ်းၼႆႉ မႃးႁဵတ်းၵၢၼ် တီႈႁိူၼ်းႁဝ်းႁိုင်ယဝ်ႉ မႃးၵၢင်ၼႂ်ၸဝ်ႉ ၵၢင်ၶမ်ႈသမ်ႉၶိုၼ်းပွၵ်ႈ ဝူင်ႈဝၢင်ႈၼႆႉႁၼ်မၼ်းၶီၶီငဝ်ငဝ်ဝႆႉ မၢင်ဝၼ်းၵေႃႈမႃးႁဵတ်းၵၢၼ် မၢင်ဝၼ်းၵေႃႈဢမ်ႇမႃး ” ဝႃႈၼႆ။

ၼၢင်းၼုတ်းၼႆႉ ပဵၼ်လုၵ်ႈမႄႈၽႂ် ပဵၼ်ၵူၼ်းမိူင်းလႂ်ၼႆ ပႆႇလႆႈႁူႉ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပေႃးဢဝ်ၸွမ်းမၢႆမီႈဝႃႈ ၵၢၼ်ၶႃႈႁႅမ်တူဝ် ၸဝ်ႈၵဝ်ႇတၢႆၶိုၼ်းၼႆႉ ဢမ်ႇမီးငိုၼ်းသၢႆႈယေႃႇတႅၼ်းသင် ယွၼ်ႉဝႃႈၶိုၼ်းႁဵတ်းတူဝ်ၸဝ်ႈၵဝ်ႇၵူၺ်း ၊ ဢၼ်မၼ်းၼၢင်း ၶႃႈတူဝ်တၢႆၵႂႃႇၼႆႉ ပဵၼ်ယွၼ်ႉလွင်ႈတၢင်းသင် ဢၼ်ဝႃႈၼၼ်ႉတႄႉဢမ်ႇလႆႈႁူႉ ၊ ၵူၺ်းၵႃႈၸိူင်ႉႁိုဝ်ၵေႃႈယဝ်ႉ ၽွင်းဢၼ်ႁဝ်း ၶႃႈၽၢတ်ႇယၢၼ်ႁိူၼ်းယေး သေယူႇသဝ်းၼႂ်းမိူင်းပိူၼ်ႈယူႇၼႆႉ ႁႂ်ႈႁဝ်းၶႃႈမေႃႁၵ်ႉၵၼ် မေႃၸွႆႈထႅမ်ၵၼ် မေႃပၼ်ႁႅင်း ၵၼ်ၶႃႈၼေႃ” ဝႃႈၼႆ။

ယၢမ်းလဵဝ်ယူႇတီႈၸဝ်ႈၼႃႈတီႈပလိၵ်ႈ ဢဝ် ၶၢပ်ႈတူဝ်မၼ်းၼၢင်း သူင်ႇႁူင်းယႃသူၼ်ၻွၵ်ႇ ပိူဝ်ႈႁႂ်ႈမေႃယႃ ၵူတ်ႇထတ်း တူၺ်း လွင်ႈ တၢင်းပိူင်ပဵၼ်ၵၢၼ်တၢႆသိုပ်ႇၵႂႃႇ ဝႃႈၼႆ။