ပလိၵ်ႈထႆး တီႉၺွပ်းႁႅင်းၵၢၼ်ယၢၼ်မိူင်း 22 ၵေႃႉ ဢၼ်လၵ်ႉၶဝ်ႈႁဵတ်းၵၢၼ်မိူင်းထႆး ဢမ်ႇၸွမ်းပၵ်းပိူင်မၢႆမီႈသေ ၶိုၼ်း မွပ်ႈပၼ် ၾၢႆႇၽူႈမီးပုၼ်ႈၽွၼ်း ၸႄႈဝဵင်းတႃႈၶီႈလဵၵ်း။

ဝၼ်းတီႈ 4/6/2019 ယၢမ်းဝၢႆးဝၼ်း 3 မူင်းၼၼ်ႉ ပလိၵ်ႈထႆး ၾၢႆႇၵူတ်ႇထတ်းၵူၼ်းၶဝ်ႈမိူင်း (လဝၵ) လႆႈသူင်ႇတူဝ်ႁႅင်း ၵၢၼ် မွပ်ႈပၼ်တၢင်းၾၢႆႇပလိၵ်ႈတႃႈၶီႈလဵၵ်း တင်းမူတ်း 22 ၵေႃႉ။ ၽူႈၸၢႆး 17 ၵေႃႉလႄႈ ၽူႈယိင်း 5 ၵေႃႉ။ ပၢင်မွပ်ႈ တူဝ်ႁႅင်းၵၢၼ်ၸတ်းတီႈၶူဝ်မိုတ်ႈၵိုဝ်း မၢႆ 2 မႄႈသၢႆ – တႃႈၶီႈလဵၵ်း လႅၼ်လိၼ်တႆး – ထႆး ဝႃႈၼႆ။

ႁႅင်းၵၢၼ်ယၢၼ်မိူင်းဢၼ်ထုၵ်ႇသူင်ႇတူဝ်ပွၵ်ႈႁိူၼ်းၶိုၼ်းၼၼ်ႉ ၵမ်ႈၼမ် ပၢတ်ႊသပွတ်ႊမူတ်းဢႃယု၊ ဢမ်ႇမီးဝႂ်ၶႂၢင်ႉ ႁဵတ်းၵၢၼ်၊ ၶၢမ်ႈပူၼ်ႉဢွင်ႈတီႈ ဢၼ်မၵ်းတတ်းဝႆႉလႄႈ ၸိုဝ်ႈပေႃႈ/မႄႈလဵင်ႉတီႈႁဵတ်းၵၢၼ် ပိူင်ႈၵၼ် ၸဵမ်ၸိူဝ်းၼႆႉ။

ယၢမ်းလဵဝ်ၼႆႉ ႁႅင်းၵၢၼ်ယၢၼ်မိူင်း ဢၼ်ၵႂႃႇႁဵတ်းၵၢၼ်ၼႂ်းၵဵင်းမႆႇ ၸိုင်ႈထႆး ၵႆႉၺႃးပလိၵ်ႈထႆး ၵူတ်ႇထတ်းထဵတ်ႈထၢမ်။ ယွၼ်ႉဝႃႈ ႁႅင်းၵၢၼ်ယၢၼ်မိူင်းၵမ်ႈၼမ် ဢမ်ႇမီးဝတ်းဝႂ်ၶႂၢင်ႉႁဵတ်းၵၢၼ်လႄႈ ပၢတ်ႊသပွတ်ႊတႃႇယူႇသဝ်း ၸဵမ်ၸိူဝ်းၼႆႉ။

ၼၢင်းယိင်းၵေႃႉၼိုင်ႈ ဢၼ်ပဵၼ်လၢမ်ႈ (ပိၼ်ႇၽႃသႃ) ပၼ်ႁႅင်းၵၢၼ်ယၢၼ်မိူင်း ၸိူဝ်းၺႃးတီႉၼၼ်ႉ လၢတ်ႈတီႈ ၽူႈတွႆႇ ႁွၵ်ႈဝႃႈ “ တေႃႈလဵဝ် ႁႅင်းၵၢၼ်ဢၼ်ၶဝ်ႈမႃးႁဵတ်းၵၢၼ်ၼႂ်းမိူင်းထႆးလူၺ်ႈ ဢမ်ႇပဵၼ်တၢင်းၵၢၼ် ထုၵ်ႇၸဝ်ႈၼႃႈတီႈ ပလိၵ်ႈ ထႆးတီႉၺွပ်းမီးတင်းၼမ်။ လုၵ်ႈဢွၼ်ႇဢႃယု ဢမ်ႇ တဵမ် 18 ပီ ၵေႃႈမီး။ သင်ဝႃႈ ၶဝ်ႈမႃးႁဵတ်းၵၢၼ်ၼႂ်းမိူင်းထႆးၼႆႉၸိုင် ႁႂ်ႈ ၶဝ်ႈမႃးလူၺ်ႈလၢႆးပဵၼ်တၢင်းၵၢၼ်။ ႁႂ်ႈမီးဝႂ်ၶႂၢင်ႉႁဵတ်းၵၢၼ်။ ယဝ်ႉၵေႃႈ ၸိုဝ်ႈပေႃႈ/မႄႈလဵင်ႉလႄႈ တီႈႁဵတ်းၵၢၼ်ႁဝ်းၼၼ်ႉ ႁႂ်ႈပဵၼ်တီႈလဵဝ်ၵၼ်/ မိူၼ်ၵၼ်” ဝႃႈၼႆ။

တႄႇဢဝ်ႁူဝ်ပီ 2019 ၼႆႉမႃး ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ဢၼ်လႆႈသူင်ႇတူဝ်ပွၵ်ႈ ႁိူၼ်းၶိုၼ်း တင်းမူတ်းမီး 893 ၵေႃႉ။ ၽူႈၸၢႆး 592 ၵေႃႉ၊ ၽူႈယိင်း 273 ၵေႃႉလႄႈ လုၵ်ႈဢွၼ်ႇ 31 ၵေႃႉယဝ်ႉ ဝႃႈၼႆ။