ပီႈၼွင်ႉတႆးၼႂ်းမိူင်းၵွၵ်ႇ ဢဵၼ်ႁႅင်း 60 ပၢႆ ၶဝ်ႈႁူမ်ႈ ႁူမ်ၸူမ်းပၢင်ပွႆးဝၼ်းၵိူတ်ႇ ၼၢင်းႁေႃၶမ်းထႆး ၼၢင်းၶၢင်းႁူဝ်ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ထူၼ်ႈ 10 ။
ဝၼ်းတီႈ 03/06/2019 ပဵၼ်ဝၼ်းၵိူတ်ႇ ၼၢင်းႁေႃၶမ်းထႆး လူင်ပွင်ၸိုင်ႈထႆးလႄႈ ဝၢင်းႁေႃၶမ်းထႆး ၸတ်းႁဵတ်းပၢင်ယုၵ်ႉယွင်ႈ ယွၼ်းသူးပၼ်ဝၼ်းၵိူတ်ႇ တီႈပၢင်ႇဝၢင်းႁေႃၶမ်းထႆး ၼႂ်းမိူင်းၵွၵ်ႇ ၸိုင်ႈထႆး။ ပီႈၼွင်ႉတႆးၼႂ်းမိူင်းၵွၵ်ႇ ဢၼ်မီးၸိုဝ်ႈထႆးဝႃႈ องค์กรไทใหญ่รักในหลวง ၵေႃႈၶဝ်ႈႁူမ်ႈဝၢင်းဢုပ်း မွၵ်ႇငိုၼ်းမွၵ်ႇၶမ်း ။
ၼၢင်းမႂ်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး ဢၼ်ၶဝ်ႁူမ်ႈတူင်ႉၼိုင် ၼႂ်းပၢင်ဝၼ်းၵိူတ်ႇ ၼၢင်းႁေႃၶမ်းလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢမ်ႇဝႃႈတေပဵၼ် ဝၼ်းၵိူတ်ႇၶုၼ်ႁေႃၶမ်း ႁိုဝ် ၼၢင်းႁေႃၶမ်းၵေႃႈ ႁဝ်းၶႃႈပီႈၼွင်ႉတႆးၼႂ်းမိူင်း ၵွၵ်ႇ ဢွၼ်ၵၼ်ၶဝ်ႈႁူမ်ႈတႃႇသေႇၶႃႈ ယွၼ်ႉဝႃႈႁဝ်းၶႃႈပီႈၼွင်ႉတႆး လႆႈမႃးပိုင်ႈႁူမ်ႈၽူၺ်း ႁဵတ်းၵိၼ်ႁႃၵိၼ်လဵင်ႉတွင်ႉ ၼိူဝ် ၽႅၼ်ႇလိၼ်မိူင်းထႆး ၵွပ်ႈၼၼ်လႄႈ ႁၼ်ထိုင်ဝႃႈ ႁဝ်းၶႃႈဢမ်ႇလီလိုမ်းၵုင်ႇမုၼ် ဢၼ်ႁဝ်းၶႃႈလႆႈမႃး ပိုင်ႈဢိင် ” ဝႃႈၼႆ။
မိူဝ်ႈဝၼ်းတီႈ 01/05/2019 ၼၼ်ႉ ၸဝ်ႈမုၼ်ယႂ်ႇၶုၼ်ႁေႃၶမ်းထႆး မႁႃဝၶျီရႃလူင်းၵွၼ်း ဢၼ်ၶိုၼ်ႈႁေႃ ၼႂ်းဝၼ်းတီႈ 4-6/5/2019 ၼၼ်ႉ ပိုၼ်ၽၢဝ်ႇပဵၼ်တၢင်းၵၢၼ်ဝႃႈ လႆႈၵူပ်ႉၵူႈသွၼ်ႉမိင်ႈၵၼ်တင်း ၸွမ်သိုၵ်းလူင်ယိင်း ၼၢင်းသုထိၻႃႊ ဝၶျီရႃလူင်းၵွၼ်း ၼဢယုတ်ႉထယႃး ပဵၼ်တၢင်းၵၢၼ် ၸွမ်းၼင်ႇၾိင်ႈထုင်းႁေႃၶမ်းထႆးယဝ်ႉသေ မၵ်းမၼ်ႈပဵၼ် ၼၢင်းႁေႃၶမ်း ၸိုင်ႈထႆး ၵူႈပႃႇရမီႇၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 10 ယဝ်ႉ ဝႃႈၼႆ။
