တႆးၶိူဝ်းယႂ်ႇ ပေႃးဢမ်ႇသႂ်ႇၸႂ်တၵ်းယွႆႈ ၵွႆႈယူႇၵွႆႈမူၺ်ႉဝၢႆးႁၢႆ

ၸဝ်ႈသိူဝ်ၶၢၼ်ၾႃႉ ဢဝ်တင်းမဵတ်ႉတႃၵရုၼႃး ပႃးပၢၼ်ႈပွင်ဝၢၼ်ႈပွင်မိူင်းမႃး ႁူမ်ႈပႃးၼမ်ႉၵတ်ႉ ပႅင်းႁၵ်ႉ ၸႂ်ငၢၼ် ႁတ်းႁၢၼ် ၶွၼ်ႈႁွမ်ႁႅင်းၵူၼ်း ၼုမ်ႉၼူၼ်းႁုပ်ႈႁူမ်ႈ ဢဝ်ၶိုၼ်းမိူင်းတႆးလၢၼ်ႉၸဝ်ႈ ၶဝ်ႈထိုင် လူင်ၽဝၢင်း လၢၼ်ႉၸၢင်ႉ လၢၼ်ႉၼႃး ႁုပ်ႈပႃး တိူင်းပႃႇၵိူဝ် တႃႈၵုင်ႈ တႃႈဝၢႆ ပၢႆပႃးမိူင်းဝူၺ်ႇသႃႇလီႇ မိူင်းတႆးဢႃးႁူမ် ၼႂ်းထုင်ႉဢသ်ႉသမ်ႇ ၵမ်ၸႃတႃတႆးႁိူင်း မိူင်းတႆးၵႂၢင်ႈယႂ်ႇ ၶိူဝ်းတႆးၶိူဝ်းယႂ်ႇ ၵိုၵ်းပိုၼ်းမႃး။

ပၢၼ်ႁဝ်းထိုင်မႃးပွင်ႈပၢႆယၢမ်းၼႆႉ ႁူဝ်ပၢၵ်ႇသၢဝ်းဢဵတ်း ယိင်ႈႁဵတ်းယိင်ႈယွၼ်ႈ ယိင်ႈၶွၼ်ႈယိင်ႈတႅၵ်ႇ ဢမ်ႇမႅတ်ႇပႂ်ႉပႃးၶိူဝ်းႁဝ်း ႁႃးလႆႈ ဢမ်ႇၶွၼ်ႈဢမ်ႇတုမ် ပဵၼ်ၾုင်မုၵ်ႉဢွၼ်ႇလဵၵ်ႉၼွႆႉယူႇႁင်းၽႂ်ႁင်းမၼ်းၵူၺ်း။ ၽႂ်ၵေႃႈဝႃႈၽႂ်ၸႂ်ႈ ၽႂ်ၵေႃႈဝႃႈၽႂ်ႁူႉ ၽႂ်ဢမ်ႇ ထွမ်ႇၽႂ် ၽႂ်ဢမ်ႇဢွၼ်ႁူဝ်ၽႂ်လႆႈ ၽႂ်ဢမ်ႇၸွမ်းၽႂ်လႆႈ ၵုမ်ႇၵႃႈ မိုင်ႉဝဵင်ႇ ယၼ်လွင်ႈၽဵင်ႇပဵင်း ယၵ်ႉယဵင်းႁုၼ်ႇႁၢင်ႈၾၢင်ဢူငဝ်း တူဝ်ၵဝ်ႇၽႂ်မၼ်းသေ ပိုၼ်ႉပႅတ်ႈၶၢဝ်းယၢမ်း တိုဝ်ႉတၢင်းႁၢမ်းႁႅၵ်းမႃးလၢႆၸူဝ်ႈၵူၼ်း။

ၵမ်ႈၼမ်ၵုမ်ႇတူၺ်းၵုမ်ႇႁႅၼ်း ၵုမ်ႇပၵ်းၸႂ်ယူႇတီႈမိူင်းၵွၼ်းၶေႃၼႅၼ်ႈၼၵ်း ပၵ်းၾင်ၸူမ်ထင်ယူႇတီႈၼၼ်ႉ တင်းလဵၵ်ႉတင်းယႂ်ႇ တင်းၼုမ်ႇတင်းထဝ်ႈ တင်းႁဵတ်းတင်းလၢတ်ႈ တႃႇၸိူဝ်ႉၸၢတ်ႈဝၢၼ်ႈမိူင်းလႆႈပူတ်းပွႆႇ ၵမ်ႈၼမ်သေ လိုမ်းၼပ်ႉသွၼ်ႇတိုဝ်ႉတၢင်း ငဝ်းလၢႆးသၢႆငႆဢၼ်လႅၵ်ႈလၢႆႈၸွမ်းမိုဝ်ႉၸွမ်းဝၼ်း။ လွင်ႈၸမ်တူဝ် ဢၼ်ပဵၼ်ႁူဝ်ၸႂ်ၸိူဝ်ႉၸၢတ်ႈ ပဵၼ်သၢႆၸႂ်လူင်ၸိူဝ်ႉၶိူဝ်းႁဝ်း ၼၼ်ႉ ၵမ်ႈပႃးၼမ် ဢမ်ႇၵႂႃႇၶုၵ်းၸႂ်လႆႈ ၵုမ်ႇၵႂႃႇ တုၵ်းမႆႈယူႇတီႈ ႁဵတ်းသင်သွင်တပ်ႉသိုၵ်း သွင်ပႃႇတီႇ ဢမ်ႇပဵၼ်ဢၼ်လဵဝ်ၵၼ် ဢမ်ႇႁူမ်ႈႁွမ်းၵၼ်ၼႆယူႇၵူၺ်း။ တူဝ်ႁဝ်းဢမ်ႇတူၺ်း ၼႃႈၵၢၼ်ပုၼ်ႈၽွၼ်းတူဝ်ၵဝ်ႇ။ ၵူၼ်းၶိူဝ်းတႆးၵူႈၵေႃႉ ဢၼ်ထုၵ်ႇလႆႈ မႅတ်း ပႅင်းပႂ်ႉပႃး ႁူင်ႁႅၼ်ဝႆႉၼၼ်ႉသမ်ႉ ဢမ်ႇဝႆႉၼၵ်းသူၼ်ၸႂ်။

သိုၵ်းတႆးၽၢၼ်ႇပူၼ်ႉမႃးလၢႆပၢၼ် ၵူၼ်းႁဵတ်းၵၢၼ်ၸိူဝ်ႉၸၢတ်ႈဝၢၼ်ႈမိူင်းၽၢၼ်ႇမႃးလၢႆၸုပ်ႈ ပႆႇဢဝ်လႆႈမိူင်း ၵွၼ်းၶေႃ ပႆႇပူၵ်းပွင် ၽွင်းငမ်းလႆႈထၢင်ႇႁၢင်ႈလွတ်ႈလႅဝ်းႁင်းၵူၺ်းၵေႃႈ ၵူၼ်းၶိူဝ်းတႆးပႆႇမူၺ်ႉႁၢႆတေႃႇဝၼ်း မိူဝ်ႈၼႆႉၼၼ်ႉ ၵွပ်ႈႁဝ်းယင်းၵိုတ်းလိၵ်ႈ ၵိုတ်းလၢႆး ၵိုတ်းၵႂၢမ်းလၢတ်ႈၶူဝ်းၼုင်ႈႁဝ်းဝႆႉၼၼ်ႉၵူၺ်း။

သင်ၸိူဝ်ႉဝႃႈ ဢမ်ႇမီးၵူၼ်းၸႂ်ႉတိုဝ်းၽႃသႃလိၵ်ႈလၢႆးၵႂၢမ်းလၢတ်ႈၶူဝ်းၼုင်ႈႁဝ်းဝႆႉၼႆၸိုင် ၾိင်ႈငႄႈႁဝ်း ၵူၼ်းၶိူဝ်းတႆးဢၼ်ဝႃႈ ၼၼ်ႉ ၵိုတ်းၸိုဝ်ႈမၼ်းၵူၺ်းယဝ်ႉႁိုဝ် လီဢမ်ႇလီထႅင်ႈပၢၵ်ႇပီ ၵူၼ်းၶိူဝ်းတႆးၼႆ ၼႂ်းလူၵ်ႈၼႆႉ တေဢမ်ႇမီးၽႂ်လႆႈႁူႉၸၵ်းလႆႈႁၼ် ႁၢင်ႈၾၢင်မၼ်းယဝ်ႉၵေႃႈၸၢင်ႈပဵၼ်လႆႈ။ ပေႃးထိုင်ၶၢဝ်းၼၼ်ႉ သိုၵ်းတႆးလႄႈၸိူဝ်းႁဵတ်းၵၢၼ်ပၢႆးမိူင်းယူႇၼၼ်ႉ ႁူမ်ႈဝႃႈတိုၵ်ႉမီး တိုၵ်ႉၵိုတ်းယူႇလႄႈတိုၵ်းဢဝ်လႆႈ မိူင်းတႆးၵွၼ်း ၶေႃၵေႃႈလီ ပဵၼ်မႃးမိူင်းႁူမ်ႈတုမ်ၵေႃႈလီ မီးသူၼ်ႇပူၵ်းပွင်ဝၢၼ်ႈမိူင်းလႆႈထၢင်ႇ ႁၢၼ်ႈႁင်းၵူၺ်းယဝ်ႉၵေႃႈလီ တေဢဝ်ၽႃသႃလိၵ်ႈလၢႆးၵႂၢမ်းလၢတ်ႈတႆးႁဝ်း ၵႂႃႇၸႂ်ႉတီႈလႂ် ၶူဝ်းၼိုင်ႈတႆးႁဝ်းၸင်ႇတေၵိုတ်း ယဝ်ႉႁိုဝ်။

လၢတ်ႈထိုင်လွင်ႈၼႆႉ ဢမ်ႇၸႂ်ႈ ဢမ်ႇလီသူၼ်ၸႂ်ၵၢၼ်ၸိူဝ်ႉၸၢတ်ႈဝၢၼ်ႈမိူင်း ၵၢၼ်မိူင်းၼႆၼႆႉ တၵ်းမီးပိုၼ်ႉႁူႉ ၵၢၼ်မိူင်း တၵ်း ပဵၼ်ၵူၼ်းၶိုတ်းၼႃႈၶိုတ်းလင်ၵတ်ႉလႅၼ်ႇ ၸႂ်ၵႂၢင်ႈၸႂ်ယႂ်ႇ ႁူႉပိူၼ်ႈႁူႉႁဝ်းမေႃၼပ်ႉသွၼ်ႇ ႁူႉတၼ်းယင်ထတ်းလႆႈပႃႈၼႃႈပႃႈလင် မီးတၢင်းႁတ်းတၢင်းႁၢၼ် လႅတ်းလႅမ်ၽၢႆၶူမ်း မေႃသွတ်ႇမေႃၶွၵ်း မေႃငွၵ်းမေႃဝႄႈ တီႈဢူၼ်ႈ တီႈၶႅင် မေႃယင်ႇမေႃပၵ်း မေႃဢဝ် မေႃႁႃတိုဝ်ႉတၢင်း မေႃဝၢင်းၽႅၼ်ႁွပ်ႈၶွပ်ႈ မီးသတိ ဝိရိယ ပၺ်ၺႃ သမႃထိ ၸင်ႇသူႈၶႅင်ႇတႃႉပိူၼ်ႈလႆႈ။

ၸိူင်ႉႁိုဝ်ၵေႃႈလီ မိူဝ်ႈႁဝ်းၵၢၼ်ႉသုမ်း ထုၵ်ႇပိူၼ်ႈၶီႇႁူဝ်ၵုမ်းငမ်းႁဵတ်းၶုၼ်ယူႇၼႆႉ ၵၢၼ်ဝၢၼ်ႈၵၢၼ်မိူင်း ႁဝ်းၵူႈၵေႃႉၵူႈလီႁဵၼ်းႁူႉ ၵူႈၵေႃႉၵူႈလီၸွႆႈယွင်ႈၵမ်ႉပၼ်ၽူႈၵတ်ႉၶႅၼ်ၽူႈၼမ်းၼႃႈႁဝ်း ၸိူဝ်းတိုၵ်းၼႂ်းထိူၼ်ႇ လႄႈၼႂ်းသၽႃး ဢၼ်ပဵၼ်ပၢၵ်ႇပဵၼ်သဵင် ပဵၼ်ၵွင်ႉပဵၼ်ငႃး ပဵၼ်တူဝ်တႅၼ်း ၵၢၼ်ထဵင်ၵၢၼ်တိုၵ်းၵူႈပၢႆးပၢႆး ၼၼ်ႉယူႇ။ တူဝ်ႁဝ်းၵေႃႈႁႂ်ႈပဵၼ်ၶိူင်ႈမႆႉၶိူင်ႈမိုဝ်း ၶိူင်ႈၵမ်ႉၶိူင်ႈၵႅမ် ထႅမ်ႁႅင်းၸွႆႈၵူႈၾၢႆႇၾၢႆႇ ၸင်ႇၵိုင်တၢင်း ပဵၼ်လွင်ႈဢၼ်မုင်ႈမွင်းဝႃႈ “ၽွမ်ႉႁူမ်ႈ”။

လွင်ႈလွတ်ႈလႅဝ်းထၢင်ႇႁၢင်ႈ ၶႂ်ႈသၢင်ႈၶႂ်ႈပူၵ်းပွင်ဝၢၼ်ႈမိူင်းႁဝ်းႁင်းၶေႃၼၼ်ႉ ဢမ်ႇၸႂ်ႈၵူႈၵေႃႉၵူႈၶႅၼ်ႇ ၵူႈၵေႃႉ ၵူႈဢမ်ႇမီးလၵ်းမီး ပိူင်သေ မင်ယူႇၵူၺ်းၽႂ်ၵူၺ်းမၼ်းၵေႃႉႁူးၵေႃႉတၢင်း ၵႃႈမၼ်းပွင်ႇၵူၺ်းတႄႉ ယႃႇဝႃႈတေ ၸမ်ယိင်ႈၶႅၼ်းၵႆ ယႃႇဝႃႈတေပဵၼ်ႁႅင်း ယိင်းၶႅၼ်းတေပဵၼ်ၵၢၼ်ၶတ်းၶႅင်ႈၶတ်းၶႃၵၼ်ၵူၺ်း ၸွမ်းလင်ဢမ်ႇလႆႈ ဢွၼ်ၼႃးၼမ်းတၢင်းဢမ်ႇႁူႉ တေပႃးၵၼ်လူႉတင်း မူတ်းၵူၺ်း။

ၵၢၼ်ၸိူဝ်ႉၸၢတ်ႈဢၼ်ဝႃႈၼႆႉ မီးတင်းၼမ်တင်းလၢႆ ၸိူင်ႉၼင်ႇၵၢၼ်ဝၢၼ်ႈၵၢၼ်မိူင်း ႁူဝ်ၶေႃႈလူင်မၼ်း မီးထႅင်ႈလၢႆၾၢႆႇ ၵၢၼ် သိုၵ်း ၵၢၼ်ၽွင်းငမ်း ၵၢၼ်ပၢႆးပၺ်ၺႃ ၵၢၼ်ၾိင်ႈငႄႈလိၵ်ႈလၢႆး ၵၢၼ်တူင်ႇဝူင်းၵူၼ်း ၵၢၼ်ပၢႆးမၢၵ်ႈမီး ၵၢၼ်ၽုၵ်ႇသွမ်ႈ လႄႈထႅင်ႈ တင်းၼမ်ၼပ်ႉဢမ်ႇထူၼ်ႈဢမ်ႇတူဝ်ႈ ၸိူဝ်းၼႆႉပဵၼ်ၵၢၼ်ၸိူဝ်ႉ ၸၢတ်ႈၵူၺ်းၵူၺ်း။

ပေႃးႁဝ်းတေဢုပ်ႇလၢတ်ႈယႂ်ႇလၢတ်ႈလူင် ပူၼ်ႉၶၢမ်ႈႁူဝ်ပိူၼ်ႈၸိူဝ်းႁဵတ်းၵၢၼ်တႄႉတႄႉၼၼ်ႉ ၸွင်ႇမၼ်းၵိုင်ႇ တၢင်းႁဵတ်းႁဝ်း လႄႈႁဵတ်းပဵၼ်မႃး။ ပေႃးၵူႈၵေႃႉ ထတ်းသၢင်ၶိုၼ်းတူဝ်ၵဝ်ႇလူၺ်ႈၵႂၢမ်းတဵင်ႈထမ်းၼႆ တေႁၼ် – ၸဝ်ႈၵဝ်ႇႁဵတ်းယူႇၼႆႉ ၸိူဝ်ႉ ၸၢတ်ႈၸိူဝ်ႉၶိူဝ်းၸဝ်ႈၵဝ်ႇလႆႈသင် လႆႈႁဵတ်းပၼ်သင်ၽွင်ႈ လႆႈၽွၼ်းလီသင်မႃး။ ဢမ်ႇၼၼ် ဢၼ်ၸဝ်ႈၵဝ်ႇႁဵတ်းယူႇၼႆႉ တူဝ် ၸဝ်ႈၵဝ်ႇသမ်ႉလႆႈသင်မႃး ၽွၼ်းလီတူဝ်ၸဝ်ႈၵဝ်ႇသမ်ႉလႆႈသင်။

ၵွပ်ႈၵၢၼ်ၸိူဝ်ႉၸၢတ်ႈၸိူဝ်ႉၶိူဝ်းသေ (ၸဝ်ႈၵဝ်ႇမၢၵ်ႈမီးလီပဵၼ်ယွၼ်ႉမၼ်းၼႄႇ၊ၽၢၼ်ယွၼ်ႉမၼ်းၼႄႇ၊ ဢမ်ႇမီးဢမ်ႇၽၢၼ် ယွၼ်ႉမၼ်းၼႄႇ၊ ၵွပ်ႈမၼ်းဢမ်ႇၸႂ်ႈၵၢၼ်ၵဝ်ၼႆၼႄႇ၊ ၵွပ်ႈမၼ်းပဵၼ်ၵၢၼ်ၵဝ်ၼႆၼႄႇ)။ လႆႈၵိၼ်ယွၼ်ႉမၼ်းလူၺ်ႈ မီးသိင်ႇ တွပ်ႇတႅၼ်း/ငိုၼ်းလိူၼ်/ငိုၼ်းၵမ်ႉထႅမ်ၼႃႈႁိူၼ်းမိူၼ်ၶႃႈႁၢပ်ႇၵၢၼ်ၶုၼ်ၼႄႇ၊ လူၺ်ႈၸိုဝ်ႈသဵင်ဢၼ်ႁဵတ်းၵၢၼ်ၸိူဝ်းၼႆႉၼႄႇ၊ လူၺ်ႈဢဝ်ၼႃႈၵၢၼ်ၸိူဝ်းၼႆႉဢၢင်ႈသေ လႆႈမႃးယွၼ်ႉၵၢၼ် ၸိူဝ်ႉၸၢတ်ႈၼႄႇၼႆ ၸိူဝ်းၼႆႉမီးတင်းဢၼ်တဵင်ႈထမ်း လႄႈဢမ်ႇ တဵင်ႈထမ်း။ ပိူင်လူင်မၼ်း ယူႇတီႈၸႂ် ၶၢဝ်သႂ် ၽိူၵ်ႇၸိုၼ်ႈ မူတ်းၸၢင်ႇသိုဝ်ႈသႂ်တင်းမူတ်းတင်းပိၵ်းၵူၺ်း။

ၵူၺ်းၵႃႈၸိူင်ႉႁိုဝ်ၵေႃႈလီ ၵၢၼ်ၵူၼ်းမိူင်းတႆးၵူႈၵေႃႉ ဢၼ်မီးၼႃႈတီႈပုၼ်ႈၽွၼ်း တၵ်းဝႄႈဢမ်ႇလႆႈၼၼ်ႉ ၵူႈၵေႃႉမီးၼႃႈတီႈ ပုၼ်ႈၽွၼ်းႁၵ်ႉသႃမႅတ်ႇပႅင်းပႂ်ႉပႃး “ၽႃသႃလိၵ်ႈလၢႆးၵႂၢမ်းလၢတ်ႈၶူဝ်းၼုင်ႈတႆး” ပဵၼ်သၢႆၸႂ် ၸိူဝ်ႉၸၢတ်ႈၸိူဝ်ႉၶိူဝ်း လၵ်းလူင် မၼ်းယဝ်ႉ။ လိူဝ်ၼၼ်ႉ ၽႂ်မီးၼမ်ႉၵတ်ႉတၢင်းလႂ် ၵတ်ႉၶႅၼ်ႇၾၢႆႇလႂ်လွင်ႈလႂ် လွင်ႈသင် သူၼ်ၸႂ်လွင်ႈသင်ၵေႃႈလဵပ်ႈႁဵၼ်းႁူႉ ထိုင်လၵ်းထိုင်လွၼ်ႉသေႁဵတ်းၵႂႃႇၼႆ တေလီငၢမ်း ႁၼ်ၼမ်ႉ ႁၼ်တူဝ်လႆႈ ယုမ်ယမ်ၼင်ႇၼႆ။

ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ

ၶေႃႈမုလ်း – ၽူႈတွႆႇႁွၵ်ႈ မၢႆ 007,2018