တႆးႁွတ်ႈ မိူင်းၶႄႇ ႁူမ်ႈၵၼ်ၵမ်ႉထႅမ် ငိုၼ်းတွင်း ၵႃႈယူတ်းယႃလႄႈ တႃႇၵူၼ်းႁိူၼ်း ၼွင်ႉၼူၼ်းပၢင်ႇ ဢႃယု 9 ၶူပ်ႇ ဢၼ် ၺႃးၾႆးမႆႈတင်းတူဝ် ၽွင်းၾႆးမႆႈႁိူၼ်း တီႈဝဵင်းၵေးသီးၼၼ်ႉ ဝႃႈၼႆ။
ယူႇတီႈၸုမ်းတႆးၽွမ်ႉႁူမ်ႈၸွႆႈၸိူဝ်ႉၸၢတ်ႈ ၸိုင်ႈမိူင်းၶႄႇသေ ႁူမ်ႈၵၼ် ၵမ်ႉထႅမ်ၵႃႈယူတ်းယႃ ၼွင်ႉၼူၼ်းပၢင်ႇ ဢႃယု 9 ပီ ဢၼ်ၺႃးၾႆးမႆႈတင်းတူဝ်ၼၼ်ႉ လႄႈတႃႇၵူၼ်းႁိူၼ်းမၼ်းၼၢင်းယူႇသဝ်းၵိၼ်သၢင်ႈၵႂႃႇ တင်းမူတ်းမႅၼ်ႈငိုၼ်း 553,000 ပျႃး (ငိုၼ်းမၢၼ်ႈ)။ မိူဝ်ႈဝၼ်းတီႈ 16/05 /2019 ၼၼ်ႉ လႆႈသူင်ႇပၼ်ၵႂႃႇယဝ်ႉ ဝႃႈၼႆ။
ၼွင်ႉလၢဝ် ၽူႈဢွၼ်ႁူဝ်ၸုမ်းတႆးၽွမ်ႉႁူမ်ႈၸွႆႈၸိူဝ်ႉၸၢတ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပီႈၼွင်ႉတႆးႁဝ်းၶႃႈ ဢၼ်ၵမ်ႉ ထႅမ် ၸွႆႈၶဝ်ႈမႃးတႄႉ ၵမ်ႈၼမ်ပဵၼ်ပီႈၼွင်ႉႁႅင်းၵၢၼ်တႆး ဢၼ်မႃးႁဵတ်းၵၢၼ်တီႈၼႂ်းမိူင်းၶႄႇ တၢင်းပွတ်းယုၼ်ႊၼၢၼ်ႊ ၼႆႉ ယဝ်ႉၵေႃႈ ပီႈၼွင်ႉတႆးႁဝ်း ၼႂ်းမိူင်းၵမ်ႈၽွင်ႈၶႃႈ။ တီႈလႆႈတႄႇၵဵပ်းငိုၼ်းတႃႇတေၵမ်ႉထႅမ် ၼွင်ႉၼူၼ်းပၢင်ႇၼႆႉ တႄႇ မႃး မိူဝ်ႈသီႇလိူၼ်(လိူၼ်ဢေႊပရိူဝ်ႊ) ဝၼ်းတီႈ 27 ထိုင် ႁႃႈလိူၼ် (လိူၼ်မေႊ) ဝၼ်ႈတီႈ 2-3 ၼႆႉၶႃႈ။ ငိုၼ်းဢၼ်လႆႈၵဵပ်းမႃးတင်းမူတ်း မႅၼ်ႈငိုၼ်းမၢၼ်ႈ ယူႇ 55,3000 ပျႃး။ ငိုၼ်းၸိူဝ်းၼႆႉတႄႉ လႆႈဢူၼ်း/ သူင်ႇၵႂႃႇယဝ်ႉၶႃႈ” ဝႃႈၼႆ။
မိူဝ်ႈဝၼ်းတီႈ 22/03/2019 ယၢမ်းၵၢင်ၶိုၼ်း မွၵ်ႈ 2 မူင်းၼၼ်ႉ ၾႆးမႆႈႁိူၼ်း ၸၢႆးလူး လႄႈ ၼၢင်းသူၺ်ႇၸိင်ႇ တီႈဝၢၼ်ႈ ၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းသေ ၼၢႆးယဵၼ်ႇၵေႃႉပဵၼ်ၼၢႆး လႄႈ ၼွင်ႉၼူၼ်းပၢင်ႇ ဢႃယု 9 ၶူပ်ႇ ၵေႃႉပဵၼ်လၢၼ် ၺႃးၾႆးမႆႈ။
ဝၼ်းတီႈ 26/04/2019 ပူၼ်ႉမႃးၼၼ်ႉ ယူႇတီႈၽူႈတႅၼ်းသၽႃး ၵေးသီး၊ သီႇပေႃႉ လႄႈ ၸုမ်းၸွႆႈထႅမ်တူင်ႇဝူင်းၵူၼ်း၊ ၵူၼ်းၼုမ်ႇသီႇပေႃႉ ႁူမ်ႈၵၼ် ဢဝ်တူဝ်ၼွင်ႉၼူၼ်းပၢင်ႇ ဢႃယု 9 ၶူပ်ႇ တီႈႁူင်းယႃၵေးသီး သူင်ႇၸူးထိုင်တီႈမျႃႉဝတီႇ-မႄႈသွတ်ႇ တၢင်းလႅၼ်လိၼ် ယၢင်းၽိူၵ်ႇ- ထႆး သေ လႆႈၶဝ်ႈယူတ်းယႃ ၼႂ်းႁူင်းယႃ မႄႈသွတ်ႇ ၼႂ်းၸိုင်ႈထႆး ဝႃႈၼႆ။
ၼွင်ႉလၢဝ် လၢတ်ႈဝႃႈ “ ယူႇတီႈၸုမ်းတႆးၽွမ်ႉႁူမ်ႈၸွႆႈၸိူဝ်ႉၸၢတ်ႈႁဝ်းၶႃႈၼႆႉ လႆႈၸွႆႈၵမ်ႉထႅမ်ပၼ်ၵႂႃႇ ဢမ်ႇဝႃႈ ၸွမ်းသၢႆ သိုၵ်း၊ တီႈႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း။ ယဝ်ႉၵေႃႈ တီႈၸုမ်းတူင်ႉၼိုင်တူင်ႇဝူင်းၵူၼ်းလႄႈ ပၢႆႈၽေးသိုၵ်း ၸဵမ်ၸိူဝ်းၼႆႉ။ သင်ဝႃႈ ၽူႈမီးၼမ်ႉၸႂ်ၸေႇတၼႃႇၵေႃႉလႂ်သေဢမ်ႇဝႃႈ ၶႂ်ႈႁူမ်ႈငိုၼ်းၸွႆႈထႅမ်ၼႆၸိုင် ၵပ်းသိုပ်ႇတီႈ ၽူႈ ႁပ်ႉငိုၼ်းၸုမ်းတႆးၽွမ်ႉႁူမ်ႈၸွႆႈၸိူဝ်ႉၸၢတ်ႈ တီႈမၢႆ Wechat ID: Nonglao758758 လႆႈယူႇၶႃႈ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ