ပီႈၼွင့်တႆး ၸိူဝ်းႁဵတ်းၵၢၼ်ၼႂ်းမိူင်းၶႄႇ ႁူမ်ႈၵၼ်ၵမ့်ထႅမ် ငိုၼ်းတွင်းၼင်ႇၵႃႈပဵၼ်လႆႈ ပႅၵ့်တေႃႇၸွႆ့ ပၼ်ၸုမ်းၶၢဝ်ႇၽူႈတွႆႇႁွၵ်ႈ တႃႇၵေႃႇသၢင်ႈလုမ်း တီႈဝဵင်းတူၼ်ႈတီး ငဝ်ႈဝဵင်းလူင်ၸိုင်ႈတႆး။
ယူႇတီႈၸုမ်းတႆးၽွမ့်ႁူမ်ႈၸွႆႈၸိူဝ့်ၸၢတ်ႈ ဢၼ်မီးၼႂ်းမိူင်းၶႄႇ ၸွႆႈႁပ့်ငိုၼ်းလူႇၶၢမ်ႇ(ၵမ့်ၸွႆႈ) တီႈပီႈၼွင့်တႆး ယၢၼ်မိူင်း ၸိူဝ်းၶဝ်ႈႁဵတ်းၵၢၼ် ၼႂ်းမိူင်းၶႄႇ တႃႇသၢင်ႈလုမ်းၶၢဝ်ႇၽူႈတွႆႇႁွၵ်ႈ တီႈဝဵင်းလူင်တူၼ်ႈတီး ၼႂ်းပီ 2020 တေမႃးၼႆ့ လႆႈႁပ့် ငိုၼ်းလူႇၶၢမ်ႇ (ၵမ့်ၸွႆႈ) ၼႂ်းလိူၼ်လဵဝ်(လိူၼ်မၢတ့်ၶျ်) ၵူၺ်း တင်းမူတ်းလႆႈငိုၼ်းၶႄႇ 2,350 ယွၼ် တူၵ်းမႅၼ်ႈငိုၼ်းမၢၼ်ႈ 530,000 ၵျၢပ်ႈပၢႆ ဝႃႈၼႆ။
ၼၢင်းလၢဝ် ၽူႈဢွၼ်ႁူဝ်ၼႂ်းၸုမ်းတႆးၽွမ့်ႁူမ်ႈ ၸွႆႈၸိူဝ့်ၸၢတ်ႈ လၢတ်ႈတီႈၽူႈတွႆႇႁွၵ်ႈဝႃႈ “ယိူင်းဢၢၼ်းႁဝ်းၶႃႈ တီႈမီး ၼမ်ႉၸႂ်ဢၼ်လႆႈ ၸွႆႈထႅမ်မႃးတႃႇသၢင်ႈလုမ်းမႂ်ႇ ၸုမ်းၶၢဝ်ႇၽူႈတွႆႇႁွၵ်ႈ ႁဝ်းၶဝ် ပိူဝ်ႈတႃႇႁႂ်ႈသိုဝ်ႇၶၢဝ်ႇတႆးႁဝ်းၶႃႈ ႁႂ်ႈလႆႈ ပဵၼ်တီႈႁဝ်းၶႃႈၵူၼ်းမိူင်းတႆး လႆႈၸႂ် ယႂ်ႇလႄႈ လႆႈႁပ်ႉႁူႉၶၢဝ်ႇငၢဝ်းၶိုတ်းတၼ်းၸွမ်းၼင်ႇၵၢပ်ႈပၢၼ်ယၢမ်းလဵဝ်လႄႈ ၼင်ႇႁိုဝ် တေႁႂ်ႈလႆႈပဵၼ်ႁႅင်း ၵႃႈမၢၵ်ႇႁိၼ်မဵတ်ႉသၢႆးလၢႆ လုၵ်ႈ လၢႆႁူၺ်ႇၼႆသေ ၼင်ႇႁိုဝ် ႁူင်းပွႆႇၶၢဝ်ႇ ပီႈၼွင်ႉၸၢဝ်းၶိူဝ်း တႆးႁဝ်းၶႃႈ တေႁိူဝ်ႈႁိူင်း လိၵ်ႈလၢႆးတႆး ၼမ်ႉၵႂၢမ်းသဵင်လၢတ်ႈတႆးႁဝ်း ႁႂ်ႈ ပေႃႈၸွတ်ႇတူဝ်ႈပတ်းပိုၼ်ႉၽႄႈၵႂႃႇ ၼမ်ၼမ် သေဢမ်ႇၵႃး ၼင်ႇႁိုဝ်လုၵ်ႈလၢၼ်ႁဝ်းၶႃႈ မိူဝ်းၼႃႈမႃး ႁႂ်ႈပေႃးလဵပ်ႈႁဵၼ်းႁူႉလိၵ်ႈလၢႆး ငၢႆႈၼိူဝ်(Internet) တွၼ်ႈတႃႇမိူဝ်း ၼႃႈ ၸိူဝ်းၼၼ်ႉသေ ၸင်ႇလႆႈႁူမ်ႈၵၼ်ၸွႆႈထႅမ် ႁပ်ႉငိုၼ်းလူႇၶၢမ်ႇၶႃႈ” ဝႃႈၼႆ။
သိုပ်ႇလၢတ်ႈဝႃႈ “ ႁဝ်းၶႃႈ တေသိုပ်ႇႁပ်ႉငိုၼ်းၸွႆႈထႅမ် တီႈပီႈၼွင်ႉတႆး ၼႂ်းမိူင်းၶႄႇ ၽူႈမီးၼမ်ႉၸႂ်ၸေႇတၼႃႇ ႁဝ်းၶႃႈ ၵႂႃႇ ထႅင်ႈ ၵူႈလိူၼ်ယူႇၶႃႈ ႁၢၼ်ႉတေႃႇထိုင်ၶၢဝ်းသၢင်ႈလုမ်း ပီ 2020 ပီၼႃႈၼႆႉၶႃႈ။ လိူဝ်ၼၼ်ႉ သင်ဝႃႈ ပီႈၼွင်ႉႁဝ်းၵေႃႉလႂ် သူင်ႇမႃးၼႆၸိုင် တူင်ႉတၵ်ႉၶဝ်ႈမႃးလႆႈတီႈ မၢႆ Wechat ID-Nonglao758758 လႆႈယူႇၶႃႈ။ ဢမ်ႇၼၼ် ၼႂ်း QR Cord ဝှီႊၶျႅတ့်ၶႃႈ ႁဝ်းၵေႃႈလႆႈယူႇၶႃႈ” ဝႃႈၼႆ။
တႆးႁွတ်ႈမိူင်းၶႄႇ ၸိူဝ်းလႆႈၵမ့်ထႅမ် ငိုၼ်းတႃႇၵေႃႇသၢင်ႈလုမ်းၶၢဝ်ႇၽူႈတွႆႇႁွၵ်ႈ ၼႂ်း လိူၼ်မၢတ့်ၶျ်ၼၼ့် မိူၼ်ၼင်ႇ ၸၢႆးၸွမ်သႂ် လႄႈ ၼၢင်းယိင်းသူၺ်ႇ မိူင်းယႆ 500 ယႂၼ်၊ ၸၢႆးၸၢမ်ႇဢွင်ႇ ဝဵင်းမူႇၸေႊ 500 ယႂၼ်၊ ၸၢႆးတိင်း မေႃႇငိုၼ်း ၼမ့်တူႈပၢင်ႁႆး 10 ယႂၼ်၊ သူၺ်ႊ သဝ်ႊ မိူင်းမႅၼ်း (ၸိုင်ႈမိူင်းၶႄႇ) 30 ယႂၼ်ၼ်၊ ႁႅင်းၵၢၼ်ယၢၼ်မိူင်း ၸူဝ်ႈၶၢဝ်းမိူင်းၶႄႇ 60 ယႂၼ်၊ ၸၢႆးၼုမ်ႇတႆး သၢႆၼမ့်တူႈ 50 ယႂၼ်၊ STA သိူဝ်မိၼ် ဝဵင်းတၢင့်ယၢၼ်း 100 ယႂၼ်၊ ၼမ့်ၼုင်း ယဵၼ် မိူင်းၼုင်း 20 ယႂၼ်၊ လွၼ့်လဵၵ်းလီ တိုတ့်ဢမ်ႇၶဵင်ႈ(တၢင့်ယၢၼ်း) 50 ယႂၼ်၊ ၸၢႆးဢၢႆႈမွင်ႇလႄႈ ၼၢင်းၽွင်ၶမ်း မၢၼ်ႈၼွင်ၶူဝ်ဢိူင်ႇ 19 မၢၼ်ႈ ဝဵင်းမူႇ 30 ယႂၼ်၊ ၼၢင်းၽူင်းဢွင်ႇ ၶဝ်ပေႃႈမႄႈလုၵ်ႈတၢင်း ႁိူၼ်း ဝဵင်းတၢင့်ယၢၼ်း 500 ယႂၼ်လႄႈ ယိင်းၼွင်ႉလၢဝ် 500 ယႂၼ်တင်းမူတ်း ႁူမ်ႈငိုၼ်းၶႄႇ 2,350 ယႂၼ် ဝႃႈၼႆ။
သင်ဝႃႈ ၽူႈမီးၼမ့်ၸႂ် ၸေႇတၼႃႇ ပီႈၼွင့်တႆး ၸိူဝ်းႁွတ်ႈၽႅဝ် ၼႂ်းမိူင်းၶႄႇလႄႈ ပီႈၼွင့်တႆးၸိူဝ်းယူႇသဝ်းၼႂ်းမိူင်းၶႄႇ ၶႂ်ႈၵမ့်ၸွႆႈထႅမ် မႃးၼႆၸိုင် ၵပ်းသိုပ်ႇမႃးလႆႈတီႈ ယိင်းၼွင့်လၢဝ် ၸုမ်းတႆးၽွမ့်ႁူမ်ႈၸွႆႈၸိူဝ့်ၸၢတ်ႈ မၢႆ Wechat ID – Nonglao758758 လႆႈယူႇၶႃႈ။ ဢမ်ႇၼၼ် ႁၢင်း(Scan QR Cord) ၶွင်ယိင်းၼွင့်လၢဝ် ဢၼ်ၼႆ့လႆႈယူႇၶႃႈ ဝႃႈၼႆ။
