ၵဵၵ်ႉ/ လၢၼ်ႇသိုၵ်းဝႃႉ ဢၼ်တင်ႈဝႆႉၼႂ်းၵႄႈ မိူင်းသၢတ်ႇ – တႃႈၶီႈလဵၵ်းသေ ၵဵပ်းငိုၼ်းၸဝ်ႈၵႃး မႃးပီယၢဝ်းၶၢဝ်းႁိုင်ၼၼ်ႉ၊ ယုၵ်ႉလိူၵ်ႈ/ ပူတ်းပႅတ်ႈယဝ်ႉလႄႈ ၸဝ်ႈရူတ်ႉၸဝ်ႈၵႃးၸူမ်းသိူဝ်းလီၸႂ် ဝႃႈၼႆ။

တႄႇဢဝ် ဝၼ်းတီႈ 01/05/2019 ၼႆႉမႃး ယူႇတီႈသိုၵ်းဝႃႉ ၼႃႈလိၼ်သိုၵ်း 171 ၵိုတ်းယင်ႉလွင်ႈၵဵပ်းငိုၼ်း တီႈဝၢၼ်ႈမိူင်း ၵၢၼ်းၼၼ်ႉ ဝႃႈၼႆ။

ၸၢႆးလူင် ၸဝ်ႈၵႃး ႁပ်ႉသူင်ႇၵူၼ်း မိူင်းသၢတ်ႇ – တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ဢမ်ႇႁၼ်ၶဝ်ၵဵပ်းငိုၼ်းတီႈ ၸဝ်ႈၵႃး ဢၼ်လႅၼ်ႈၵႂႃႇမႃးၼိူဝ်သဵၼ်ႈတၢင်းၼႆႉယဝ်ႉ။ လၢၼ်ႇတႄႉၶဝ်ဢမ်ႇယႃႉပႅတ်ႈ။ ၵူၺ်းၶဝ်ဢမ်ႇၵဵပ်းငိုၼ်းယဝ်ႉ ၼႆၵူၺ်း” ဝႃႈၼႆ။

မိူဝ်ႈၵူႈပွၵ်ႈ ရူတ်ႉၶိူင်ႈ/ ၵႃး ၵႂႃႇမႃး လႆႈပၼ်ၵႃႈသဵၼ်ႈတၢင်း တီႈလၢၼ်ႇသိုၵ်းဝႃႉ (ၼႃႈလိၼ်သိုၵ်း 171) ဢၼ်တင်ႈဝႆႉ တီႈႁိမ်းဝၢၼ်ႈၵၢၼ်း ၼႂ်းၵႄႈမိူင်းသၢတ်ႇ – တႃႈၶီႈလဵၵ်းၼၼ်ႉ ပေႃးပဵၼ်ရူတ်ႈၶိူင်ႈၼိုင်းလမ်းလႂ် လႆႈပၼ် 20 ဝၢတ်ႇ၊ ၵႃး ဢွၼ်ႇ/ ၵႃးႁိူၼ်းသမ်ႉ 100 ဝၢတ်ႇလႄႈ ၵႃးလူင်သမ်ႉ 1,000 ဝၢတ်ႇ (ငိုၼ်းထႆး) ဝႃႈၼႆ။

သဵၼ်ႈတၢင်းမိူင်းသၢတ်ႇ – တႃႈၶီႈလဵၵ်း ဢၼ်ၵၢႆႇၸူးၵၼ်ဝႆႉၼၼ်ႉ ယၢဝ်း 60 လၵ်းပၢႆ ဝႃႈၼႆ။

မိူဝ်ႈပီ 2018 လိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 30 ၼၼ်ႉ ယူႇတီႈတပ်ႉသိုၵ်းဝႃႉ လႆႈမွပ်ႈပၼ် ၾၢႆႇလူင်ပွင်ၸိုင်ႈမၢၼ်ႈ ႁႂ်ႈဢဝ်ပုၼ်ႈၽွၼ်းသိုပ်ႇႁဵတ်းသၢင်ႈၵႂႃႇ ဝႃႈၼႆ။

ၸၢႆးလူင် လၢတ်ႈဝႃႈ “တေႃႈလဵဝ်တႄႉ တိုၵ်ႉထုၺ်၊ တိုၵ်ႉႁဵတ်း၊ တိုၵ်ႉၶႂၢၵ်ႈထႅင်ႈယူႇတိၵ်းတိၵ်းၶႃႈ။ ဢၼ်ႁဵတ်းသၢင်ႈသဵၼ်ႈ တၢင်းၼႆႉ ပဵၼ်လူင်ပွင်ၸိုင်ႈဢဝ်ပုၼ်ႈၽွၼ်းႁဵတ်း။ သင်ဝႃႈ သဵၼ်ႈတၢင်းၾၢႆႇၼႆႉလီယဝ်ႉၸိုင် ၵူၼ်းၵႃႉၵူၼ်းၶၢႆ ၵူၼ်း ႁေႃႈၵႃး၊ တႃႈၶီႈလဵၵ်း ၵႂႃႇတၢင်း မိူင်းပၼ်ႇ၊ လၢင်းၶိူဝ်း မွၵ်ႇမႆႇၸိူဝ်းၼၼ်ႉ ၶဝ်တေလႅၼ်ႈသဵၼ်ႈ တၢင်းၼႆႉၵူၺ်းယဝ်ႉၶႃႈ ယွၼ်ႉဝႃႈမၼ်းတေၸမ်။ ၵူၼ်းမိူင်းႁဝ်းၶႃႈ တၢင်းသၢႆၼႆႉၵေႃႈ ဢွၼ်ၵၼ်ၸူမ်းပေႇၸႂ်ယဝ်ႉ။ ယွၼ်ႉဝႃႈ ပေႃးၶၢဝ်းႁိုဝ်ႉ/ ၾူၼ်တူၵ်းမႃးၸိုင် သဵၼ်ႈတၢင်းယၢပ်ႇၵူႈပီယဝ်ႉ။ ပဵၼ်ၵူမ်ႇပဵၼ်လိၼ် ပေႃးၶႂ်ႈပဵင်းၶႃလူင် ပဵင်းဢႅဝ် ၼႆႉၶႃႈယဝ်ႉ” ဝႃႈၼႆ။

သဵၼ်ႈတၢင်း မိူင်းသၢတ်ႇ – တႃႈၶီႈလဵၵ်း ဢၼ်ၵၢႆႇၸူးၵၼ်ၼႆႉ ယူႇတီႈတပ်ႉသိုၵ်းဝႃႉ ၸၢင်ႈၶွမ်ႊပၼီႊႁူင်ႇပၢၼ်းသေ မႃးၶုတ်းထုၺ်ၵႂႃႇ မိူဝ်ႈ 1998 မႃးၼၼ်ႉ ဝႃႈၼႆ။