ႁုၼ်ႇႁၢင်ႈၸွမ်သိုၵ်းဢွင်ႇသၢၼ်း ဢၼ်ပၵ်းတမ်းဝႆႉတီႈသူၼ်မွၵ်ႇ ၵၼ်ႇတႃႇႁေႇဝုၼ်ႇ ၸႄႈဝဵင်းလွႆၶေႃ ၸႄႈမိူင်း ယၢင်းလႅင်ၼၼ်ႉ ၸွမ်ၽွင်းလူင် ၸႄႈမိူင်းယၢင်းလႅင် ပၼ်ၵႂၢမ်းမၼ်ႈတူၵ်းလူင်းဝႃႈ တေယုၵ်ႉၶၢႆႉပၼ် ဝႃႈၼႆ။

ဝၼ်းတီႈ 07/05/2019 ၸုမ်းၵူၼ်းၼုမ်ႇယၢင်းလႅင် လႄႈ ၽူႈမီးပုၼ်ႈၽွၼ်း ၼႂ်းလူင်ပွင်ၸိုင်ႈမိူင်းယၢင်းလႅင် ႁူပ်ႉထူပ်း ဢုပ်ႇဢူဝ်းငူပ်ႉငီႉၵၼ် တီႈႁူင်းႁႅမ်း ၵိင်ႇၼႃႇရီႇ ဝဵင်းလွႆၶေႃ ၸႄႈမိူင်းယၢင်းလႅင်။ ဢုပ်ႇဢူဝ်းၵၼ် ၵဵဝ်ႇၵပ်းႁုၼ်ႇႁၢင်ႈ ဢွင်ႇသၢၼ်း ဢၼ်ပၵ်းတမ်းဝႆႉတီႈၼႂ်းသူၼ်မွၵ်ႇၵၢင်ဝဵင်းလွႆၶေႃၼၼ်ႉ ယူႇတီႈၾၢႆႇလူင်ပွင်ၸိုင်ႈ ၸႄႈမိူင်းယၢင်းလႅင် ပၼ်ၵႂၢမ်းမၼ်ႈ(ၵတိ) တေယုၵ်ႉၶၢႆႉပၼ် ဝႃႈၼႆ။

ၶုၼ်ႇတေႃႇမတ်ႊ ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇယၢင်းလႅင် လၢတ်ႈတီႈသိုဝ်ႇၶၢဝ်ႇ DVB ဝႃႈ “ မိူဝ်ႈဝၼ်းတီႈ 7 ၼၼ်ႉ ႁဝ်း ၶႃႈ ဢုပ်ႇဢူဝ်းၵၼ် လႆႈမႃးၽွၼ်းပၢင်ႈဝႃႈ ၶဝ်တေၶၢႆႉ ႁုၼ်ႇႁၢင်ႈဢွင်ႇသၢၼ်းပၼ်။ တွၼ်ႈတႃႇတေၶၢႆႉႁုၼ်ႇႁၢင်ႈၼၼ်ႉ တေၶွတ်ႇၽွတ်ႈမႃးၶွမ်ႊမတီႊၵွၼ်ႇ။ လွင်ႈဝႃႈ တေၶၢႆႉၸိူင်ႉႁိုဝ်၊ တေၶၢႆႉၵႂႃႇတီႈလႂ်ဢၼ်ဝႃႈၼၼ်ႉ ပေႃးထိုင်မႃး ဝၼ်းတီႈ 14 လိူၼ်ၼႆႉၸိုင် တေႁူပ်ႉၵၼ်ထႅင်ႈၵမ်းၼိုင်ႈ။ တႃႇတေဢုပ်ႇဢူဝ်းၵၼ်ဝႃႈ တေႁႃတီႈဝႆႉ တေဢုပ်ႇဢူဝ်းၵၼ်ႁႂ်ႈယဝ်ႉ ၼႂ်းၶၢဝ်းတၢင်းလိူၼ်ၼႆႉ” ဝႃႈၼႆ။

တွၼ်ႈတႃႇတေၶၢႆႉႁုၼ်ႇႁၢင်ႈဢွင်ႇသၢၼ်း ဢၼ်ပၵ်းတမ်းဝႆႉတီႈၼႂ်းသူၼ်မွၵ်ႇ ၵၢင်ဝဵင်းလွႆၶေႃ ၸႄႈမိူင်းယၢင်းလႅင်ၼၼ်ႉ ယူႇတီႈၸွမ်ၽွင်းလူင် ၸႄႈမိူင်းယၢင်းလႅင် တေလႆႈႁႃဢွင်ႈတီႈ တႃႇတေတမ်းဝၢင်း ႁုၼ်ႇႁၢင်ႈဢွင်ႇသၢၼ်းၼၼ်ႉ ဝႃႈၼႆ။

ၵဵဝ်ႇၵပ်းလွင်ႈႁုၼ်ႇႁၢင်ႈဢွင်ႇသၢၼ်း ဢၼ်မႃးတမ်းဝႆႉၼႂ်းသူၼ်မွၵ်ႇၵၢင်ဝဵင်းလွႆၶေႃၼၼ်ႉ မိူဝ်ႈၼႂ်းလိူၼ်ၾႅပ်ႊပိဝ်ႊရီႊ ပူၼ်ႉမႃးၼၼ်ႉ ယူႇတီႈၵူၼ်းမိူင်းလႄႈ ၵူၼ်းၼုမ်ႇ မိူင်းယၢင်းလႅင် ႁူမ်ႈၵၼ်ပႆတၢင်းၼႄၵၢင်ၸႂ် သၢၼ်ၶတ်း ဢမ်ႇႁၼ် လီၸွမ်း လွင်ႈပၵ်းတမ်းဝၢင်းႁုၼ်ႇႁၢင်ႈဢွင်ႇသၢၼ်း တီႈၼႂ်းသူၼ်မွၵ်ႇၵၢင်ဝဵင်းၼၼ်ႉ ဝႃႈၼႆ။