မိူဝ်ႈၼႆႉ ဝၼ်းတီႈ 07/05/2019 ယၢမ်းၵၢင်ၼႂ် 4 မူင်း ၾႆးမႆႈႁၢၼ်ႉၶၢႆၾူၼ်း(ႁိူၼ်း)၊ ႁၢၼ်ႉၶၢႆၶူဝ်း တင်းမူတ်း 3 လင် တီႈ ႁိမ်းၵၢတ်ႇ ပွၵ်ႉ 5 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ မႆႈပႃးၵူၼ်း 2 ၵေႃႉ ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။
ဢူၺ်းၵေႃႉၸမ်ၸႂ်ၸၢႆးၸၢမ်ႇ ၵေႃႉၺႃးၾႆးမႆႈလူႉတၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင်ၼႂ် 4 မူင်း ၾႆးတႄႇ မႆႈ၊ မႆႈ ၵွပ်ႈသင် ဢၼ်ဝႃႈၼၼ်ႉ ပႆႇႁူႉ။ မွတ်ႇၵႂႃႇ မိူဝ်ႈယၢမ်း 6 မူင်းၵၢင်ၼႂ်။ ၵူၼ်းဢၼ်သဵင်ႈၵႂႃႇၼၼ်ႉ ၸၢႆးၸၢမ်ႇ (ၸဝ်ႈ ၶွင်ႁၢၼ်ႉၶၢႆၾူၼ်း) ၵေႃႉၼိုင်ႈလႄႈ ၼၢင်းယိင်းၵေႃႉၼိုင်ႈ ဢၼ်ယူႇႁိမ်းႁိူၼ်းၸပ်းၵၼ်ၼၼ်ႉ။ ႁိူၼ်းတႄႉ မႆႈပႃးၵႂႃႇတင်း လင်ၵမ်းလဵဝ်ၶႃႈယဝ်ႉ။ ပႃးရူတ်ႉၵႃး ထႅင်ႈ 2 လမ်း။ ၸၢႆးၸၢမ်ႇ ၸဝ်ႈႁိူၼ်းၼၼ်ႉ ၶဝ်ႈၵႂႃႇၸွႆႈဢဝ် ပီႈၼွင်ႉၸိူဝ်ႉၶိူဝ်းၼႂ်း ႁိူၼ်းမၼ်း တႃႇပၢႆႈဢွၵ်ႇ လႄႈ မၼ်းၸၢႆးလႆႈၵႅၼ်ႉၵႂၼ်းၾႆးသေ လႆႈလူႉၵႂႃႇၶႃႈ”ဝႃႈၼႆ။
ၾႆးၼႆႉ တႄႇမႃးတီႈႁၢၼ်ႉၶၢႆၾူၼ်း မၼ်းၸၢႆး (စေတနာဖုန်းဆိုင်)၊ ယဝ်ႉၵေႃႈ သိုပ်ႇမႆႈပႃးႁၢၼ်ႉၶၢႆၶူဝ်းလႄႈ ႁၢၼ်ႉၶၢႆၾူၼ်း ထႅင်ႈႁၢၼ်ႉ ၼိုင်ႈ တင်းမူတ်း လႆႈမႆႈၵႂႃႇ 3 လင် ဝႃႈၼႆ။
ၵဵဝ်ႇၵပ်းလွင်ႈၾႆးမႆႈၼႆႉ ပဵၼ်ယွၼ်ႉသင်ၼႆ ပႆႇႁူႉလွင်ႈတၢင်းမၼ်းတႄႉတႄႉ။ ၵူၼ်းပိုၼ်ႉတီႈ ႁိမ်းႁွမ်းတႄႉ လၢမ်းဝႃႈ ပဵၼ်ယွၼ်ႉၾႆးၾႃႉသျွတ်ႉ ၵူၺ်းၵႃႈ လွင်ႈၼႆႉပႆႇၸၢင်ႈယိုၼ်ယၼ်လႆႈ ဝႃႈၼႆ။
ၵူၼ်းၼုမ်ႇၽူႈဢၼ်တူင်ႉၼိုင်တူင်ႇဝူင်းၵူၼ်း ၵူၼ်းသီႇပေႃႉ လၢတ်ႈဝႃႈ “ ၸၢႆးၸၢမ်ႇၼႆႉ ပဵၼ်ၽူႈၼမ်းၼႂ်းၵေႃလိၵ်ႈလၢႆး တႆးတီႈၵူတ်ႉၶၢႆ။ ၾၢႆႇလိၵ်ႈလၢႆးၵေႃႈ မၼ်းၸၢႆးၶဝ်ႈပႃးတူင်ႉၼိုင်။ လွင်ႈၵေႃႇသၢင်ႈၵွင်းမူးၸဝ်ႈဝုၼ်းၸုမ်ႉတီႈသႅၼ်ဝီၵေႃႈ ၶဝ်ႈပႃး၊ လွင်ႈႁဵတ်းလွင်ႈမူတ်းသႂ် ၸိူဝ်းၼႆႉ ပဵၼ်မၼ်းဢွၼ်ႁူဝ်ၶဝ်ႈပႃးတူင်ႉၼိုင်။ လႆႈဝႃႈမၼ်းၸၢႆးပဵၼ်တီႇ ပဵၼ်ထႅၼ်ႈ ၼႂ်းၸုမ်းၵူၼ်းၼုမ်ႇၵူတ်ႉၶၢႆတႄႉတႄႉ။ လႆႈလူႉသုမ်းမၼ်းၸၢႆးၼႆႉ တွၼ်ႈတႃႇၵူၼ်းၼုမ်ႇႁဝ်းၶႃႈ ပဵၼ်ဢၼ်သေးလၢႆ၊ ၸႂ်ဢမ်ႇလီၸွမ်းတႄႉတႄႉၶႃႈ”ဝႃႈၼႆ။
ႁၢၼ်ႉၶၢႆၾူၼ်းလႄႈ ၶၢႆၶူဝ်း တင်း 3 လင် ဢၼ်ၾႆးမႆႈၵႂႃႇၼႆႉ ယွၼ်ႉဝႃႈပဵၼ်ႁၢၼ်ႉယႂ်ႇ ပဵၼ်ၶူဝ်းၶွင်ၵႃႈၶၼ်ယႂ်ႇတင်းၼမ် ၼႆလႄႈ ၶူဝ်းၶွင် ဢၼ်လႆႈလူႉသုမ်း ပေႃးၼပ်ႉတူၺ်းၸိုင် တေဢမ်ႇယွမ်းၼပ်ႉႁူဝ်ႁဵင်သႅၼ်ပျႃး ၵူၼ်းၼႂ်းပိုၼ်ႉတီႈ လၢတ်ႈၼႄၼင်ႇၼႆ။
