ၾႆးမႆႈၼႂ်းႁွင်ႈၶၢႆၶူဝ်းလႄႈ ႁိူၼ်းၵူၼ်းဝၢၼ်ႈ တီႈပွၵ်ႉၵၢတ်ႇမၢၼ်ႈသၢင်း ၸႄႈဝဵင်းသီႇပေႃႉ လွင်ႈၵူၼ်းမၢတ်ႇၸဵပ်း လူႉတၢႆ ဢမ်ႇမီး ဝႃႈၼႆ။
ဝၼ်းတီႈ 03/05/2019 ယၢမ်းၵၢင်ၼႂ်ၸဝ်ႉ 3 မူင်းပၢႆၼၼ်ႉ ၾႆးလုၵ်ႉမႆႈ ႁိူၼ်းၵူၼ်းဝၢၼ်ႈ 6 လင် လႄႈ ႁၢၼ်ႉၶၢႆၶူဝ်း 6 ႁွင်ႈ ၼႂ်းပွၵ်ႉၵၢတ်ႇ မၢၼ်ႈသၢင်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၵူဝ်ႇမဵဝ်း ၸုမ်းၸွႆႈထႅမ်ပရႁိတ (နယ်စည်းမခြား ပရဟိတ သီပေါ) လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ၵႂႃႇ ၸွႆႈ ၶႃႈ။ ဢၼ်ၾႆးမႆႈႁိူၼ်း တင်းမူတ်း တႄႉ 6 လင်။ တႃႇ 4 လင်တႄႉ ၺႃးၾႆးႁုပ်ႇ မႆႈဢိတ်းဢွတ်း ဢမ်ႇတၼ်းမႆႈ။ ႁၢၼ်ႉၶၢႆ ၶူဝ်းတႄႉ မႆႈၵႂႃႇတင်းမူတ်း 6 ႁွင်ႈ။ ယွၼ်ႉသင်လႄႈ မႆႈဢၼ်ဝႃႈၼၼ်ႉတႄႉ ဢမ်ႇလႆႈႁူႉၶႃႈ” ဝႃႈၼႆ။
တီႈသိုဝ်ႇၶၢဝ်ႇ သႅၼ်ပၢႆးတႄႉ ဢွၵ်ႇဝႆႉဝႃႈ “ လႆႈႁူႉဝႃႈ ၾႆးမႆႈၼႆႉ ယွၼ်ႉသၢႆၾႆးပွင်ႇသေသျွတ်ႉလႄႈတႄႇမႆႈမႃး တီႈႁိူၼ်း ပႃႈ ယၢင်ၶၢႆႉဝေႇမႃး။ ပႃႈယၢင်ၶၢႆႉဝေႇၼႆႉ ပိုတ်ႇႁၢၼ်ႉ ၶၢႆၵုၼ်ႇႁႅင်ႈ၊ ၶၢႆၶူဝ်းၵုၼ်ႇၵူႈမဵဝ်းမဵဝ်း” ဝႃႈၼႆ။
လႆႈႁူႉဝႃႈ ၵူၼ်းၸိူဝ်းလႆႈထူပ်းၽေးၾႆးမႆႈၼႆႉ မီး 33 ၵေႃႉ၊ ၼႂ်းၼၼ်ႉ ပႃးလုၵ်ႈဢွၼ်ႇ 9 ၵေႃႉ၊ မၢၼ်ႈသၢင်းၼႆႉ ယူႇၼႂ်းၵႄႈ သီႇပေႃႉ – လႃႈသဵဝ်ႈ ၼႂ်းၸႄႈဝဵင်းသီႇပေႃႉ ယၢၼ်ၵႆလႃႈသဵဝ်ႈ 20 လၵ်းပၢႆ။ ယၢၼ်ၵႆသီႇပေႃႉ 38 လၵ်း ဝႃႈၼႆ။
