ၵၢၼ်ၽွမ်ႉႁူမ်ႈပႆႇပဵၼ် ၵူၼ်းမိူင်းလႆႈၵူဝ်ၶဵၼ်ၵူႈၾၢႆႇ

ပီ 2018 လိူၼ်မေႊ လိူၼ်ၵျုၼ်ႊ ပူၼ်ႉမႃးၼႆႉ ဢၼ်လီဢၼ်ႁၢႆႉ ၵဵဝ်ႇၵပ်းပိုၼ်းတႆး ၶိူဝ်းတႆး မီးသင် ပေႃးမႃးဝူၼ်ႉတူၺ်း မီးယူႇလၢႆၸိူဝ်ႉလၢႆပိူင်။

မိူၼ်ၼင်ႇ ၸုမ်းသိုၵ်းလွႆ ယိုၼ်ႈဝႂ်ၵဵပ်းၶွၼ်ႇ ႁႂ်ႈၸုမ်းပျီႇတုၸိတ်ႉသႅင်ၵႅဝ်ႇ သႂ်ႇၶွၼ်ႇ ငိုၼ်းၶႄႇ သႅၼ်ႁႃႈ မိုၼ်ႈယႅၼ်ႉ၊ သိုၵ်းလွႆ ႁႅၼ်းသိုၵ်းလေႃႇတိုၵ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းသိုၵ်းတႆး ၼင်ႇၵၼ် ယိုဝ်းၵၼ်၊ ၽူႈမီးၸၼ်ႉၾၢႆႇပႃႇမႆႉ ၼႂ်းၶွင်ႇသီႇဢဝ်ၶိုၼ်းၸိုင်ႈတႆး ၺႃးယိုဝ်းတၢႆၵိုၵ်းတီႈၼွၼ်း တီႈဝဵင်း ၼမ်ႉၸၢင် ၸိူဝ်းၼႆႉ – ပဵၼ် ပိုၼ်းႁၢႆႉၵိုၵ်းၵပ်းမိူင်းတႆး ပိုၼ်းတႆး။

ၵၢၼ်ဢၼ်လီ ဢၼ်တႆးႁဵတ်း တႃႇတႆးၼႂ်းလုၵ်ႈလိူၼ်ၼႆႉ လူးမီးသင် ပေႃးဝႃႈၼႆၸိုင် မိူၼ်ၼင်ႇ ၵူၼ်း မိူင်း ၼမ်ႉလၼ်ႈ ၺႃးၽေးၼမ်ႉထူမ်ႈ လၢႆမူႇလၢႆၸုမ်းႁူမ်ႈၵၼ်ၵႂႃႇၸွႆႈၵေႃႈမီး၊ ဢၼ်ၵႂႃႇၸွႆႈႁင်းၽႂ် ႁင်းမၼ်းၵေႃႈမီးၸိူဝ်းၼႆႉ ပဵၼ်လွင်ႈလီဢဝ်ၵုင်ႇမုၼ် ပဵၼ်ၵၢၼ်လီၵၢၼ်ၵျႃႉ။ တွၼ်ႈတႃႇ ၸုမ်းၽႂ်ၸုမ်း မၼ်း ဢၼ်ႁဵတ်းယူႇမႅၵ်းမႅၵ်း ႁင်းၽႂ် ႁင်းမၼ်းၵေႃႈ တေမီးထႅင်ႈယူႇ။ မၢင်ၸိူဝ်းၵေႃႈ တေမၢႆပဵၼ်ၵၢၼ် ၸိူဝ်ႉၸၢတ်ႈသေႁဵတ်း၊ မၢင်ၸိူဝ်းသမ်ႉ တူၺ်းၽွၼ်းလီ သုၼ်ႇတူဝ် သုၼ်ႇၸုမ်းသေႁဵတ်း၊ ၸိူဝ်းဢၢင်ႇၵၢၼ်ၸိူဝ်ႉၸၢတ်ႈသေႁဵတ်းၵေႃႈတေမီး တင်းၼမ်လူးၵွၼ်ႇ။

ၼပ်ႉသွၼ်ႇတူၺ်းထႅင်ႈ မီးသင်ၽွင်ႈ၊ ပိူဝ်ႈတႃႇသိုၵ်းတႆး တေၽွမ်ႉၵၼ် ၼႆတေႉ ပႆႇဝႃႈၵွၼ်ႇ ပၼ်ႁႃ ဢၼ်ပဵၼ်ယူႇၼၼ်ႉ ပိူဝ်ႈတႃႇတေၵႄႈလိတ်ႈလႆႈ၊ လႆႈႁူႉၽူႈၼမ်းသႅၼ်းပၢၼ်ၵၢင် ႁူပ်ႉၵၼ် ဢမ်ႇယွမ်း သွင်ၵမ်း။ တီႈလႅၼ်လိၼ်ၵမ်းၼိုင်ႈ တီႈၼႂ်းမိူင်းၵမ်းၼိုင်ႈ ။ ႁူပ်ႉၵၼ်ပဵၼ်တၢင်းၵၢၼ် ဢမ်ႇႁူပ်ႉပဵၼ် တၢင်းၵၢၼ်ၵေႃႈလီ ႁူပ်ႉဢုပ်ႇၵၼ်လႄႈ တေလႆႈဝႃႈပဵၼ်လွင်ႈလီ။

ၾၢႆႇၼိုင်ႈ သမ်ႉပဵၼ်ၽွင်း ဢၼ်ပဵၼ်ၽူႈၶဵၼ်သွင်မိူင်း လုမ်ႈၾႃႉ ၽူႈၼမ်းၶူဝ်းရီးယိူဝ်းႁွင်ႇ တင်း ၽူႈၼမ်းမိူင်းဢမေႊရီႊၵၼ်ႊ မႃးႁူပ်ႉၵၼ်တီႈမိူင်းသိင်ႇၶၽူဝ်ႊ။ ႁဵတ်းႁႂ်ႈတႆး တင်းလၢႆ တွင်ႈထၢမ် ၵၼ်ဝႃႈ ၽူႈၶဵၼ်လူင် ၼႂ်းလုမ်ႈၾႃႉ သွင်ၵေႃႉ ပေႃးႁူပ်ႉၵၼ်ယဝ်ႉ တႆးႁွင်ႇတႆးၸၢၼ်းႁဝ်းလူး တေႁူပ်ႉ ၵၼ်မိူဝ်ႈလႂ်။ ႁဝ်းပဵၼ်ၵူၼ်းၶိူဝ်းလဵဝ်ၵၼ်ၽႃသႃၵႂၢမ်းလၢတ်ႈႁဝ်းၵေႃႈမိူၼ်ၵၼ် ႁဵတ်းသင် ႁဝ်း ဢမ်ႇႁူပ်ႉ ၵၼ်လႆႈ ဢွၼ်ၵၼ်ထၢမ်မႃး တင်းၼမ်တင်းလၢႆ။

ၵမ်ႈၽွင်ႈၵေႃႈထၢမ်ဝႃႈ ၸိုင်ဝႃႈၶဝ်ႁဵတ်းတႃႇ ၸိူဝ်ႉၸၢတ်ႈတႆး ဝၢၼ်ႈမိူင်းတႆး။ ၵူၼ်းမိူင်းတႆး တုၵ်ႉၶ ယွၼ်ႉသိုၵ်းယွၼ်ႉသိူဝ်မႃးႁိုင်ၼႃႇယဝ်ႉ။ ၶဝ်ဢမ်ႇႁဵတ်းတႃႇၸိူဝ်ႉၸၢတ်ႈ ၶဝ်ႁဵတ်းတႃႇ သုၼ်ႇတူဝ် သုၼ်ႇၸုမ်းၶဝ် လႆႈယူႇလီၵိၼ်လီ ၵူၺ်းႁႃႉတေႃႈ ဝႃႈၼႆမႃးၵေႃႈမီး။

ၼႂ်းလုၵ်ႈလိူၼ်ၵျုၼ်ႊၼႆႉ ယႃႇဝႃႈတေၽွမ်ႉၵၼ်ယင်းပၢႆၽိတ်းမေႃးၵၼ် ထိုင်သၢႆၸႂ်လူးၵွၼ်ႇလႄႈ ႁဵတ်းႁႂ်ႈၵူၼ်းမိူင်းတႆး ယၢပ်ႇယၢၵ်ႈၸွမ်း ၸုမ်းယိပ်းၵွင်ႈတႄႉတႄႉ။

ပေႃးဢုပ်ႇလၢတ်ႈတႄႉ ဝႃႈမီးပၼ်ႁႃသင် ဢဝ်လၢႆးလီၵႄႈလိတ်ႈၼႆၼၼ်ႉ ပေႃးၵႂႃႇဢုပ်ႇတၢင်ႇၶိူဝ်းၵူၺ်း ၸႂ်ႉလၢႆးၼႆႉ။ ၽူႈၼမ်းတႆး ဢမ်ႇဢဝ်လၢႆးၼႆႉၵႄႈလိတ်ႈ ပၼ်ႁႃတေႃႇၵၼ် ႁႂ်ႈပဵၼ်ၵၢၼ်ၵမ်ႉထႅမ် ၼႂ်းၵၢၼ် ၸိူဝ်ႉၸၢတ်ႈမႃး။ ၵူၼ်းၵမ်ႈၽွင်ႈသမ်ႉ ဢမ်ႇလဵပ်ႈႁဵၼ်းထိုင် ငဝ်ႈႁၢၵ်ႈငဝ်ႈတေႃ သေ ၸွႆႈၵႄႈလိတ်ႈပၼ်ႁႃ ။ ယူႇၸမ်ၽႂ်ၵေႃႈပဵၼ်ၸႂ်မၼ်း၊ ၵိၼ်ၶဝ်ႈၽႂ်ၵေႃႈ ပဵၼ်ၸႂ်မၼ်း၊ လႆႈလီ လႆႈပဵၼ်ၸွမ်းၽႂ်ၵေႃႈ ပဵၼ်ၸႂ်မၼ်းသေ ယူႇၾၢႆႇလႂ်ၾၢႆႇၼိုင်ႈ ၽိတ်းမေႃး ၵၼ်ၼိူဝ်ၾဵတ်ႉၿုတ်ႉ ၼိူဝ်ဢွၼ်ႊလၢႆႊ။

ယၢမ်ႈလႆႈငိၼ်းဝႃႈ မိူဝ်ႈပၢၼ် ပုတ်ႉထၸဝ်ႈ တိုၵ်ႉၶီး ယူႇၼၼ်ႉ မီးၸဝ်ႈ ရႁၢၼ်း တူၼ်ႈၼိုင်ႈ ထၢမ်ဝႃႈ ၽႂ်ၶႃႈလႃႇတေပဵၼ်ၵေႃႉယႃႉ သႃသၼႃ ပုတ်ႉထမုၼ် သႅင်ၶမ်းၽြႃးပဵၼ်ၸဝ်ႈပေႃးႁၢႆ – ၼႆ၊ ပုတ်ႉထ ၸဝ်ႈ ၸီႉၵႂႃႇတီႈ ၸဝ်ႈသၢင်ႇဢွၼ်ႇ ဢၼ်တိုၵ်ႉသၵ်ႉ သၢၼ်ႇၵၢၼ်းၼၼ်ႉသေလၢတ်ႈဝႃႈ တူၺ်းလႄႈ တိၼ်ၸဝ်ႈသၢင်ႇဢွၼ်ႇသွင်ၶွၼ် ယဵပ်ႇသၢင်ႇၵၢၼ်း၊ မိုဝ်းမၼ်းၸဝ်ႈသမ်ႉပၼ်ႈၼမ်ႉသၢင်ႇၵၢၼ်း ။ ၵွပ်ႈၼၼ် ဢၼ်တေယႃႉ သႃသၼႃမုၼ်သႅင် ၶမ်းၽြႃးပဵၼ်ၸဝ်ႈႁၢႆၵေႃႈ ပဵၼ်ၽူႈပႂ်ႉပႃးသႃသၼႃ ၵူၺ်းဝႃႈၼႆ။

ၵွပ်ႈၼၼ် ဢၼ်တေယႃႉတႆးႁၢႆ ၼင်ႇႁိုဝ်တေဢမ်ႇပဵၼ်တႆးၶိုၼ်းၼၼ်ႉ တႅမ်ႈသင်လၢတ်ႈသင် တေႃႇၵၼ်ၵေႃႈ ႁႂ်ႈပႃးလိၵ်ႈတႆးၵႂၢမ်းတႆး၊ ဢၼ်သေႉၼႄးတႆး ယႃႇႁႂ်ႈပဵၼ်တႆးသေ တႆးႁႂ်ႈႁူမ်ႈၵၼ် ၸွႆႈၵၼ် ႁႂ်ႈတႆးၸဵဝ်းၽွမ်ႉႁူမ်ႈၵၼ်သေၵမ်း။

သဵင်ၶဝ်ႇႁွၵ်ႈ

ၶေႃႈမုလ်း – ၽူႈတွႆႇႁွၵ်ႈ မၢႆ 006 July, 2018