Friday, March 29, 2024

ၸုမ်းယိပ်းၵွင်ႇၵၢင်ႇ ၶဝ်ႈၸူၼ်ၼႂ်း ႁိူၼ်းၵူၼ်းဝၢၼ်ႈ လႆႈပိုတ်းယိုဝ်းၵၼ် တင်းပလိၵ်ႈ

Must read

ၸုမ်းယိပ်းၵွင်ႈၵၢင်ႇၸုမ်းၼိုင်ႈ ပႃးၵွင်ႈၸေးမိုဝ်း ၶဝ်ႈၸူၼ်ႁိူၼ်းၵူၼ်းဝၢၼ်ႈတီႈပွၵ်ႉဢွင်ႇမဵတ်ႉတႃႇ ဝဵင်းၼမ်ႉၶမ်း ၸူၼ်ၸဝ်ႈ ႁိူၼ်းယဝ်ႉသေ လႆႈမီးလွင်ႈပိုတ်းယိုဝ်းၵၼ် တင်းပလိၵ်ႈၼမ်ႉၶမ်း လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး။

ရူတ်ႉၶိူင်ႈ 2 လမ်း ၶွင်ၸုမ်းၵူၼ်းၸူၼ်
Photo by – ၵူၼ်းမိူင်းၼမ်ႉၶမ်း/ ရူတ်ႉၶိူင်ႈ 2 လမ်း ၶွင်ၸုမ်းၵူၼ်းၸူၼ် ၶီႇမႃး

ဝၼ်းတီႈ 01/05/2019 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉ ၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ဢဵၼ်ႁႅင်းၵူၼ်း မွၵ်ႈ 6 ၵေႃႉ သႂ်ႇၶူဝ်းၵူၼ်းႁိူၼ်း ပႃးၵွင်ႈၸေးမိုဝ်းၵၼ် ၶဝ်ႈၸူၼ်ၼႂ်းႁိူၼ်း ဢူးလဝ်းဝၢၼ်ႈ ယူႇပွၵ်ႉဢွင်ႇမဵတ်ႉတႃႇ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ ၵူၼ်းမိူင်းပွင်ႇၶၢဝ်ႇၸူး ပလိၵ်ႈမၢၼ်ႈ ႁူမ်ႈၵၼ်တင်း ပျီႇတူႉၸိတ်ႉပၢၼ်းသေး ႁွတ်ႈထိုင် ၶိုတ်းတၼ်းလႄႈ လႆႈပိုတ်းယိုဝ်းၵၼ် တင်းၸုမ်းယိပ်းၵွင်ႈၵၢင်ႇၼၼ်ႉ ဝႃႈၼႆ။

- Subscription -

ၵူၼ်းမိူင်းၼမ်ႉၶမ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽွင်း ၸဝ်ႈႁိူၼ်း ဢူးလဝ်းဝၢၼ်ႈ ပႆဢွၵ်ႇမႃး လဵၼ်ႈတၢင်း ၼွၵ်ႈဝၢင်းႁိူၼ်း မီးၸုမ်းၵူၼ်းၸူၼ်ၼၼ်ႉ ၶီႇရူတ်ႉၶိူင်ႈမႃး 3 လမ်း ၵူၼ်း 6 ၵေႃႉ။ လၢတ်ႈၵႂၢမ်းပလွင်ႈ၊ သမ်ႉၼုင်ႈၵူၼ်တႆး၊ ပႃးထူင်တႆး။ ၶဝ်မႃးမတ်ႉၵူၼ်းႁိူၼ်း 2 ၵေႃႉ။ ၵဵဝ်ႇၵပ်းလွင်ႈၼႆႉ ၵူၼ်းယူႇႁိမ်းႁွမ်းၼၼ်ႉ လႆႈ ႁၼ်သေ ဝႃႈပဵၼ်သိုၵ်းတ ဢၢင်း (ပလွင်ႈ) ၼႆသေ ၵပ်းသိုပ်ႇႁႃၽူႈမီးပုၼ်ႈၽွၼ်းပလိၵ်ႈယေးလႄႈ ပျီႇတူႉၸိတ်ႉပၢၼ်း သေး။ ႁဵတ်းၼၼ်ႉသေပ လိၵ်ႈလႄႈ ပျီႇတူႉၸိတ်ႉႁွတ်ႈၽႅဝ်မႃးၵေႃႈ လႆႈမီးၵၢၼ်ပိုတ်းယိုဝ်းၵၼ် ယူႇတီႈၸုမ်းယိပ်းၵွင်ႈ 6 ၵေႃႉၼၼ်ႉ တၼ်းပၢႆႈ လွတ်ႈၵၼ်” ဝႃႈၼႆ။

ၢၵ်ႇၵွင်ႇၽၢင်း ဢၼ်တူၵ်းဝႆႉ ၼႂ်းဝၢင်းႁိူၼ်
Photo by – ၵူၼ်းမိူင်းၼမ်ႉၶမ်း/ ၶွပ်ႇမၢၵ်ႇၵွင်ႇၽၢင်း ဢၼ်တူၵ်းဝႆႉ ၼႂ်းဝၢင်းႁိူၼ်း လုင်းလဝ်းဝၢၼ်ႈ ပွၵ်ႉဢွင်ႇမဵတ်ႉတႃႇ

မၼ်းၸၢႆးသိုပ်ႇလၢတ်ႈဝႃႈ “ ၵူၼ်းဝၢၼ်ႈၵူၼ်းပွၵ်ႉတႄႉ တိုၼ်းဝႃႈၶဝ်ပဵၼ်ၸုမ်းယိပ်း ၵွင်ႈၵၢင်ႇတဢၢင်း။ တီႈႁိူၼ်းလုင်း လဝ်းဝၢၼ်ႈၼၼ်ႉ လႆႈႁၼ်မီးႁွႆးလိူတ်ႈဝႆႉ ၸုမ်းၶဝ်လႅပ်ႈတိူဝ်ႉမၢတ်ႇၸဵပ်းဢိတ်းဢီႈ။ လႅၼ်ႈပၢႆႈၵေႃႉတၢင်း။ ရူတ်ႉၶိူင်ႈ 2 လမ်း ဢမ်ႇတၼ်းလႆႈဢဝ် ပွႆႇပႅတ်ႈဝႆႉသေ ဢဝ်တူဝ်လွတ်ႈ” ဝႃႈၼႆ။

ၸုမ်းယိပ်းၵွင်ႈၵၢင်ႇ ဢၼ်မႃးၶဝ်ႈၸူၼ်ဢဝ်ၶူဝ်းၶွင်ၼႂ်းႁိူၼ်းဢူးလဝ်းဝၢၼ်ႈၼၼ်ႉ လႆႈၵႂႃႇၶူဝ်းၶွင်ၼႂ်းႁိူၼ်းယေး မိူၼ် ၼင်ႇ ငိုၼ်းမၢၼ်ႈ 40 သႅၼ်ပျႃး၊ ၶမ်းသၢမ်ၵျၢပ်ႈ၊ ၾူၼ်းၼိုင်ႈလုၵ်ႈ၊ ၵၢၵ်ႇသေႃးၵႃး 2 မၢၵ်ႈ၊ ၵၢၵ်ႇသေႃးႁိူၼ်းၵေႃႈပႃး ဝႃႈၼႆ။

ၵူၼ်းၵႃႉ ၼမ်ႉၶမ်းၵေႃႉၼိုင်ႈလၢတ်ႈဝႃႈ“ ဢၼ်လႆႈႁူႉမႃးတႄႉ ၵူၼ်းႁိူၼ်းလင်ၼႆႉ ၶဝ်ၵဵဝ်ႇၵပ်းပျီႇတူႉၸိတ်ႉပၢၼ်းသေး။ ၸုမ်းတဢၢင်းၼၼ်ႉ ၶီႇရူတ်ႉၶိူင်ႈမႃး 3 လမ်း။ ဢဝ်ၵွင်ႈသႂ်ႇၼႂ်းထူင်ၸၢၼ်ႈ(ထူင်သႂ်ႇၶဝ်ႈ) သေမႃး။ ၵူၺ်းၵႃႈ ယူႇတီႈၾၢႆႇ ၸဝ်ႈၼႃႈတီႈပလိၵ်ႈၶဝ် တႄႉ ဢမ်ႇတီႉ ၺွပ်းၵုမ်းၶင်တူဝ်ၶဝ်လႆႈသေၵေႃႉ”ဝႃႈၼႆ။

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတူၺ်းတင်းၸုမ်းတဢၢင်း TNLA ယူႇၵေႃႈ ၵပ်းသိုပ်ႇဢမ်ႇလႆႈ လႄႈ ဢမ်ႇၸၢင်ႈယိုၼ်ယၼ်ပဵၼ်တၢင်းၵၢၼ်။ ၾၢႆႇပလိၵ်ႈၵေႃႈဢမ်ႇပိုၼ်ၽၢဝ်ႇ ပဵၼ်တၢင်းၵၢၼ်ဝႃႈ ၸိူဝ်းၶဝ်ပဵၼ်ၽႂ် ၸုမ်း လႂ်။

ၼႂ်း CCTV ဢၼ်ထၢႆႇဝႆႉ ၼႂ်းဝၢင်းႁိူၼ်းလုင်းလဝ်းဝၢၼ်ႈ
Photo by – ၵူၼ်းမိူင်းၼမ်ႉၶမ်း/ ၼႂ်း CCTV ဢၼ်ထၢႆႇဝႆႉ ၼႂ်းဝၢင်းႁိူၼ်းလုင်းလဝ်းဝၢၼ်ႈ ပွၵ်ႉဢွင်ႇမဵတ်ႉတႃႇ

ယူႇတီႈဢူးလဝ်းဝၢၼ်ႈ ၸဝ်ႈၶွင်ႁိူၼ်း လႆႈပိုတ်ႇလိူင်ႈဝႆႉတီႈႁူင်းပလိၵ်ႈ ၸႄႈဝဵင်းၼမ်ႉၶမ်းယဝ်ႉ ဝႃႈၼႆ။

မိူဝ်ႈဝူင်ႈပူၼ်ႉမႃးၼၼ်ႉၵေႃႈ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈတီႉၺွပ်းၵူၼ်းဝၢၼ်ႈ ၼႂ်းၸႄႈဝဵင်းၼမ်ႉၶမ်း ၵေႃႉၼို င်ႈ ပဵၼ်ၸၢဝ်းၶႄႇ။ ပေႃႈမႄႈပီႈၼွင်ႉၵူၼ်းႁိူၼ်းလႆႈၵႂႃႇထုတ်ႇမႃးၶိုၼ်း သဵင်ႈငိုၼ်းႁိမ်းၸမ် 100 သႅၼ်ပျႃး ၵူၼ်းၼမ်ႉၶမ်း ပွၵ်ႉဢွင်ႇမဵတ်ႉတႃႇလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း