ၵႃးတၢင်ႇဝူဝ်း 2 လမ်း ၺႃးယိုဝ်း ၼႂ်းၸႄႈဝဵင်းသီႇပေႃႉ ၵူၼ်းႁေႃႈၵႃး ၵေႃႉၼိုင်ႈၺႃးယိုဝ်းတၢႆ၊ ထႅင်ႈၵေႃႉၼိုင်ႈမၢတ်ႇၸဵပ်း ၵဵဝ်ႇလူၺ်ႈလွင်ႈယိုဝ်းၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် ဢၼ်ဝႃႈၼၼ်ႉ ပႆႇႁူႉ။
ဝၼ်းတီႈ 01/05/2019 ယၢမ်းႁူဝ်ၶမ်ႈ 5 မူင်းၶိုင်ႈ ၵႃးတၢင်ႇဝူဝ်းလမ်းၼိုင်ႈ ၺႃးယိုဝ်းတီႈႁိမ်းမၢၼ်ႈႁႆး ၼႂ်းၸႄႈဝဵင်းသီႇပေႃႉ တိူဝ်ႉၺႃးၸဝ်ႈၵႃး လႆႈမၢတ်ႇၸဵပ်း။ ထိုင်မႃးယၢမ်းၵၢင်ၶမ်ႈ မွၵ်ႈ 7 မူင်းၼၼ်ႉ ၵႃးတၢင်ႇဝူဝ်းထႅင်ႈလမ်းၼိုင်ႈ ၺႃးယိုဝ်းၼႂ်း ၵႄႈဝၢၼ်ႈပၢင်ႇၸဝ်ႈမိူင်းလႄႈ ဝၢၼ်ႈသူပ်းလၢင်း ၸႄႈဝဵင်းသီႇပေႃႉ ယိုဝ်းတိူဝ်ႉၺႃးၸဝ်ႈၵႃးသေ လူႉတၢႆၵေႃႉၼိုင်ႈ ဝႃႈၼႆ။
ၵူဝ်ႇမဵဝ်း ၸုမ်းၸွႆႈထႅမ် ပရႁိတ သီႇပေႃႉ (နယ်စည်းမခြား ပရဟိတ သီပေါ) လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ယိုဝ်းၵႃး တၢင်ႇဝူဝ်း မိူဝ်ႈၶမ်ႈဝႃးၼၼ်ႉ ပဵၼ် 2 ပွၵ်ႈ။ ၵူၼ်းႁေႃႈၵႃး ၵေႃႉၼိုင်ႈတၢႆ၊ ထႅင်ႈၵေႃႉၼိုင်ႈတိူဝ်ႉၺႃးတီႈပုမ် လႆႈမၢတ်ႇၸဵပ်း။ ပၼ်ႁႃၸိူင်ႉၼႆ ဢမ်ႇပဵၼ်မႃး ႁိုင်ယဝ်ႉ။ ၵူၼ်းဢၼ်မႃးယိုဝ်းၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ပႆႇလႆႈႁူႉ” ဝႃႈၼႆ။
ၵႃးတၢင်ႇဝူဝ်းၼႆႉ ပဵၼ်ၵႃးသႅၼ်း 12 လေႃႉ မႃးၸွမ်းၵၼ် 7 လမ်း လုၵ်ႉတိူင်းၸႄႈၵႅင်းသေ တေတေႃႉဝူဝ်းၸိူဝ်းၼႆႉ သူင်ႇ ၸူးတၢင်းမူႇၸေႊတႃႇတေႃႉၶဝ်ႈမိူဝ်းၶၢႆၼႂ်းမိူင်းၶႄႇ။ ၵႃးၸိူဝ်းၼႆႉ ပဵၼ်ၵႃးၼႂ်းၶွမ်ႊပၼီႊၵေႇၶႆႇၵျေႃႇ ဝႃႈၼႆ။
ၼႂ်းၸိုင်ႈတႆးပွတ်းႁွင်ႇ ၼႂ်းၵႄႈ သီႇပေႃႉလႄႈ ၵျွၵ်ႉမႄးၼႆႉ ၵႆႉမီးၸုမ်းၵူၼ်းႁၢႆႉ လၵ်ႉငွႆးယိုဝ်း ၵႃးတၢင်ႇဝူဝ်းယူႇတႃႇသေႇ ၵူၼ်းႁေႃႈၵႃး ၵူၼ်းၸွမ်းၵႃး ၵႆႉၺႃးယိုဝ်း လႆႈမၢတ်ႇၸဵပ်းလူႉတၢႆၵၼ်မႃးၵေႃႈမီးၼမ် ဝႃႈၼႆ။