ၸုမ်းဢူၺ်းလီပွတ်းႁွင်ႇ လႄႈ သုၼ်ၵၢင်ငမ်းယဵၼ် မႄးလီၸိူဝ်ႉၸၢတ်ႈ NRPC ႁူပ်ႉဢုပ်ႇၵၼ် ပဵၼ်ပွၵ်ႈၵမ်းသွင် တီႈမူႇၸေႊ လႆႈၸႂ်ၵၼ်ဝႃႈ ႁၢင်လိူၼ်မေႊ (May) တေမႃးၼႆႉ တေသိုပ်ႇႁူပ်ႉၵၼ်ထႅင်ႈ။

ဝၼ်းတီႈ 30/04/2019 ယၢမ်းၵၢင်ၼႂ် 9 မူင်း ၸုမ်းဢူၺ်းလီပွတ်းႁွင်ႇ 4 ၸုမ်း တင်း NRPC ႁူပ်ႉဢုပ်ႇၵၼ် တီႈလုမ်းၸုမ်း ၵူၼ်းၵႃႉလႅၼ်လိၼ် (ကုန်သည်များအသင်းရုံး) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ဢုပ်ႇဢူဝ်းတူၵ်းလူင်းလႆႈၸႂ်ၵၼ်ဝႃႈ ႁၢင် လိူၼ်မေႊ ဝူင်ႈထီႉသၢမ် တေသိုပ်ႇႁူပ်ႉၵၼ်ထႅင်ႈ ဝႃႈၼႆ။

ၵႅမ်ၸွမ်ႁၢၼ် တႃႉၽူင်းၵျေႃႇ ၽူႈၼမ်းၼႂ်းၵူႈလွင်ႈလွင်ႈ တပ်ႉသိုၵ်းတဢၢင်း TNLA လၢတ်ႈတီႈၸုမ်းၽူႈတွႆႇႁွၵ်ႈဝႃႈ “ လွင်ႈဢုပ်ႇဢူဝ်းၵၼ်ၼႆႉ တေလႆႈဝႃႈ လႆႈၽွၼ်းပၢင်ႈတႄႉတႄႉ။ လႆႈၸႂ်ၵၼ်ဝႃႈ ႁၢင်လိူၼ်မေႊ ဝူင်ႈထီႉသၢမ် တေသိုပ်ႇ ဢုပ်ႇဢူဝ်းၵၼ်ထႅင်ႈ။ ၵူၺ်းၵႃႈ တေႁူပ်ႉၵၼ်တီႈလႂ် ဢၼ်ဝႃႈၼၼ်ႉ ပႆႇႁူႉ။ ၵဵဝ်ႇၵပ်းလွင်ႈပၢင်တိုၵ်းတႄႉ ဢမ်ႇလႆႈဢုပ်ႇ ၵၼ်သင်” ဝႃႈၼႆ။

လွင်ႈတေႁူပ်ႉၵၼ်ၼႂ်းလိူၼ်မေႊတေမႃးၼၼ်ႉ တေသိုပ်ႇဢုပ်ႇဢူဝ်း ၼႂ်းၶၵ်ႉၵၢၼ် ဢၼ်လႆႈတူၵ်းလူင်းၵၼ်ဝႆႉ လွင်ႈ ၵိုတ်းတိုၵ်းၸိူဝ်းၼၼ်ႉၵႂႃႇ ဝႃႈၼႆ။

ဢူးသေႃႇထေး ၽူႈၶၢၼ်ပၢၵ်ႇ တီႈၵိူဝ်းၵုမ် လုမ်းၸွမ်ၸိုင်ႈလၢတ်ႈဝႃႈ “ ႁဝ်းၶႃႈ တင်းသွင်ၾၢႆႇ တူၵ်းလူင်းၵၼ်ဝႆႉ မူႇပိူင်တႃႇ တေၸဵဝ်းႁူပ်ႉ ၵၼ်လႆႈထႅင်ႈၼၼ်ႉ” ဝႃႈၼႆ။

ၵဵဝ်ႇၵပ်းလွင်ႈႁူပ်ႉၵၼ် ပွၵ်ႈၵမ်းၼႆႉ တီႈလႅၼ်လိၼ် တႆး – ၶႄႇ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇပွၵ်ႈၵမ်းၼႆႉ တၢင်းၾၢႆႇ NRPC သမ်ႉ ၵႅမ်ႁူဝ်ပဝ်ႈ ဢူးတဵင်းသေႃႇ ဢွၼ်ႁူဝ်။ တၢင်းၾၢႆႇၸုမ်းဢူၺ်းပွတ်းႁွင်ႇ 4 ၸုမ်းသမ်ႉ တူဝ်တႅၼ်း ၼႂ်းၸုမ်းၶၢင် KIA၊ ၸုမ်းတဢၢင်း TNLA၊ ၸုမ်းၵဝ်ႈၵၢင်ႉ MNDAAလႄႈ ၸုမ်းရၶႅင်ႇ AA ၸိူဝ်းၼႆႉ ၶဝ်ႈႁူမ်ႈ။

လိူဝ်ၼၼ်ႉ ၸုမ်းဝႃႉ UWSA တင်း ၸုမ်းဝၢၼ်ႈႁႆး SSPP သမ်ႉ သူင်ႇတူဝ်တႅၼ်းၶဝ်ႁူမ်ႈလဵပ်ႈႁဵၼ်းၸွမ်း ဝႃႈၼႆ။

ထႅင်ႈၾၢႆႇၼိုင်ႈၵေႃႈ ယူႇတီႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈၶဝ် ပိုၼ်ၽၢဝ်ႇၾၢႆႇလဵဝ်ဝႆႉ လွင်ႈၵိုတ်းတိုၵ်းတႃႇၶၢဝ်းတၢင်း 4 လိူၼ်ၼၼ်ႉ ၶွပ်ႈႁွတ်ႈထိုင်မႃး ၼႂ်းဝၼ်းမိူဝ်ႈၼႆႉ ဝၼ်းတီႈ 30 လိူၼ်ဢေႊပရိူဝ်ႊယဝ်ႉလႄႈ လွင်ႈဝႃႈ တေသိုပ်ႇၵိုတ်း ထႅင်ႈၼႄႇ၊ ဢမ်ႇၵိုတ်းၼႆၼၼ်ႉ တေတူၺ်းၽွၼ်းပၢင်ႈ တီႈပၢင်ႁူပ်ႉထူပ်းၵၼ် တီႈမူႇၸေႊၼႆႉၵွၼ်ႇ ၵႅမ်ၸွမ်ႁၢၼ် ဢူး သေႃႇမိၼ်းထုၼ်း တပ်ႉသိုၵ်းလူင်ပွင်ၸိုင်ႈမၢၼ်ႈ လၢတ်ႈတီႈၼေႇပျီႇတေႃႇ ၼႂ်းဝၼ်းမိူဝ်ႈၼႆႉ ၼင်ႇၼႆ။