ဝၼ်းတီႈ 17/4/2019 ၼႆႉ ၸုမ်းဝႃႉ UWSP/UWSA ၵေႃႇ တင်ႈမႃး ၶွပ်ႈတဵမ် 30 ပီလႄႈ ႁၢင်ႈႁႅၼ်းႁဵတ်းပွႆးလူင် ၼႄလွင်ႈယိုင်ႈယႂ်ႇ ႁႅင်းသိုၵ်း၊ ႁႅင်းၵွင်ႈႁႅင်းၵၢင်ႇ၊ ႁႅင်းပၢႆးမၢၵ်ႈမီး – ၸိူဝ်းလႆႈၶတ်းသၢင်ႈႁၢင်ႈပွင်မႃး။

ၶၢဝ်းတၢင်း 30 ပီၼႆႉ ၸုမ်းဝႃႉ UWSP/UWSA ႁဵတ်းသင်မႃးလၢႆလၢႆ ၊ 1989 ၽိုၼ်ႉဝၢႆႇၽၢတ်ႇဢွၵ်ႇ ပႃႇတီႇၶွမ်ႊမိဝ်ႊ ၼိတ်ႉမိူင်းမၢၼ်ႈ CPB သေ ၵိုတ်းတိုၵ်းၵၼ် တင်း လူင်ပွင်ၸိုင်ႈသိုၵ်းမၢၼ်ႈ။ ယၼ်ႇပၵ်းငဝ်ႈငုၼ်း တီႈဝဵင်းပၢင်သၢင်း သေ ပူၵ်းပွင်ပၢႆးမၢၵ်ႈမီး။

ၼႃႈလိၼ်ဢၼ်ၵုမ်းၵမ်ဝႆႉ သီႇၸေႈဝဵင်း – ပၢင်ဝၢႆ ၊ ၼႃၽၢၼ်း၊ မိူင်းမႂ်ႇ၊ ပၢင်သၢင်း(ပၢင်ၶမ်း) ပူၵ်းပွင်ၵႅၼ်ႇၶႅင်၊ တင်ႈတႄႇ ပီ 1997 ၵႂႃႇၽိုတ်ႉယၼ်ႇပၵ်း တၢင်းလႅၼ်လိၼ်ထႆး ၼႂ်းၸႄႈဝဵင်းမိူင်းတူၼ် မိူင်းသၢတ်ႇ သေ မၢႆ ပဵၼ်ၼႃႈလိၼ်ဝႃႉ ပွတ်းၸၢၼ်း။

ၶိူဝ်းဝႃႉ ၵူၼ်းဝႃႉ ပဵၼ်ၸိူဝ်ႉသၢႆ လွႆ(တဢၢင်း)၊ မွၼ်း၊ ၶမဵၼ် ၶဝ်ၸိူဝ်းၼႆႉ ဝႃႈၼႆသေတႃႉ ဢဝ်ၵႂၢမ်းၶႄႇ လိၵ်ႈၶႄႇ ပဵၼ်လၵ်း၊ လုၵ်ႈလၢင်း ၽူႈယႂ်ႇၵူၼ်းလူင်ၵေႃႈ သူင်ႇႁဵၼ်းမိူင်းၶႄႇၵမ်ႈၼမ်။ လုၵ်ႈၵူၼ်းသိုၵ်း ၵူၼ်းမိူင်းတႄႉ မွၵ်ႇႁွင်ႉ ဢဝ်ၶူးသွၼ်တၢင်းမိူင်းၶႄႇ၊ ၵူၼ်းၼုမ်ႇဝႃႉ ၸိူဝ်းၵႂႃႇယဝ်ႉႁူင်းႁဵၼ်း/ၸၼ်ႉၸွမ်တၢင်းမိူင်းၶႄႇၸိူဝ်းၼၼ်ႉ မႃးႁူမ်ႈၵၼ်ပူၵ်းပွင်။

ၾၢင်ႁၢင်ႈ ဝႆႉ တုင်းၸိူဝ်ႉၸၢတ်ႈမိူင်းႁူမ်ႈတုမ် ပဵၼ်တီႈၼိုင်ႈ၊ တုင်းပႃႇတီႇ တပ်ႉသိုၵ်း ပဵၼ်သွင်။ ဢမ်ႇမၢႆတူဝ်ၵဝ်ႇ ယူႇၵိုၵ်းၵပ်းမိူင်းတႆး၊ သွၼ်ႇပဵၼ် ၸႄႈမိူင်းဢၼ်ၼိုင်ႈ ဢၼ်ယူႇၵိုၵ်းၵပ်း လူင်ပွင်ၸိုင်ႈၼေႇပျီႇတေႃႇ။ ၵူၺ်းၵႃႈ သမ်ႉဢမ်ႇထွမ်ႇၶေႃႈၸီႉသင်ႇတီႈၼေႇပျီႇတေႃႇ။

ၵၢၼ်လုမ်းၵၢၼ်ၸႆး ၸႂ်ႉလိၵ်ႈၶႄႇ၊ ၵႂၢမ်းၶႄႇ၊ ငိုၼ်းၶႄႇ ပဵၼ်တၢင်းၵၢၼ်လႄႈ မိူၼ်ႁၢင်ႈ ၸမ်ၸႂ်မိူင်းၶႄႇလိူဝ်။

ၵၢၼ်ပၢႆးမၢၵ်ႈမီး ဢၼ်ႁဵတ်း ၼႂ်းမိူင်းႁူမ်ႈတုမ် မီးလၢႆလၢႆသႅၼ်း၊ တင်ႈၶွမ်ႊပၼီႊ သိုဝ်ႉၶၢႆသႅင်ၶဵဝ်၊ ၶွမ်ႊပၼီႊ သၢႆၵၢၼ်မိၼ်၊ သူၼ်ယၢင်တင်ရႃႇပႃႇ၊ ႁဵတ်းႁူင်းၸၢင်ႈၾႆးၾႃႉ၊ လဵင်ႉၵႆႇလဵင်ႉမူ၊ ၶုတ်းႁႄႈ ၶုတ်းၶမ်း … ပၢႆးမၢၵ်ႈမီး ၸဵမ်ၸိူဝ်းၼႆႉ သေတႃႉ ၺႃး မိူင်းဝၼ်းတူၵ်းမၢႆ ၽူႈၼမ်းဝႃႉ ၶဝ်ႈသၢႆမၢႆလမ် ၵဵဝ်ႇၶွင်ႈယႃႈမဝ်းၵမ်။ ၸုမ်းဝႃႉ တႄႉ ဢမ်ႇႁပ်ႉ ပၢၵ်ႈပႅတ်ႈသေ ပိုတ်ႇလၢတ်ႈဝႃႈ ပဵၼ်ၵၢၼ်ၶႃႉၸိုဝ်ႈၶၢႆသဵင်ၵၼ်ၵူၺ်း – ဝႃႈၼႆ။

ၸုမ်းဝႃႉၼႆႉ ဢိင်ၼိူဝ် ပၢႆးမၢၵ်ႈမီးႁႅင်းယႂ်ႇသေ ၼႂ်းပိုၼ်ႉတီႈၵေႃႈ ၼႄၾၢင်ႁၢင်ႈ ပူၵ်းပွင်ၶိုၼ်ႈယႂ်ႇ၊ ႁိူၼ်းတိုၵ်းလူင် ဢၼ်ႁဵတ်းၵၢင်ဝဵင်းပၢင်သၢင်းၼၼ်ႉ သုင် 47 ၸၼ်ႉ၊ ၼႂ်းဝဵင်းလူင် ၶွင်လူင်ပွင်ၸိုင်ႈမၢၼ်ႈ ၼႂ်းတႃႈၵုင်ႈ၊ ဝဵင်းလိူဝ်ႇ ပႃးၸဵမ် ၼေႇပျီႇတေႃႇ ယင်းဢမ်ႇမီးႁိူၼ်းတိုၵ်းသုင် လိူဝ် 40 ၸၼ်ႉ။

ယွၼ်ႉမီးႁႅင်းငိုၼ်းယႂ်ႇ လႄႈ ၼႂ်းၸုမ်းယိပ်းၵွင်ႈၵၢင်ႇ တင်းသဵင်ႈ ၸုမ်းဝႃႉ ဢမ်ႇလူဝ်ႇၼွမ်းတေႃႇၽႂ်၊ ပၢင်ၵုမ် ၸုမ်းယိပ်းၵွင်ႈၵၢင်ႇ ဢၼ်ႁဵတ်းတၢင်း လႅၼ်လိၼ် တႆး – ထႆး၊ ယၢင်း – ထႆး၊ ၶၢင် – ၶႄႇ ၸိူဝ်းၼႆႉ ဢမ်ႇသူႈ ၵႂႃႇၶဝ်ႈႁူမ်ႈၸွမ်း။ ႁပ်ႉပဵၼ်ၸဝ်ႈတႃႇၼ လူင်သေ မွၵ်ႇႁွင်ႉဢဝ် ၸုမ်းယိပ်းၵွင်ႈၵၢင်ႇတင်းသဵင်ႈ ႁဵတ်းပၢင်ၵုမ် တီႈပၢင်သၢင်းမႃးလၢႆလၢႆၵမ်း။

ထိုင်တီႈ ပေႃးၶွၼ်ႈတုမ်လႆႈ ၸုမ်းယိပ်းၵွင်ႈၵၢင်ႇ – ၸုမ်းသိုၵ်းၶၢင် KIA ၊ ၸုမ်းသိုၵ်းၵဝ်ႈၵၢင်ႉ MNDAA ၊ ၸုမ်းသိုၵ်းမိူင်းလႃး NDAA ၊ ၸုမ်းသိုၵ်းရၶႅင်ႇ AA ၊ ၸုမ်းသိုၵ်းတဢၢင်း(လွႆ TNLA) ၊ ၸုမ်းသိုၵ်း SSPP သေ ၵေႃႇတင်ႈ ၸုမ်းဢုပ်ႇဢူဝ်းလွင်ႈငမ်းယဵၼ် မိူင်းႁူမ်ႈတုမ်ၾႅတ်ႊတရႄႊ FPNCC သေ ႁႃတိုဝ်ႉတၢင်း ဢုပ်ႇဢူဝ်းၵၢၼ်မိူင်း တင်း လူင်ပွင်ၸိုင်ႈၼေႇပျီႇတေႃႇ။

ၵႂၢမ်းႁဝ်းမီးဝႆႉဝႃႈ “ၽႂ်မီးငိုၼ်းပဵၼ်ၸဝ်ႈ၊ ၽႂ်မီးၶဝ်ႈပဵၼ်ၶုၼ်” – ပၢၼ်ႁဝ်းမီးငိုၼ်း ပၢၼ်ႁဝ်းလႆႈပဵၼ်ၸဝ်ႈမႃးယဝ်ႉ၊ ပၢၼ်ႁဝ်းမီးၶဝ်ႈ ပၢၼ်ႁဝ်းလႆႈပဵၼ်ၶုၼ်မႃးယဝ်ႉ လႄႈ မႃႇၼၵုမ်ႇယႂ်ႇၸွမ်း ပိုၼ်းမိူဝ်ႈသိုၼ်း၊ ၵုမ်ႇၵဵဝ်ႉဢိူင်ႈၸွမ်း ပိုၼ်း တိၵ်းတိၵ်းသေ ၽိတ်းၽႅၵ်ႇတႅၵ်ႇငၢၵ်ႈၵၼ်ယူႇ မႅၵ်းမႅၵ်း တႄႉ ၸုမ်းလႂ်ၵေႃႈတေဢမ်ႇၶိုၼ်ႈယႂ်ႇ ၊ ၵူၼ်းမိူင်းၵေႃႈတေတုၵ်ႉယၢၵ်ႈၸွမ်း။ ၸူဝ်ႈတိုၵ်ႉမီး ၶၢဝ်းယၢမ်း လီႁႃတၢင်းသၢၼ်မိုဝ်းၵၼ် တိုၼ်ႇလုၵ်ႉသေ ႁူမ်ႈၵၼ် ပူၵ်းပွင်ၵႂႃႇ ၵူႈပႃႈၵူႈၾၢႆႇ ……..

သဵင်ၶဝ်ႇႁွၵ်ႈ

ၶေႃႈမုလ်း – ၽူႈတွႆႇႁွၵ်ႈ မၢႆ 016 April, 2019