ၵူၼ်းမိူင်းမူႇၸေႊ ၼမ်ႉၶမ်း ၺႃးၵဵပ်းၶွၼ်ႇႁၢဝ်ႈႁႅင်း ႁူပ်ႉတၢင်းယၢပ်ႇၽိုတ်ႇ

ၵူၼ်းမိူင်း ၼႂ်းၸႄႈဝဵင်းၼမ်ႉၶမ်း မူႇၸေႊ ၺႃးၸုမ်းယိပ်းၵွင်ႈၵၢင်ႇ ၵဵပ်းၶွၼ်ႇ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း မီးလွင်ႈ ယၢပ်ႇၽိုတ်ႇၵိၼ်းၸႂ် ဝႃႈၼႆ။

ၵူၼ်းၼမ်ႉၶမ်း လၢတ်ႈဝႃႈ “ တပ်ႉသိုၵ်းလွတ်ႈလႅဝ်းၶၢင် KIA တပ်ႉၸုမ်း မၢႆ 4 တႅမ်ႈလိၵ်ႈလူင်းလၢႆးမိုဝ်း သူင်ႇထိုင်တီႈ ပေႃႈ မႄႈၵူၼ်းမိူင်း ၼႂ်းၸႄႈ ဝဵင်းၼမ်ႉၶမ်း မူႇၸေႊ ႁႂ်ႈဢွၼ်ၵၼ်ၵႂႃႇသႂ်ႇၶွၼ်ႇပၼ် တီႈၽူႈမီးပုၼ်ႈၽွၼ်း ႁႂ်ႈယဝ်ႉၼႂ်းဝၼ်းတီႈ 30/04/2019 ၼႆႉ ဝႃႈၼႆ။

ၵူၼ်းမိူင်းၼမ်ႉၶမ်း ဢမ်ႇၶႂ်ႈဢွၵ်ႇၸိုဝ်ႈ ဢႃယု 30 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶႃႈလႆႈႁူႉတႄႉ ၶဝ်တေၵႂႃႇတၢင်း ပွတ်းၼမ်ႉၶမ်း မူႇၸေႊ ၸိူဝ်းပဵၼ် ႁၢၼ်ႉၶၢႆၶူဝ်းၶွင်/ ႁၢၼ်ႉယႂ်ႇ ႁၢၼ်ႉလူင် ၸိူဝ်းၼႆႉဢွၼ်တၢင်း မိူၼ်ၼင်ႇ ပမ်ႉၼမ်ႉမၼ်း၊ ၵႃးၵိၵ်ႉ၊ တႃႈႁိူဝ်း၊ ႁၢၼ်ႉမႄးရူတ်ႉ၊ ႁၢၼ်ႉ ၶၢႆၶူဝ်း (စတိုး/ကုန်စုံဆိုင်) ၸိူဝ်းၼႆႉ။ ဢၼ်မႃးၵဵပ်းၼၼ်ႉ မၼ်းဢမ်ႇၸႂ်ႈၶၢင် ဢၼ်လဵဝ်ၵူၺ်း လွႆၵေႃႈမႃးၵဵပ်း ၽႅဝ်ၼႂ်းဝဵင်း ယူႇ” ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၵဵပ်းတႄႉၶဝ်တႄႇၵဵပ်းမႃးယဝ်ႉ ဢၼ်ၶႃႈႁဝ်းၶဝ်ႁူႉတႄႉ မၼ်းတေပဵၼ်တီႈတႃႈႁိူဝ်း။ ၸွမ်းၼႂ်းဝဵင်းတႄႉ ပႆႇလႆႈငိၼ်း၊ ဢၼ်ၶဝ်တေၵဵပ်းၼႆႉ တေၵဵပ်းၸွမ်းတႃႈႁိူဝ်း ပွတ်းတၢင်းတႂ်ႈ ၼႂ်းၵႄႈၼမ်ႉၶမ်း – မူႇၸေႊ ၸိူဝ်းၼၼ်ႉၶႃႈ” ဝႃႈၼႆ။

ၸုမ်းၶၢင် KIA ၼႆႉ မိူဝ်ႈပီၵၢႆ ၶဝ်မႃးၵဵပ်းၶွၼ်ႇၸွမ်းပမ်ႉၼမ်ႉမၼ်း ၸႄႈဝဵင်းၼမ်ႉၶမ်းၵူၺ်း တၢင်ႇၸိူဝ်း တၢင်ႇတီႈတႄႉ ၶဝ် ဢမ်ႇႁတ်းၵဵပ်း လင်ၼႆႉမႃး ၸင်ႇၶဝ်ႈမႃးၵဵပ်းၽႅဝ်ၼႂ်းဝဵင်းၼႆႉ ၵူၼ်းမိူင်းၼမ်ႉၶမ်း ၵေႃႉၼိုင်ႈလၢတ်ႈ။

သိုဝ်ႇၶၢဝ်ႇတႆးလွတ်ႈလႅဝ်း ၶွင်တပ်ႉသိုၵ်း RCSS/SSA ဢွၵ်ႇဝႆႉတႄႉဝႃႈ မိူဝ်ႈဝၼ်းတီႈ 6 လိူၼ်ဢေႊပရိူဝ်ႊၼႆႉ တပ်ႉၵွင်မၢႆ 9 ၾၢႆႇတႂ်ႈၵုမ်းၵမ် တပ်ႉ ၸုမ်း 6 တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ၼႆႉ ၵႂႃႇတီႉၺွပ်းဢဝ်တူဝ် ၸၢႆးလႅင်းသႂ် ထိုင်တီႈ ႁိူၼ်း ဝၢၼ်ႈမေႃႈတွင်း ၵၢတ်ႇ ၸႄႈဝဵင်းမူႇၸေႊသေ ထိုင်ဝၼ်းတီႈ 13 လိူၼ်ဢေႊပရိူဝ်ႊ ၸင်ႇပွႆႇပၼ်တူဝ်ပွၵ်ႈၶိုၼ်းႁိူၼ်း ဝႃႈၼႆ။

သိုၵ်းၶၢင် KIA ၼႆႉပဵၼ်လုၵ်ႈၸုမ်း FPNCC ဢၼ်ၸုမ်းသိုၵ်းဝႃႉ ဢွၼ်ႁူဝ်ဝႆႉ။