ၵႃးႁပ်ႉၸၢင်ႈတၢင်ႇၵူၼ်း Mini Bus လမ်းၼိုင်ႈ ဢၼ်လုၵ်ႉတၢင်း တႃႈၶီႈလဵၵ်းသေ တေၵႂႃႇလွႆလႅမ်ၼၼ်ႉ တူၵ်းတၢင်း လူင်းၵႂႃႇၼႂ်းႁွင်ႈ ၼႂ်းၵႄႈမိူင်းၽျၢၵ်ႈ – ၵဵင်းတုင် ၵူၼ်းမႃးၸွမ်းၼႂ်းၵႃး လႆႈမၢတ်ႇၸဵပ်း 8 ၵေႃႉ သူင်ႇႁူင်းယႃတီႈၵဵင်းတုင် 6 ၵေႃႉ ဝႃႈၼႆ။
ဝၼ်းတီႈ 23/04/2019 ယၢမ်းၵၢင်ဝၼ်း ၵႃးႁၢပ်ႉၸၢင်ႈတၢင်ႇၵူၼ်း ရူတ်ႉသၢႆ ငူၺ်ႇတွင်ႇတၢၼ်း(ငွေတောင်တန်း) လုၵ်ႉ တၢင်း တႃႇၶီႈလဵၵ်းဢွၵ်ႇၶၢဝ်းတၢင်းၵႂႃႇတၢင်းလွႆလႅမ်ၼၼ်ႉ ပဵၼ်ၽေးဢုပၢတ်ႈ ၶႂမ်ႈတူၵ်းတၢင်း ၸွမ်းၵူတ်ႉလွႆ ၼႂ်းၵႄႈ မိူင်းၽျၢၵ်ႈ-ၵဵင်းတုင် ၼႂ်းၸႄႈ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ၸၢႆးၶမ်းၸၼ် ႁူဝ်ပဝ်ႈပႃႇတီႇသိူဝ်ၽိူၵ်ႇ ၸႄႈဝဵင်းမိူင်းၽျၢၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵႃးၶႂမ်ႈတူၵ်းတၢင်း ပဵၼ်တီႈလွႆၽႃသၵႅင်း ၶႃႈဢေႃႈၼၼ်ႉ တီႈၼၼ်ႈမီးတၢင်းၵူတ်ႉၼမ်ၼႃႇ။ ၵူၼ်းမၢတ်ႇၸဵပ်းတႄႉ လႆႈသူင်ႇယူတ်းယႃတီႈ ၵဵင်းတုင်ယဝ်ႉ” ဝႃႈၼႆ။
ၵဵဝ်ႇၵပ်းလွင်ႈပဵၼ်ၽေးဢုပၢတ်ႈၼႆႉ ပဵၼ်ယွၼ်ႉသင် ဢၼ်ဝႃႈၼၼ်ႉ ပႆႇလႆႈႁူႉၸွမ်းလွင်ႈတၢင်းလီလီ ဝႃႈၼႆ။
ၼႂ်းရူတ်ႉလမ်းၼၼ်ႉ တၢင်ႇၵူၼ်းမႃးၸွမ်း 8 ၵေႃႉ ၵူၼ်းႁေႃႈၵႃး 1 ၵေႃႉ။ တႃႇ 6 ၵေႃႉတႄႉ လႆႈသူင်ႇ ယူတ်းယႃတူဝ်ဝႆႉ တီႈႁူင်းယႃၵဵင်းတုင် တႃႇ 2 ၵေႃႉတႄႉ လႆႈမၢတ်ႇၸဵပ်းဢိတ်းဢွတ်း။ ၵဵဝ်ႇလူၺ်ႈလွင်ႈၵူၼ်းမၢတ်ႇ ၸဵပ်းတႄႉ ဢမ်ႇထိုင် တီႈလႆႈမႆႈၸႂ်ၼင်ႇၵဝ်ႇ ဝႃႈၼႆ။
ၵႃးႁၢပ်ႉၸၢင်ႈတၢင်ႇၵူၼ်းၼႆႉ လုၵ်ႉတႃႈၶီႈလဵၵ်းသေ တေတေႃႉသူင်ႇၵူၼ်းၵႂႃႇတၢင်း လွႆလႅမ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ