ၵႃးႁပ်ႉၸၢင်ႈတၢင်ႇၵူၼ်း (ရူတ်ႉတူႈ၊ မၢၼ်ႇလူင်ႇဢွၼ်ႇ) လုၵ်ႉတၢင်းတႃႈၶီႈလဵၵ်း တေၵႂႃႇတူၼ်ႈတီးၼၼ်ႉ ပိၼ်ႈၶႂမ်ႈတူၵ်း တၢင်းၼႂ်းၵႄႈၵဵင်းတုင် – မိူင်းပဵင်း ၵူၼ်းၶီႇမႃးၸွမ်းၼႂ်းၵႃး မၢတ်ႇၸဵပ်းၼိုင်ႈၵေႃႉ ဝႃႈၼႆ။
ပဵၼ်ရူတ်ႉတူႈ “လွႆၼမ်ႉၶူင်း” ပိၼ်ႈတီႈႁိမ်းဝၢၼ်ႈၼွင်ႉၶဵဝ်သဵၼ်ႈတၢင်း ၵဵင်းတုင်- တူၼ်ႈတီး ၼႂ်းၸႄႈဝဵင်းမိူင်းပဵင်း မိူဝ်ႈ ဝၼ်းတီႈ 08/04/2019 ယၢမ်းၵၢင်ၼႂ် ။
ၵူၼ်းၵဵင်းတုင် ပီႈၼွင်ႉၸမ်ၸႂ် ၵူၼ်းဢၼ်ၶီႇၵႃးလမ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶမ်ႈဝၼ်းတီႈ 7 ၼၼ်ႉ ၶႃႈ ႁဝ်းလႆႈထူဝ်းဢုပ်ႇ တင်းၵေႃႉပဵၼ်ပီႈၼၢင်းၶႃႈ ၵႃးၶဝ်တိုၵ်ႉဢွၵ်ႇ တႃႈၶီႈလဵၵ်းၵႂႃႇ 10 မူင်းၵၢင်ၶိုၼ်း။ ၽိူဝ်ႇထိုင် ဝၼ်းတီႈ 8 လႆႈငိၼ်းဝႃႈ မီးၵႃးပိၼ်ႈ ယွၼ်ႉပိူဝ်ႈရူတ်ႉလဵၵ်ႉ သမ်ႉတၢင်ႇၵူၼ်းၼမ်။ တၢင်ႇမွၵ်ႈ 20 ၵေႃႉ။ သမ်ႉႁေႃႈ ဝႆးလႄႈၸင်ႇလႆႈ ပဵၼ်ၽေးၶႃႈဢိူဝ်ႈ” ဝႃႈၼႆ။
ယွၼ်ႉရူတ်ႉပိၼ်ႈသေ မီးၵူၼ်းမၢတ်ႇ ၸဵပ်းၵေႃႉၼိုင်ႈ။ လွင်ႈလူႉတၢႆတႄႉဢမ်ႇမီး ဝႃႈၼႆ။
ၸၢႆးၼေႃႇမိူင်း ၸဝ်ႈၵႃး တွပ်ႇၵႄႈလၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇလႆႈႁေႃႈၵႃးဝႆးၼင်ႇၶဝ်ဝႃႈၼၼ်ႉ။ ၽွင်းတိုၵ်ႉႁေႃႈၵႃးယူႇၼၼ်ႉ ပလိၵ်ႈရူတ်ႉၵႃးပွင်ႇၵႂႃႇလႄႈ ၽိူဝ်ႇတေပွႆႇၵႃးလူင်းၵုင်းၼၼ်ႉ ဢမ်ႇမီးတီႈၸႂ်ယႂ်ႇသင် လိူဝ်သေပွႆႇလူင်းႁွင်ႈလႄႈလေႃႇသႂ်ႇၾင်ႇႁိုၵ်း ”- ဝႃႈၼႆ။
မၼ်းၸၢႆးယင်းလၢတ်ႈပႃးဝႃႈ ဢၼ်ဝႃႈဢွၵ်ႇႁိူၼ်းၵၢင်ၶိုၼ်း 10 မူင်းၼၼ်ႉၵေႃႈဢမ်ႇၸႂ်ႈ။ ၸူဝ်ႈလႅၼ်ႈၵႃးမႃး4-5 ပီၼႆႉ ၵူၼ်းၵဵင်းတုင်ၵေႃႈ ဢမ်ႇတွၼ်ႉလႆႈတၢင်ႇသေပွၵ်ႈ ဝႃႈၼႆ။
ယွၼ်ႉဝႃႈ တေႃႈလဵဝ်ၼႆႉ ၸမ်ထိုင်မႃး ၶၢဝ်းသွၼ်းၼမ်ႉသၢင်းၵျၢၼ်ႇယဝ်ႉလႄႈ ပီႈၼွင်ႉႁႅင်းၵၢၼ်တႆး ၸိူဝ်းၵႂႃႇႁဵတ်းၵၢၼ် ၼႂ်းမိူင်းထႆး ဢွၼ်ၵၼ်ပွၵ်ႈမိူဝ်းႁိူၼ်း တၢင်းလႅၼ်လိၼ် တႃႈၶီႈလဵၵ်း – မႄႈသၢႆၼႆႉ တင်းၼမ်လၢႆ။ ထႅင်ႈၾၢႆႇၼိုင်ႈၵေႃႈ ယူႇ တီႈလူင်ပွင်ၸိုင်ႈမိူင်းထႆးသမ်ႉ ပၼ်ၶႂၢင်ႉႁႅင်းၵၢၼ် မိူၼ်ၼင်ႇ မိူင်းလၢဝ်း၊ ၵမ်းပူးၶျႃးလႄႈ မိူင်းမၢၼ်ႈ ပွၵ်ႈမိူဝ်းသူႇ ၸႂ်းႁိူၼ်း ဢမ်ႇလႆႈသဵင်ႈၵႃႈၶၢမ်ႈလႅၼ်လိၼ် တႄႇဢဝ် ဝၼ်းတီႈ 5 -30/4/2019 တႃႇၶၢဝ်းတၢင်း 25 ဝၼ်း ဝႃႈၼႆ။
လိူဝ်သေၼၼ်ႉဢမ်ႇၵႃး သင်ဝႃႈ ႁႅင်းၵၢၼ် မိူင်းႁူမ်တုမ် တေပွၵ်ႈႁိူၼ်းၸိုင် သဵၼ်ႈတၢင်းဢွၵ်ႇ ဢၼ်ပိုတ်ႇပၼ်ပဵၼ်တၢင်း ၵၢၼ် မီး 2 တီႈ။ တီႈၼိုင်ႈ သဵၼ်ႈတၢင်း ၶဝ်ႈဢွၵ်ႇ တီႈလႅၼ်လိၼ်မိူင်းယၢင်းၽိူၵ်ႇ(မျႃႉဝတီႇ) – မႄႈသွတ်ႇ တီႈၼိုင်ႈ လႄႈ ၽၵ်းတူ တႃႈၶီႈလဵၵ်း – မႄႈသၢႆ တီႈၼိုင်ႈ ဝႃႈၼႆ။
