ၵႃးလမ်းၼိုင်ႈ ဢၼ်လုၵ်ႉတၢင်းတႃႈၶီႈလဵၵ်းသေ ၶိုၼ်ႈမႃး တၢင်းၵဵင်းတုင်ၼၼ်ႉ ပိၼ်ႈၶႂမ်ႈတူၵ်းတၢင်းၵႂႃႇ တီႈႁိမ်း ၶူဝ်တႃႈၸႅဝ်ႇ ဝူင်ႈၵၢင်ၵဵင်းတုင်- မိူင်းၽျၢၵ်ႈ သင်ၶၸဝ်ႈတူၼ်ၼိုင်ႈ ႁူပ်ႉထူပ်းၽေးဢုၿၢတ်ႈ လူႉလွၼ်ႇၵႂႃႇ ဝႃႈၼႆ။

ဝၼ်းတီႈ 03/05/2018 ယၢမ်းၵၢင်ၼႂ် မွၵ်ႈ 10:30 မူင်း ၵႃးလမ်းၼိုင်ႈ ဢၼ်လုၵ်ႉတၢင်းတႃႈၶီႈလဵၵ်းသေ ၶိုၼ်ႈမႃး တၢင်းၵဵင်းတုင်ၼၼ်ႉ မႃးပိၼ်ႈတူၵ်းတၢင်း တီႈႁိမ်းၶူဝ်တႃႈၸႅဝ်ႇ ၼႂ်းၵႄႈၵဵင်းတုင် – မိူင်းၽျၢၵ်ႈ ၼႂ်းၸိုင်ႈတႆး ပွတ်း ဢွၵ်ႇ။ ၸဝ်ႈတူၼ်ၶူး ဝိၸေယ ဢၼ်မႃးၸွမ်းၼႂ်းၵႃးၼၼ်ႉ လႆႈလူႉသဵင်ႈသုတ်းမုၼ် ထင်တီႈ ဝႃႈၼႆ။

ၸဝ်ႈၸၢင်းၵဵင်းတုင် တူၼ်ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ၸဝ်ႈလုၵ်ႉတၢင်း တႃႈၶီႈ လဵၵ်းသေ ၶိုၼ်ႈမႃး လႅပ်ႈ တေႁေႃႈဝႆး တီႈဢၼ်ၵႃးၶဝ်ၸဝ်ႈတူၵ်းၵႂႃႇၼႂ်းမႄႈၼမ်ႉ ပဵၼ်တီႈႁိမ်းၶူဝ်တႃႈၸႅဝ်ႇ။ တီႈ ၼၼ်ႈသမ်ႉ ပဵၼ်တၢင်း ၵူတ်ႉဝႆႉ။ ၼႂ်းသွင်သၢမ်ဝၼ်းမႃးၼႆႉ ၾူၼ်သမ်ႉတူၵ်း သဵၼ်ႈတၢင်းလႅပ်ႈတေမိုၼ်ႈၵေႃႈပႃး။ ၵူၼ်းႁေႃႈၵႃး လႅပ်ႈ တေႁေႃႈဝႆးသေ ဢမ်ႇၵုမ်းလႆႈႁႅင်းလူတ်ႉ” ဝႃႈၼႆ။

ၼႂ်းၵႃးၼၼ်ႉ တင်းမူတ်းၵူၼ်းမႃးၸွမ်း ပဵၼ် ၸဝ်ႈတူၼ်ၶူးဝိၸေယ တူၼ်ၼိုင်ႈ၊ ၸဝ်ႈသၢင်ႇ တူၼ်ၼိုင်ႈ ၵူၼ်းႁိူၼ်း 3 ၵေႃႉ ႁူမ်ႈၵၼ် 5 ၵေႃႉ။ ၵူၺ်းၵႃႈ တူဝ်ၵူၼ်းႁေႃႈၵႃးလႄႈ ၸဝ်ႈသၢင်ႇ၊ ၵူၼ်းႁိူၼ်း ၼၼ်ႉတႄႉ လႆႈႁပ်ႉမၢတ်ႇၸဵပ်း သေ လႆႈသူင်ႇယူတ်းယႃတူဝ်ဝႆႉ တီႈႁူင်းယႃၵဵင်းတုင်။ တူဝ်ၸဝ်ႈၶူးဝိၸေယတႄႉ လႆႈလူႉသဵင်ႈသုတ်းမုၼ် တီႈၼၼ်ႈ ၵမ်းလဵဝ် ဝႃႈၼႆ။

ၼႂ်းဝၼ်းတီႈ 03/05/2018 ယၢမ်းဝၢႆးဝၼ်း 4 မူင်း သင်ၶၸဝ်ႈ ၼႂ်းၸႄႈဝဵင်းမိူင်းပဵင်း လႆႈမႃးပၢင်းဢဝ် ၶၢပ်ႈတူဝ် ၸဝ်ႈ ၶူးလူင် ဝိၸေယ တီႈႁူင်းယႃၵဵင်းတုင်သေ မိူဝ်းလုမ်းလႃး တီႈဝတ်ႉယၢင်းမႆႇ ၸႄႈဝဵင်းမိူင်းပဵင်း ။ လိူဝ်ၼၼ်ႉ ပေႃးထိုင် မႃး ဝၼ်းတီႈ 17/05/2018 လုၵ်ႈၼွင်ႉပွင်ႈပၢႆလႄႈ ၸိူဝ်ႉၶိူဝ်းပီႈၼွင်ႉ ၸဝ်ႈၶူးလူင် ဝိၸေယ တေဢွၼ် ၵၼ် လုမ်း လႃးသၢင်းၵျူဝ်ႇပူၼ်ႉၶၢပ်ႈတူဝ်ၵႂႃႇ ဝႃႈၼႆ။

ၸဝ်ႈၶူးဝိၸေယၼႆႉ ပဵၼ်ႈၽူႈၼင်ႈဝတ်ႉဝိႁၢရ်ယၢင်းမႆႇ ၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင်။ ဢႃယုၸဝ်ႈ လႆႈ 67 ပီ ဝႃသႃၸဝ်ႈ 47 ဝႃသႃ ဝႃႈၼႆ။