ၵူၼ်းမိူင်းၵေႃႉၼိုင်ႈ ၺႃးသိုၵ်းမၢၼ်ႈ ပေႃႉထုပ်ႉ မၢပ်ႇၼႄးဝႃႈပဵၼ်သိုၵ်းတႆးၼႆသေ တီႉၺွပ်းၵုမ်းၶင်တူဝ် ၼႂ်းၸႄႈ ဝဵင်းမိူင်းပၼ်ႇ။
မိူဝ်ႈၼႆႉ ဝၼ်းတီႈ 04/04/2019 ယူႇတီႈၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ၵဵဝ်ႇၵပ်း လွင်ႈသိုၵ်းမၢၼ်ႈ ၶမယ 520 ဢဵၼ်ႁႅင်း မွၵ်ႈ 20 ၵေႃႉ ၸႅတ်ႈထၢမ် ဢဝ်သူၼ်ႈၵွင်ႈပေႃႉထုပ်ႉလႄႈ တီႉၺွပ်းၵုမ်းၶင် တူဝ်လုင်း ၸၢႆးၵႅဝ်ႈ ဢႃယု 44 ပီ မိူဝ်ႈဝၼ်းတီႈ 25/03/2019 ယၢမ်းၵၢင်ၶမ်ႈ 8 မူင်းၶိုင်ႈ တီႈႁူဝ်ၶူဝ် တၢင်းၵႂႃႇႁေႃၵျွင်း ၸဝ်ႈၵေႃးလီႇ ဢၼ်မီးတၢင်းၼွၵ်ႈဝဵင်း မိူင်းပၼ်ႇ သဵၼ်ႈတၢင်းမိူင်းပၼ်ႇ – ၵဵင်းတွင်း ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “ ပေႃးတိုၵ်ႉမီးၵၢင်ၸႂ်ဝႆႉၵၼ် ပဵၼ်ၽူႈၶဵၼ်ယူႇတႄႉ ပႆႇႁၼ်သဵၼ်ႈတၢင်းတေငမ်းယဵၼ်လႆႈ။ ဢၼ်လႆႈၺႃးၵိၼ် ၼႂ်းၵႄႈမၼ်းသမ်ႉပဵၼ်ၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်ၼၼ်ႉယဝ်ႉ။ သိုၵ်းမၢၼ်ႈထုၵ်ႇလီ ၵိုတ်းယဝ်ႉတၢင်းႁဵတ်းလွင်ႈ ထၢင်ႇထိူမ်ႁႃတၢင်းၽိတ်း သႂ်ႇၵၼ်ၸိူင်ႉၼၼ် ပေႃးမီးၵၢင်ၸႂ်ၶႂ်ႈ လႆႈလွင်ႈ ငမ်းယဵၼ်တႄႉတႄႉ ၵွပ်ႈဝႃႈပဵၼ်ၶၢဝ်းယၢမ်း သၢင်ႈလွင်ႈငမ်းယဵၼ်ၼႂ်း ၸိုင်ႈမိူင်းလူး။ ၵၢၼ်ပူၼ်ႉပႅၼ်ႁဵတ်းႁၢႆႉၼိူဝ်ၵူၼ်းမိူင်းၼႆႉ ဢမ်ႇၸႂ်ႈပၢၼ်မၼ်းယဝ်ႉ” ဝႃႈၼႆ။
ၼႂ်းၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ဢွၵ်ႇဝႆႉဝႃႈ “ ၸုမ်းသိုၵ်းမၢၼ်ႈထၢမ်မၼ်းဝႃႈ မႂ်းပဵၼ်သိုၵ်း တႆးႁႃႉ? “မၼ်းတွပ်ႇဝႃႈ ၶႃႈဢမ်ႇပဵၼ်သိုၵ်းတႆး တႆးတႄႉ ၶႃႈပဵၼ်ဢေႃႈ“ ၼႆသေ သိုၵ်းမၢၼ်ႈဢဝ်သူၼ်ႈၵွင်ႈ ထုပ်ႉသႂ်ႇ ႁူဝ်မႃႇမၼ်း ယဝ်ႉဢဝ်မၼ်းသူင်ႇမွပ်ႈပၼ်ႁူင်းပလိၵ်ႈႁႂ်ႈပၼ်တၢမ်ႇယူႇ။ မၼ်းယင်းဢမ်ႇႁူႉဝႃႈယွၼ်ႉသင်လႄႈ ပေႃႉမၼ်း ၺွပ်းမၼ်းၵႂႃႇ မွပ်ႈပၼ်ယႄးၶဝ်” ဝႃႈၼႆ။
ယႄးပလိၵ်ႈမၢၼ်ႈၶဝ် ထၢမ်မၼ်းဝႃႈ မႂ်းႁူႉၸၵ်းၽႂ်ၵူၼ်းၼႂ်းမိူင်းပၼ်ႇၼႆႉ “ လုင်းၵႅဝ်ႈတွပ်ႈဝႃႈၶႃႈ ႁူႉၸၵ်းလုင်းႁဵင် ၵျေႃႇ ဝၢၼ်ႈၵုင်းၵႅင်းၵူၺ်းၶႃႈဢေႃႈ ၼႆသေ ယႄးၶဝ်ၵေႃႈသိုပ်ႇၽူင်းႁႃ လုင်းႁဵင်သေ ထၢမ်လွင်ႈလုင်းၵႅဝ်ႈၸွင်ႇႁူႉ ၸၵ်းမၼ်း၊ လုင်းႁဵင်ၵေႃႈလၢတ်ႈဝႃႈႁူႉၸၵ်းဢေႃႈ မၼ်းပဵၼ်ၵူၼ်းမိူင်းတႄႉဢေႃႈမၼ်းဢမ်ႇၸႂ်ႈသိုၵ်းၼႆသေမိူဝ်ႈ ၶၢဝ်းယၢမ်း 11.30 ၵၢင်ၶမ်ႈၼၼ်ႉ လုင်းႁဵင်ဝၢၼ်ႈၵုင်းၵႅင်း ၵႂႃႇယိုၼ်ႁပ်ႉ/ထွၵ်ႈၶၢမ်ႇလုင်းၵႅဝ်ႈတီႈ ႁူင်းပလိၵ်ႈဢွၵ်ႇ မႃးၶိုၼ်း ဝႃႈၼႆ။
လုင်းၵႅဝ်ႈၼႆႉပဵၼ်လုၵ်ႈလုင်းတေႃးၼ ပႃႈသႃႇယူႇဝၢၼ်ႈတူၼ်ႈႁုင်းပွၵ်ႉ (5) ဝဵင်းၵဵင်းတွင်း။ မၼ်းမႃး ထင်သဝ်းမႃး ႁဵတ်းၵၢၼ်သူၼ်ၽၵ်းမီႇတီႈမိူင်းပၼ်ႇ ၸူဝ်ႈၶၢဝ်းသေႁိုင်ႁိုင်ၼၢၼ်းၼၢၼ်း ၵႆႉမိူဝ်းယဵမ်ႈ ၸႂ်းပီႈၼွင်ႉမၼ်းတီႈၵဵင်း တွင်း။ သိုၵ်းမၢၼ်ႈ တပ်ႉၶမယ 520 ၼႆႉ ငဝ်ႈတပ်ႉပၵ်းဝႆႉတီႈ မိူင်းပၼ်ႇ ယူႇၾၢႆႇတႂ်ႈတပ်ႉၵုမ်းၵမ် ၽႅၼ်ၵၢၼ်ယၼ်ႇ သိုၵ်း (ၸၵၶ 17) ပႃႈတႂ်ႈတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ၸိုင်ႈတႆးပွတ်းၸၢၼ်း။
ၼႂ်းပိုၼ်ႉတီႈမိူင်းပၼ်ႇၼႆႉ မီးသိုၵ်းလၢႆမူႇၸုမ်း ပႃးၸဵမ် သိုၵ်းမၢၼ်ႈ၊ ပျီႇတုၸိတ်ႉလႄႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ၸုမ်းဢၼ်လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ။ ၵၢၼ်ပူၼ်ႉ ပႅၼ်သုၼ်ႇလႆႈသုၼ်ႇပဵၼ်ၵူၼ်း ၼႆႉ ၵိူတ်ႇၶိုၼ်ႈၼႂ်းၶၢဝ်းတၢင်းဢၼ်သိုၵ်းမၢၼ်ႈပိုၼ်ၽၢဝ်ႇ ၵိုတ်းသိုၵ်း ၾၢႆႇလဵဝ် ၶၢဝ်းတၢင်းသီႇလိူၼ်ၼၼ်ႉယဝ်ႉ။
မိူဝ်ႈဝၼ်းတီႈ 11-12/3/2019 ၼၼ်ႉၵေႃႈ တူဝ်တႅၼ်းၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ႁူပ်ႉဢုပ်ႇၸွမ်းသုၼ်လွင်ႈၶိုၼ်းမႄးလီၵၼ် ၼႂ်းၸိူဝ်ႉၸၢတ်ႈလႄႈလွင်ႈ ငမ်းယဵၼ် (NRPC) တင်းၸုမ်းတူဝ်တႅၼ်း ၽၢႆႇဢုပ်ႇဢူဝ်းလွင်ႈငမ်းယဵၼ်သိုၵ်းမၢၼ်ႈ တီႈၼေႇပျီႇတေႃႇ ပိူဝ်ႈ တႃႇ ၵႄႈလိတ်ႈပၼ်ႁႃလႄႈသိုပ်ႇၶိုင်သၢင်ႈၶၵ်ႉ ၵၢၼ်ငမ်းယဵၼ်။
