ၽွင်းသိုၵ်းလူင်ပွင်ၸိုင်ႈမၢၼ်ႈ ႁၢင်ႈသိုၵ်းလေႃႇတိုၵ်း SSPP/SSA ၼႂ်းၸိုင်ႈတႆးပွတ်းၵၢင် မိူဝ်ႈႁူဝ်လိူၼ် March ၼႆႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇလိၵ်ႈပိုၼ်ၽၢဝ်ႇဝႃႈ သိုၵ်းလူင်ပွင်ၸိုင်ႈမၢၼ်ႈ ပူၼ်ႉပႅၼ်ၶေႃႈပိုၼ်ၽၢဝ်ႇ ၵိုတ်းတိုၵ်းၶွင်ၶဝ်သေဢမ်ႇၵႃး ပူၼ်ႉပႅၼ်ပႃးသုၼ်ႇလႆႈၼိူဝ်ၵူၼ်းပိုၼ်ႉတီႈ/ လၢႆလွင်ႈ။

ဝၼ်းတီႈ 20/03/2019 ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ယူႇတီႈသိုၵ်းလူင်ပွင်ၸိုင်ႈ မၢၼ်ႈ ၸႂ်ႉႁႅင်းသိုၵ်း 400 ပၢႆ လႄႈ ၶိူင်ႈမိၼ် 2 လမ်း ၶိုၼ်ႈလေႃႇတိုၵ်း တပ်ႉသိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA တီႈလွႆပၢင်ၶႃး ဢၼ်မီးၼႂ်းၵႄႈ 4 ၸႄႈဝဵင်း သီႇပေႃႉ၊ မိူင်းယႆ၊ မိူင်းၵိုင်လႄႈ ၵေးသီး မိူဝ်ႈဝၼ်း တီႈ 7-10/3/2019 ႁၢဝ်ႈႁႅင်း ၵူၼ်းမိူင်း လႆႈတူၵ်းပဵၼ်ယိူဝ်ႇ လူႉတၢႆၼိုင်ႈၵေႃႉ မၢတ်ႇၸဵပ်း 2 ၵေႃႉ လႄႈ လႆႈပၢႆႈယၢၼ် ႁိူၼ်းယေး 700 ပၢႆ ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းလူင်ပွင်ၸိုင်ႈမၢၼ်ႈ တဵၵ်း ၸႂ်ႉၵူၼ်းဝၢၼ်ႈၵႂႃႇသူင်ႇလိၵ်ႈပၼ်ၶဝ်သေႁဵတ်းႁႂ်ႈၵူၼ်းဝၢၼ်ႈလႆႈတၢႆၵႂႃႇ။ သမ်ႉၸႂ်ႉၶိူင်ႈမိၼ်ယိုဝ်းလႄႈ ၵူၼ်း ဝၢၼ်ႈၵူၼ်းမိူင်းလႆႈတူၵ်းတၢင်းယၢပ်ႇၽိုတ်ႇၺႃးၵိၼ်ၸွမ်းမၼ်းၼၼ်ႉမၼ်းၽိတ်းပူၼ်ႉပႅၼ်သုၼ်ႇလႆႈ ၵူၼ်း လႄႈ ပူၼ်ႉပႅၼ်ၶေႃႈပိုၼ်ၽၢဝ်ႇၵိုတ်းသိုၵ်း ၾၢႆႇလဵဝ်ၶဝ် ၼႂ်းၶၢဝ်းတၢင်းသီႇလိူၼ်ၼၼ်ႉတႄႉတႄႉ။ မၼ်းၼႄဝႃႈတိုၼ်း ဢမ်ႇ မီးၵၢင်ၸႂ် ၶႂ်ႈႁႂ်ႈဝၢၼ်ႈမိူင်းၵတ်းယဵၼ်တႄႉတႄႉ” ဝႃႈၼႆ။

ၵူၼ်းမိူင်းဢၼ်လႆႈတူၵ်းပဵၼ်ယိူဝ်ႇ လူႉတၢႆလႄႈ မၢတ်ႇၸဵပ်းၸွမ်းၼႂ်းပၢင်တိုၵ်းၼၼ်ႉသမ်ႉ မိူဝ်ႈဝၼ်းတီႈ 09/03/2019 ယၢမ်းၵၢင်ၼႂ် 4 မူင်းၼၼ်ႉ သိုၵ်းမၢၼ်ႈၸႂ်ႉၵူၼ်းထဝ်ႈ 2 ၵေႃႉ ၵႂႃႇသူင်ႇလိၵ်ႈပၼ်သိုၵ်းတႆး တီႈၼိူဝ်လွႆပၢင်ၶႃး ၵူၼ်း ဝၢၼ်ႈ 2 ၵေႃႉၼၼ်ႉ ပဵၼ်လုင်းသႃႇ ဢႃယု 67 ပီ ၵူၼ်းဝၢၼ်ႈၵုၼ်တီး လႄႈ လုင်းမွင်ႇ ဢႃယု 50 ပီ ၵူၼ်းဝၢၼ်ႈပၢင်ၶႃး။ မိူဝ်ႈၽွင်းၶႃ 2 ၵေႃႉ ၵႂႃႇသူင်ႇလိၵ်ႈယူႇၼၼ်ႉ ၽႃႇၺႃးမၢၵ်ႇသေ ၵေႃႉပဵၼ်လုင်းသႃႇၼၼ်ႉ လႆႈလူႉတၢႆထင်တီႈ။ လုင်း မွင်ႇသမ်ႉ လႆႈမၢတ်ႇၸဵပ်း ၸွမ်းတိၼ်လႄႈ ၵုမ်ႇၾၢႆႇသၢႆႉ(ၵုမ်ႇၵူၼ်ႈ) ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃ ၵေးသီး။

ထိုင်မႃး ဝၼ်းတီႈ 10/03/2019 ယၢမ်းႁူဝ်ၶမ်ႈ မွၵ်ႈ 5 မူင်း သိုၵ်းမၢၼ်ႈ ၸႂ်ႉၶိူင်ႈမိၼ် 2 လမ်း ယိုဝ်းမၢၵ်ႇလူင် သႂ်ႇၼႂ်း ဝၢၼ်ႈပၢင်ၶႃး ဢၼ်မီးလင်ႁိူၼ်း 37 လင်ၼၼ်ႉ မၢၵ်ႇတူၵ်းတိူဝ်ႉသႂ်ႇ ႁိူၼ်းလုင်းၸၢမ်ႇသႅင် လႄႈ ပႃႈၸင်ႈ ဢႃယု 50 ပီ တိူဝ်ႉၸၢၵ်ႇမၢၵ်ႇတီႈဢူၵ်းၾၢႆႇသၢႆႉၼၼ်ႉၵေႃႈ လႆႈသူင်ႇယူတ်းယႃတူဝ်ဝႆႉတီႈၵေးသီး။

ပၢင်တိုၵ်းၼႆႉ သိုၵ်းမၢၼ်ႈ ၸႂ်ႉႁႅင်းသိုၵ်းလႄႈ ၶိူင်ႈမိၼ် လေႃႇတိုၵ်း SSPP/SSA ႁၢဝ်ႈႁႅင်း ႁဵတ်းႁႂ်ႈၵူၼ်းဝၢၼ်ႈပၢင်ၶႃး ဢိူင်ႇမိူင်းတုင်လႄႈ ထႅင်ႈၵဝ်ႈဝၢၼ်ႈၸိူဝ်း ယူႇႁိမ်း ႁွမ်း မိူၼ် 1) ဝၢၼ်ႈပၢင်ႇတပ်ႉ၊ 2) ဝၢၼ်ႈၵုၼ်ၼိမ်၊ 3) ဝၢၼ်ႈၵုၼ်ၶႃး၊ 4) ဝၢၼ်ႈမေႃႇ၊ 5) ဝၢၼ်ႈၵုၼ်တီး၊ 6) ၼႂ်းဝဵင်း၊ 7) ဝၢၼ်ႈႁွမ်ႈ၊ 8) ဝၢၼ်ႈပၢင်ၵႂၢႆး၊ 9) ဝၢၼ်ႈပၢင်ၸိူင်း ၸိူဝ်းၼႆႉ။ ႁူဝ်ၵူၼ်း တင်းမူတ်းမွၵ်ႈ 700 လႆႈၶၢႆႉ ပၢႆႈၸူး ၵေးသီးသေၵႂႃႇပိုင်ႈႁူမ်ႈတီႈဝတ်ႉ/ၵျွင်းၵွင်ဢုတ်ႇ ဝတ်ႉ/ၵျွင်းလွႆပေႃဝဵင်းၵေးသီး။ ထိုင် မႃးဝၼ်းတီႈ16/3/2019 ၵူၼ်းဝၢၼ်ႈၵမ်ႈၼမ်ၶိုၼ်းဢွၼ်ၵၼ်ပွၵ်ႈဝၢၼ်ႈၵဝ်ႇၶိုၼ်း ၵူၼ်းဝၢၼ်ႈပၢင်ၶႃး ဢၼ်ယင်း ပႆႇႁတ်းပွၵ်ႈ ဝႃႈၼႆ။

သိုၵ်းမၢၼ်ႈ ဢၼ်ၶိုၼ်ႈလေႃႇယိုဝ်း SSPP/SSA တီႈလွႆပၢင်ၶႃးသမ်ႉ ပဵၼ်သိုၵ်းလူင်ပွင်ၸိုင်ႈမၢၼ်ႈၶလယ 23 သီႇပေႃႉ၊ ၶမယ 17 မၢၼ်ႈ လီႈ၊ ၶမယ 325 မိူင်းယႆလႄႈ ၶလယ 67 ႁူဝ်ယႃႉ ၸိူဝ်းၼႆႉ။

ၾၢႆႇၼိုင်ႈတၢင်းၼိုင်ႈၵေႃႈ သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇ ၵိုတ်းတိုၵ်းဝႆႉၾၢႆႇလဵဝ် တႃႇ 5 တိူင်း။ ၼႂ်း ၶၢဝ်းတၢင်း 4 လိူၼ် တႄႇဢဝ် ဝၼ်းတီႈ 21/12/2018 မႃး။ ၼႂ်း 5 တိူင်းသိုၵ်း ဢၼ်သိုၵ်းမၢၼ်ႈၵိုတ်းတိုၵ်းၼၼ်ႉ ပႃးၼႂ်း မိူင်းတႆး 4 တိူင်း ဝႃႈၼႆသေတႃႉ ဝၼ်းတီႈ 7 တေႃႇ 10/3/2019 သိုၵ်းလူင်ပွင်ၸိုင်ႈမၢၼ်ႈ ပိုတ်ႇၼႃႈသိုၵ်းတိုၵ်း ယိုဝ်း ႁၢဝ်ႈႁႅင်းလႄႈ SHRF ၸင်ႇပိုၼ်ၽၢဝ်ႇဝႃႈ သိုၵ်းလူင်ပွင်ၸိုင်ႈမၢၼ်ႈ ယႃႉၶေႃႈပိုၼ်ၽၢဝ်ႇၶိုၼ်း။