ၸုမ်းၵပ်းသၢၼ်လွင်ႈၼၢင်းယိင်းတႆး ၸတ်းႁဵတ်းပႃး ပၢင်ပိုတ်ႇဝႂ်ၸၢမ်းၵၢမ်ႇ ၼႂ်းဝၼ်းၵေႃႇတင်ႈၸုမ်း ၶွပ်ႈတဵမ် 20 ပီ ၼၼ်ႉ မီးၽူႈၵၢမ်ႇလီထုၵ်ႇ(တိူဝ်ႉ) ၵႂႃႇသူးရၢင်းဝလ်းမူတ်း။

ဝၼ်းတီႈ 28/03/2019 ယၢမ်းဝၢႆးဝၼ်း မွၵ်ႈ 1 မူင်းပၢႆ ၸုမ်းၵပ်းသၢၼ်လွင်ႈၼၢင်းယိင်းတႆး Shan Women’s Action Network (SWAN) ပိုတ်ႇဝႂ်ၸၢမ်းၵၢမ်ႇ တီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်း။ သူးရၢင်းဝလ်းဢၼ်ပိုတ်ႇဢွၵ်ႇမႃး တင်းမူတ်း မီး 49 ရၢင်းဝလ်း။ ၼႂ်း 49 သူးရၢင်းဝလ်းၼၼ်ႉ မီးၽူႈၵၢမ်ႇလီ ထုၵ်ႇ ၵႂႃႇမူတ်း ဝႃႈၼႆ။

ၼၢင်းၶမ်းယၢတ်ႇ ၸုမ်းၵပ်းသၢၼ်လွင်ႈၼၢင်းယိင်းတႆး/ ၸဝ်ႈၼႃႈတီႈၾၢႆႇဝႂ်ၸၢမ်းၵၢမ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ငိုၼ်း ဢၼ်ႁဝ်းၶႃႈလႆႈမႃး တီႈၽူႈပၼ်ႁႅင်းႁဝ်းသိုဝ်ႉဝႂ်ၸၢမ်းၵၢမ်ႇၸုမ်းၼၢင်းယိင်းတႆးႁဝ်းၶႃႈၼႆႉ ႁဝ်းၶႃႈ တေဢဝ် ႁဵတ်းသိုင်ႇ ၾႆး တွၼ်ႈတႃႇ လုၵ်ႈႁဵၼ်း။ ၼႂ်းလိူၼ်ၵျုၼ်ႊၼႆႉ လုၵ်ႈႁဵၼ်းတေၶဝ်ႈမႃးယဝ်ႉ။ ႁၢင်ႈႁႅၼ်း တူဝ်ႈတၼ်းတွၼ်ႈတႃႇတီႈ ႁုင်တူမ်ႈၶဝ် ။ ၵမ်းၼႆႉထႅင်ႈဢၼ်ၼိုင်ႈသမ်ႉ လုမ်းႁဝ်းၶႃႈ သၢင်ႈၵႂႃႇၼၼ်ႉ တႃႇၵူၼ်းႁၢပ်ႇၵၢၼ် ၶဝ်ၼင်ႈ (ရုံးခန်း) ၼႆႉ မၼ်း ဢမ်ႇပႆႇပေႃး။ ဢၼ်ၼႆႉၵေႃႈ တေႁဵတ်းထႅင်ႈ ။ ငိုၼ်းဢၼ် ၶၢႆဝႂ်ၸၢမ်းသုၼ်ႇသေလႆႈမႃးၼၼ်ႉ မၼ်းၵေႃႈဢမ်ႇလႆႈ ၼမ် ဢမ်ႇလိူဝ်ၼမ်သင်” ဝႃႈၼႆ။

ဝႂ်ၸၢမ်းၵၢမ်ႇ ဢၼ်တီႈၸုမ်းၼၢင်းယိင်းတႆး ပိုတ်ႇဢွၵ်ႇၵႂႃႇၼၼ်ႉ တင်းမူတ်း မီး 49 ရၢင်းဝလ်း။ ၼႂ်းၼၼ်ႉ ရၢင်းဝလ်းတီႈ ၼိုင်ႈ လူတ်ႉၵႃး Toyota Wish ၽူႈၵၢမ်ႇလီလႆႈႁပ်ႉသူးၵႂႃႇ ပဵၼ်မဢေးမီး (သီႇပေႃႉ) မၢႆၸၢမ်းၵၢမ်ႇ B02327၊ ရၢင်းဝလ်း တီႈသွင် ပဵၼ်လူတ်ႉၵႃး Hi Jet ၽူႈၵၢမ်ႇလီပဵၼ် မၶၢႆႇၽူး (တူၼ်ႈတီး) မၢႆၸၢမ်းၵၢမ်ႇ E06389 လႄႈ ရၢင်းဝလ်းတီႈသၢမ် တင်း သီႇတႄႉ ပဵၼ် ၸၢၵ်ႈထႆၼႃး မၢႆၸၢမ်းၵၢမ်ႇ C01774, C03637 ပဵၼ်ၵူၼ်းမိူင်းၼမ်ႉၶမ်းလႄႈ ၸႄႈလၢၼ်ႉလႆႈ။ လိူဝ်ၼၼ်ႉ ဢိၵ်ႇထႅင်ႈသူးရၢင်းဝလ်း 40 ရၢင်းဝလ်းၼၼ်ႉ မီးၽူႈၵၢမ်ႇလီထုၵ်ႇၵႂႃႇမူတ်းယဝ်ႉ။

ၼၢင်းၶမ်းယၢတ်ႇ လၢတ်ႈဝႃႈ “ ငိၼ်းၸူမ်းၶွပ်ႈၸႂ်ထိုင် ၽူႈပၼ်ႁႅင်း သိုဝ်ႉဝႂ်ၸၢမ်းၵၢမ်ႇ ႁဝ်းၶႃႈၵူႈၵေႃႉ ၸိူဝ်းဢၼ် တိူဝ်ႉၵႂႃႇ ၵေႃႈလီ ဢမ်ႇတိူဝ်ႉၵေႃႈလီ မၼ်းၵေႃႈ ၶိုၼ်းမႃးၵမ်ႉထႅမ် တွၼ်ႈတႃႇ တေၵေႃႇသၢင်ႈ သိုင်ႇၾႆးလၢႆတီႈ လၢႆဢၼ် ႁွင်ႈလုမ်း တႃႇၵူၼ်းႁဵတ်းၵၢၼ် ၸိူဝ်းၼႆႉၶႃႈ” ဝႃႈၼႆ။

မၢႆၸၢမ်းၵၢမ်ႇ သူးရၢင်းဝလ်းထႅင်ႈ 40 ပၢႆၼၼ်ႉ ပဵၼ် ရူတ်ႉၶိူင်ႈ၊ ၶွမ်ႊပိဝ်ႊတိူဝ်ႊ၊ ၾူၼ်း၊ ထီႊဝီႊ၊ ၸၢၵ်ႈတတ်းယိူဝ်ႈလႄႈ ၶႅပ်းသႅင်လႅတ်ႇ ၸိူဝ်းၼႆႉ ဝႃႈၼႆ။