ၼင်ႇႁိုဝ်တေၸၼ်ၸႂ်ၼၵ်းတွင်ႈတဵဝ်းဢႅဝ်ႇယဵမ်ႈၼမ်တိူဝ်းမႃးလိူဝ်ၵဝ်ႇၼႆသေလူင်ပွင်ၸိုင်ႈမိူင်းတႆးၶပ်းၶိုင်တႃႇႁဵတ်းပွႆးသွၼ်းၼမ်ႉၼႂ်းၼွင်ႁၢႆးယႃႈ ပဵၼ်ပွၵ်ႈႁႅၵ်ႈၼႂ်းပိုၼ်း ဝႃႈၼႆ။
ပွႆးသွၼ်းၼမ်ႉၼႂ်းၼွင်ႁၢႆးယႃႈၼႆႉ တေသႂ်ႇၸိုဝ်ႈဝႃႈ Inlay floating Thingyun festival 2019 ။ တေၸတ်းႁဵတ်းတီႈႁူင်းႁေႃး ၼိူဝ်ၼမ်ႉ Inlay Culture Heritage Trust Complex ဢၼ်မီးတီႈ ဝၢၼ်ႈၼမ်ႉပၼ်ႇ ၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်း။
ၸၢႆးၸူဝ်းထုၼ်း ၽူႈၸတ်းၵၢၼ် တႃႇပွင်ပဵၼ်ပၢင်ပွႆးလၢတ်ႈဝႃႈ -“ ပဵၼ်ပၢင်ပွႆးသွၼ်းၼမ်ႉ တႃႇပီႈၼွင်ႉၼွင်ႁၢႆးယႃႈ ပွၵ်ႈႁႅၵ်ႈၶႃႈ။ တေၶတ်းၸႂ်ၸတ်းႁႂ်ႈမၼ်းၵိုၼ်းၶိုၵ်ႉယႂ်ႇလူင်ၶႅမ်ႉလႅပ်ႈ။ ယဝ်ႉၵေႃႈတႃႇယုၵ်ႉမုၼ်းပႃးၾိင်ႈထုင်းၼႂ်းပိုၼ်ႉတီႈလႄႈတႃႇႁူၺ်းၸၼ်ၽူႈဢႅဝ်ႇယဵမ်ႈတွင်ႈတဵဝ်းႁႂ်ႈႁူႉၸၵ်းၼွင်ႁၢႆးယႃႈၼမ်ၼမ်”- ဝႃႈၼႆ။
ပွႆးသွၼ်းၼမ်ႉၼႆႉ တေၶီႇႁိူဝ်းသေ လဵၼ်ႈၼမ်ႉ ႁူတ်းၼမ်ႉၵၼ်၊တေမီးၽူႈႁွင်ႉၵႂၢမ်း ၸိုဝ်ႈသဵင်ယႂ်ႇ ၸၢဝ်းမၢၼ်ႈ မိူၼ်ၼင်ႇ တိၼ်ႇၸႃႇမေႃႇ၊ ၶျၢၼ်းၶျၢၼ်း၊ ဢိၵ်ႇလၢႆလၢႆၵေႃႉ တေမႃး မူၼ်ႈၸႂ်ပၼ်ယၢမ်းၵၢင်ၼႂ် 9 မူင်းထိုင် 12 မူင်းၸုပ်ႈၼိုင်ႈလႄႈဝၢႆးဝၼ်း 3 မူင်းထိုင်ၵၢင်ၶမ်ႈ 7 မူင်းၸုပ်ႈၼိုင်ႈ။ တီႈပၢင်ပွႆးၼႆႉ တေလိူၵ်ႈပႃး ၼၢင်းႁၢင်ႈလီ ၸၢႆးႁၢင်ႈငၢမ်းၼႂ်းၼွင် Mister and Miss Innlay 2019 ။ပေႃးထိုင်ဝၼ်းပီမႂ်ႇဝၼ်းၼိုင်ႈ တေမီးပၢင်လွင်းလူႇသွမ်းသၢၼ်သင်ၶၸဝ်ႈ ႁဵင်တူၼ်။ တေမီးပၢင်တဵတ်ႈထမ်းၼိူဝ်ၼမ်ႉၸဵမ်ၸိူဝ်းၼႆႉ ။
ပၢင်ပွႆးသွၼ်းၼမ်ႉၼႆႉ ပဵၼ်ၶူင်းၵၢၼ်လူင်ပွင်ၸိုင်ႈမိူင်းတႆးလႄႈ လွင်ႈႁူမ်ႇလူမ်ႈ၊ လွင်ႈလုမ်းလႃးပၢႆးယူႇလီၸိူဝ်းၼႆႉ လူင်ပွင်ၸိုင်ႈတေၶိုင်ပၼ်တဵမ်ထူၼ်ႈဝႃႈၼႆ။
ၼွင်ႁၢႆးယႃႈၼႆႉ ပဵၼ်တီႈၵူၼ်းဢႅဝ်ႇယဵမ်ႈတွင်ႈတဵဝ်းၼႂ်းလုမ်ႈၾႃႉ သူၼ်ၸႂ်မႃးဢႅဝ်ႇယဵမ်ႈၼမ်။ ၼိုင်ႈပီ ၽတ်ႉၽဵင်ႇၼၵ်းတွင်ႈတဵဝ်းမႃးဢႅဝ်ႇယဵမ်ႈၼႂ်းၼွင်မီးယူႇ 3 လၢၼ်ႉၵေႃႉ။ ပေႃးထိုင်ၶၢဝ်းသွၼ်းၼမ်ႉလႄႈ လိူၼ်သိပ်းဢဵတ်းလိူၼ်သိပ်းသွင်ၼႆႉ မီးၵူၼ်းဢႅဝ်ႇယဵမ်ႈၼမ်သုတ်း ဝႃ ၼႆ။
ၶေႃႈမုၼ်းဢၢင်ႈဢိင်တီႈ – ၵမ်ႇပေႃးၸ ထၢႆးမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ