ၸုမ်းၶီႇရူတ်ႉၶိူင်ႈ (Peace Bikers Tour) ဢဵၼ်ႁႅင်း 60 ပၢႆ ႁူမ်ႈၵၼ် ၶီႇရူတ်ႉၶိူင်ႈပၼ်ႇလဵပ်ႈမိူင်းတႆး တႃႇမၢႆတွင်း ႁႂ်ႈပဵၼ် လွင်ႈငမ်းယဵၼ်။

ဝၼ်းတီႈ 02/04/2019 ယၢမ်းဝၢႆးဝၼ်း 3 မူင်းပၢႆ ပႃႇတီႇႁူဝ်သိူဝ် ၸႄႈဝဵင်းသီႇပေႃႉ SNLD ႁူမ်ၸူမ်းႁပ်ႉတွၼ်ႈ တီႈတၢင်း ၶဝ်ႈဝဵင်း သဵၼ်ႈတၢင်း လႃႈသဵဝ်ႈ – သီႇပေႃႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယိူင်းဢၢၼ်း တႃႇမၢႆတွင်းႁႂ်ႈပဵၼ်လွင်ႈငမ်းယဵၼ်၊ လွင်ႈၵိုတ်းယိုတ်းပၢင်တိုၵ်း ဢၼ်ပဵၼ်ယူႇတၢင်းပွတ်းႁွင်ႇလႄႈ ၼႂ်းမိူင်း ၸၢဝ်းၶိူဝ်း ၸိူဝ်းၼႆႉ။

ၸၢႆးလၢဝ်သႅင် ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ“ ယိူင်းဢၢၼ်းဢၼ်ၶဝ်ၶီႇ ပၼ်ႇ ရူတ်ႉၶိူင်ႈ ႁႂ်ႈပဵၼ်တီႈမၢႆတွင်း လွင်ႈငမ်းယဵၼ်ၼၼ်ႉ ၶဝ်ၶတ်းၸႂ်ၶီႇပၼ်ႇလတ်းမႃးဝဵင်းၸိူဝ်းဢၼ်ပဵၼ်ပၼ်ႁႃၵၼ် လွင်ႈပၢင်တိုၵ်းသိုၵ်းသိူဝ်ၼၼ်ႉ ၼင်ႇႁိုဝ် ၵူၼ်းမိူင်းမၢၼ်ႈၶဝ် ပေႃးတေလႆႈႁူႉၸွမ်းဝႃႈ ၼႂ်းမိူင်းၸၢဝ်းၶိူဝ်းၼႆႉ ပႆႇမီးလွင်ႈ ငမ်းယဵၼ်သင် တိုၵ်ႉပဵၼ်ပၢင်တိုၵ်းသိုၵ်းသိူဝ်ၵၼ်ယူႇ။ ထႅင်ႈၾၢႆႇၼိုင်ႈၵေႃႈ ၵူၼ်းမိူင်းလူင် တင်းမိူင်းမၢၼ်ႈၶဝ်ၼၼ်ႉ ဢမ်ႇပႆႇႁူႉၵၼ်ဝႃႈ ၼႂ်းမိူင်းၸၢဝ်းၶိူဝ်းၼႆႉ တေႃႈလဵဝ် တိုၵ်ႉပဵၼ်သင် မီးပၼ်ႁႃသင် ၸိူဝ်းၼႆႉ” ဝႃႈၼႆ။

သိုပ်ႇလၢတ်ႈဝႃႈ “ ယူႇတီႈပႃႇတီႇႁူဝ်သိူဝ် ၵူႈၸႄႈဝဵင်းႁဝ်းၶႃႈ ၼႂ်းၸိုင်ႈတႆးပွတ်းႁွင်ႇ လႄႈ ပွတ်းၸၢၼ်း ပႂ်ႉႁပ်ႉတွၼ်ႈၵူႈ ၸႄႈဝဵင်းၶႃႈယဝ်ႉ။ ႁဝ်းၶႃႈၵေႃႈ ၵွင်ႉၵၼ်ဝႆႉ ၵပ်းသိုပ်ႇပွင်ႇၵၼ်ဝႆႉ ထိုင်လႂ်ယဝ်ႉ ၽႅဝ်လႂ်ယဝ်ႉ ႁႂ်ႈပႃႇတီႇႁဝ်းၶႃႈ ပေႃးတေ လႆႈၶိုတ်းတၼ်းပႂ်ႉႁပ်ႉတွၼ်ႈၵၼ်ၶႃႈ” ဝႃႈၼႆ။

ယူႇတီႈၸုမ်းၶီႇရူတ်ႉၶိူင်ႈပၼ်ႇလဵပ်ႈသိုင်ႇတိူင်း မိူင်းမၢၼ်ႈ – မိူင်းတႆး ပွတ်းႁွင်ႇ၊ ပွတ်းၸၢၼ်း ဢဵၼ်ႁႅင်းၵူၼ်းၶီႇပၼ်ႇ တင်း မူတ်း 62 ၵေႃႉ ရူတ်ႉၶိူင်ႈ 25 လမ်း၊ ၵႃး 6 လမ်း။ ဢၢၼ်းဝႆႉ တေပၼ်ႇတႃႇတၢင်းၵႆ 1,500 လၵ်း။ ၸုမ်းၶီႇရူတ်ႉၶိူင်ႈၼႆႉ တႄႇ လုၵ်ႉတႃႈၵုင်ႈ ပၼ်ႇၶိုၼ်ႈမႃး။ မိူဝ်ႈဝႃး ဝၼ်းတီႈ 2 သမ်ႉ လုၵ်ႉလႃႈသဵဝ်ႈ ပၼ်ႇႁွတ်ႈထိုင် သီႇပေႃႉ၊ ၵျွၵ်ႉမႄး လႄႈၼွင်ၶဵဝ် ယဝ်ႉ ဝႃႈၼႆ။

ႁူဝ်ပီ 2019 ၼႆႉ သိုၵ်းတႆး သွင်တပ်ႉ ၽိုတ်ႉႁိမ်တီႈယူႇၵၼ်၊ ထဵင်မေႃး တိုၵ်းတေႃးၵၼ်လႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေးတီႈယူႇ။ ယွၼ်ႉပၢင်တိုၵ်းသေ ၵူၼ်းမိူင်းတိူဝ်ႉမၢတ်ႇ တၢႆႁၢႆၸွမ်းၵေႃႈမီးၼမ်။