တွၼ်ႈတႃႇ တေၵွင်ႉသၢၼ် ၶဝ်ႈႁႃၵူၼ်းမိူင်းတိူဝ်းလိူဝ်မႃးထႅင်ႈၼၼ်ႉ ပႃႇတီႇႁူဝ်သိူဝ် ၸႄႈဝဵင်းသီႇပေႃႉ သိုပ်ႇပိုတ်ႇ လုမ်းၵိင်ႇၽႄထႅင်ႈ တီႈၼိုင်ႈ။
ဝၼ်းတီႈ 31/03/2019 ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) ပိုတ်ႇလုမ်း တၢင်ႇပၢႆႉ၊ ပူၵ်းတုင်းပႃႇတီႇလႄႈ ၶွတ်ႇၽွတ်ႈၽူႈပွင်ၵၢၼ် တီႈဝၢၼ်ႈသၢႆးလႅင် ဢိူင်ႇသၢႆးလႅင် ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ပိုတ်ႇလုမ်းၵိင်ႇၽႄထႅင်ႈ တီႈႁိူၼ်းလုင်းဢႃႇလေႃးၵသေ လုင်းႁဝ်းၵေႃႈ ႁပ်ႉတၼ်းႁဵင်းပဵၼ်ႁူဝ်ပဝ်ႈ တီႈလုမ်းၵိင်ႇၽႄဝႆႉၶႃႈ။ ယဝ်ႉၵေႃႈ ၶွတ်ႇ ၽွတ်ႈ ၽူႈပွင်ၵၢၼ်လႄႈ ပူၵ်းတုင်း၊ တၢင်ႇပၢႆႉပႃႇတီႈၶႃႈ” ဝႃႈၼႆ။
ၵဵဝ်ႇလူၺ်ႈလွင်ႈ ဢၼ်ပိုတ်ႇလုမ်းၵိင်ႇၽႄပႃႇတီႇထႅင်ႈၼၼ်ႉ ပေႃးၵူၼ်းမိူင်းမီးပၼ်ႁႃသင်မႃး ႁႂ်ႈၵပ်းသိုပ်ႇ တီႈပႃႇတီႇလႆႈ ငၢႆႈလႄႈ ၸင်ႇလႆႈပိုတ်ႇဝႆႉထႅင်ႈ လုမ်းၵိင်ႇၽႄပႃႇတီႇ။
ၸၢႆးလၢဝ်သႅင် လၢတ်ႈဝႃႈ “ လွင်ႈပိုတ်ႇလုမ်းၵိင်ႇၽႄၼႆႉ ၵူၼ်းမိူင်းႁဝ်း ၵူၼ်းပိုၼ်ႉတီႈႁဝ်း မီးပၼ်ႁႃသင်မႃးၵေႃႈ ႁႂ်ႈတၢင်ႇ ထိုင်မႃးငၢႆႈ။ ယွၼ်ႉဝႃႈ မၢင်တီႈၵူၼ်းမိူင်းႁဝ်းၶႃႈ ယူႇၵႆၼႆသေ မႃးတီႈလုမ်းႁူဝ်သိူဝ်ႁဝ်းၶႃႈ တီႈဝဵင်းယၢပ်ႇၼႆလႄႈ ႁႂ်ႈတၢင်ႇ လၢတ်ႈတီႈ လုမ်းၵိင်ႇၽႄႁဝ်းၶႃႈ ဢၼ်ပိုတ်ႇဝႆႉၸိူဝ်းၼၼ်ႉၵေႃႈလႆႈ ၶေႃႈမုလ်း ဢၼ်ပီႈၼွင်ႉႁဝ်းတၢင်ႇလၢတ်ႈမႃးၼၼ်ႉ တေမႃးႁွတ်ႈၽႅဝ်တီႈလုမ်းလူင် ၼႂ်းဝဵင်းႁဝ်းၶႃႈၵမ်းသိုဝ်ႈၶႃႈ” ဝႃႈၼႆ။
လုမ်းၵိင်ႇၽႄ ၼႂ်းၸႄႈဝဵင်းသီႇပေႃႉၼႆႉ လႆႈပိုတ်ႇဝႆႉ မီး 12 တီႈလႄႈ ႁူမ်ႈပႃး လုမ်းၽူႈတႅၼ်းလႄႈ လုမ်းလူင်တီႈဝဵင်း ထႅင်ႈ တင်းမူတ်း ႁူမ်ႈၵၼ် မီး 14 ဢွင်ႈတီႈ ဝႃႈၼႆ။
